20
Hirbar fattor taki fani
1 Bosoror foyla sando hokkol Boni Israil Zin morubumit gia Kadesh elaḳat aia roila. Hono Musa nobir boin bibi Moriomor inteḳal oilo ar tanre dafon ḳora oilo.
2 Hino ḳaibar kunu fani na faoae Boni Israile Musa ar Harunor birudde dol bandia erar fise lagla.
3 Tara Musar loge ḳaijja ḳoria ḳoila, “Amrar logor baiain zebla Mabudor samne morsla, hou shomoy amra-o morigele bala asil.
4 Mabudor bonda oḳolre tumi kene ou morubumit anlae, oḳon foshur fal shudda amra hokkole ono zan kuaitam ni?
5 Mishor desh taki tumi kene amrare ola zomor gato loia ailae? I zagat na ase kunu dan-saul ba ḍumur fol, na ase angur ba anuar fol? Ar ḳaibar fani-o nai.”
6 Ita hunia Musa ar Harun manshor ges taki horia Milon-tambur duaror gese gia soizdat foṛla. Teu Mabudor nuror tozolli tarar samne zair oilo.
7 Mabude Musare ḳoila,
8 “Tumi hou laṭiṭa lo, loia tumi ar tumar bai Harune hoḳol Boni Israilre ekḳano dola ḳoro. Ar ou boṛo ze fattorgu deḳrae, tarar samne ou fattorre hukum deo, dile ou fattore fani dibo. Boni Israil ar tarar foshufal hoḳole zate fani kaito fare, erlagi tumi ou fattor taki fani bar ḳorbae.”
9 Mabudor hukum moto tan samne taki Musae laṭiṭa loila.
10 Loia Musa ar Harune manshore ou fattoror gese dola ḳorla. Ar Musae tarare ḳoila, “O beimanor zat, huno, amra ou fattor taki tumrar lagi fani bar ḳortam ni?”
11 Oḳan ḳoia Musae laṭi dia ou fattoro dui baṛi marla, baṛi marar loge loge fattor taki zure zure fani bar oilo, teu tara ar tarar foshur fale fani kaila.
12 Oile Mabude Musa ar Harunre ḳoila, “Tumra to Boni Israilor samne amare fak-fobitro ḳoia manlae na, amar zobanor ufre borosha ḳorlae na. Erlagi ami ze deshḳan Boni Israilre dan ḳormu, tumra tarare loia hino zaitae fartae nae.”
13 Fattor taki ze zagat fani bar oilo, ou zagar nam deoa oilo Meriba, mani kaijja. Ino Boni Israile Mabudor loge ḳaijja ḳorsil, ar Mabude ono-u tan fak-fobitrota tarar samne zair ḳorsoin.
Idum deshedi zaita farla na
14 Bade Musae Kadesh taki manush faṭaia Idum deshor bashshare ḳoila, “Amra to Boni Israil, afnar silsilar baiain. Afnar dorbaro amrar ekkan arzi ase, afne to amrar duḳ-mosibotor ḳota zanoin.
15 Te amrar baf-dadain to Mishor desho gesla, ar amra bout bosor hono aslam. Mishori oḳole amra ar amrar moy-murobbir ufre zulum-mosibot ḳorae,
16 amra Mabudor dorbaro ḳanda-ḳaṭi korlam. Teu Mabude amrar foriad kobul ḳoria, tan firista faṭaia amrare hou desh taki bar ḳori anchoin.
“Erlagi amra oḳon afnar deshor shimanar Kadesh ṭaunor ḳandat aisi.
17 Afne amrare afnar deshor mazdi zaibar shuzug kan deukka. Amra afnar kunu ḳet-kishi ba angur baganor mazedi zaitam nae, kunu kua taki fani-o tulia ḳaitam nae. Amra ḳali Raz Fotedi aṭia zaimu, afnar deshor shimana faronir ag forzonto ḍaine-baue kunubae fao baṛaitam nae.”
18 Oile Idumor bashshae ḳoila, “Na, na, tumra ibae zaitae fartae nae. Zaibar sesṭa ḳorle amra zuddot bar oia tumrar ufre hamla ḳormu.”
19 Teu Boni Israile zuaf dila, “Amra to ḳali Raz Fotedi zaimu. Amra ba amrar foshur fale zudi afnar deshor kunu fani kai, te itar dam dilaimu. Amra faoe aṭia ḳali desh faṛi dia zaitam sairam.”
20 Oile Idum deshor bashshae hirbar ḳoilo, “Na, na, ibaedi tumrar zaoa nished.” Bade Idum deshor bout sifaie beṭagiri deḳaia Boni Israilor loge laṛai korat bar oilo.
21 Tara Boni Israilre deshor bitredi zaite dilo na, erlagi era hoḳol firia aila.
Hozrot Harun (a:)or inteḳal
22 Erbade Boni Israil Kadesh taki roana oia Hur faṛor gese gia azila.
23 Hino Idum deshor shimanar daro Mabude Musa ar Harunre ḳoila,
24 “Harun to tar baf-dadar gese ḳoyboro zaitegi oibo. Ar ami Boni Israilre ze desh dimu, he to hi desho zaito farto nae. Mono ase ni, Meriba namor zagat fanir befare tumra amar hukumor ulṭa ḳam ḳorso.
25 Te Harun ar tar fua Ali-Azorre loia tumi Hur faṛor ufre uṭo.
26 Uṭia Harunor gotor taki imamoti lebas kulia tar fuare findao, ḳaron Harun tar baf-dadar gese zaibogi, hono-u tar inteḳal oibo.”
27 Musae Mabudor hukum mafik ola ḳorla. Hoḳol Boni Israilor samne tara Hur faṛor ufre uṭla.
28 Uṭar bade Musae Harunor imamoti lebas kulia hari en fua Ali-Azorre findaila. Hou faṛor ufre Harune inteḳal ḳorla. Bade Musa ar Ali-Azor faṛ taki lamia aila.
29 Boni Israile Harunor moutor ḳobor hunia fura tish din tan lagi mattom ḳorla.