27
Mannot-sodga dibar niom-ḳanun
1 Bade Mabude Musa nobire ḳoila,
2 “Tumi tamam Boni Israilre zanai deo, ḳeu zudi kunu manshore Allar name deoar mannot ḳore, te ou zonor bodla olaḳan hadia dite oibo:
3 Bish taki shaiṭ bosor boyoshi beṭaintor lagi, ebadot ḳanar mafe foinchash tola rufa hadia dite oibo,
4 ou boyoshi beṭintor lagi tish tola.
5 Fas bosor taki bish bosor boyoshi fuaintor lagi bish tola rufa,
ou boyoshi fuṛintor lagi dosh tola.
6 Eḳ mash taki fas bosor boyoshi fuaintor lagi fas tola rufa,
ou boyoshi fuṛintor lagi tin tola rufa.
7 Shaiṭ bosor ba er beshi boyoshi beṭaintor lagi fonro tola,
ou boyoshi beṭintor lagi dosh tola rufa dite oibo.
8 “Oile ou mannot ḳorra zon zudi gorib manush oy, tar mannotor hadia dibar takkot na taḳe, te tare loia imam sabor gese zaibae, gele imam sabe tar halot buzia hadia ṭik korba.
9 “Zudi kobul oar zuka kunu foshure Mabudor name mannot ḳora oy, te ou foshure Mabudor samana hishabe fobitro ḳoia goinno ḳorio.
10 Ou foshur bodla dusra kunu foshu dile kobul oito nae. Iṭa bala oile er bodla bad foshu, ba bad oile er bodla bala kunu foshu dile-o kobul oito nae. He zudi eḳṭar bodla aroḳṭa foshure dilae, te ou duioṭare fobitro hishabe goinno ḳorio.
11 Oile Mabudor name kobul oar zuka nae, ila kunu nafak zator foshure ḳeu zudi mannot hishabe manilae, te oḳṭare loia imam sabor gese zaio,
12 gele tain oḳṭar hal-hokikot buzia hari ze dam ṭik korba, ou dam-u oibo iṭar shoṭik dam.
13 Mannot ḳorrae iṭare ḳalas ḳorar kial oile, ou damor loge aro fas baṭor eḳ baṭ dam beshi dite oibo.
14 “Ḳeu zudi tar kunu baṛi-gorre Mabudor name fak-fobitro samana hishabe mannot ḳorilae, te imam sabe ou baṛir hal-hokikot buzia ze dam ṭik korba, iṭa-u oibo er shoṭik dam.
15 Oḳon ou baṛire he ḳalas ḳoria nito saile, ou damor loge aro fas baṭor eḳ baṭ beshi dite oibo. Teu baṛi kan tar oibo.
16 “Kunu manshe zudi tar nizor zomi-mirashor kunu eḳ ongshore Mabudor name mannot ḳoria fak-fobitro ḳoia alog korilae, te ou zomino ze forimane ḳet oy, ou fosholor foriman buzia er dam ṭik korte oibo. Forteḳ fas mon barli bisor dam hishabe ada sher rufa dorbae.
17 Ar zomi-mirash Firot Faoar Bosor zudi he tar zominre fak-fobitro ḳoia mannot ḳore, te ou niom mafik imam sabe ze dam ṭik korba, iṭa-u oibo er shoṭik dam.
18 Oile Firot Faoar Bosoror bade zudi he tar mannot ḳore, te bador Firot Faoar Bosor forzonto hishab ḳoria zoto bosor oy, oto bosoror fosholor hishabe imam sabe er dam ṭik korba, bosor hishabe zominor dam ḳombo.
19 Ar mannot ḳorra zone zudi tar zominre ḳalas ḳoria nito sae, te ṭik kora ou damor loge aro fas baṭor eḳ baṭ beshi dite oibo, teu zomi kan tar oibo.
20 Oile he zudi kalas ḳori na ney, ba dusra zonor gese besilae, te ou zomin ḳan ar ḳalas ḳoria nibar fot nai.
21 Zomi-mirash Firot Faibar Bosor zebla zomi kan emne-u ḳalas oizibo, ou shomoy i zomi kan Mabudor name siroḳalin saf-kobala zominor laḳan fak-fobitro samana hishabe goinno oibo. Ikan oizibo imam sabor zomi.
22 Nizor bafaiti zomi nae ila kunu ḳorida zominre ḳeu zudi mannot mania fak-fobitro hishabe goinno ḳorae,
23 te imam sabe Firot Faoar Bosor forzonto hishab ḳoria ikanor dam ṭik korba, ar hou din-u ou zominor damre he Mabudor name fak-fobitro samana hishabe dilaite oibo.
24 Ar zomi kan he zar ges taki loisil, zomi-mirash Firot Faibar Bosor ikan hirbar hou mul malikor ato zaibo.
25 Hoḳol zinishor dam ṭik korio, ebadot ḳanar mafe. Forteḳ bish rotie eḳ tola gonio.
26 “Kunu foshur foyla meda baichchare ḳeu Mabudor name lilla dibar lagi mannot ḳorto farto nae, iṭa to emne-u Mabudor. Ita goru-sagol, meṛa zetar baichcha-u ouk, iṭa Mabudor.
27 Zudi iṭa kunu haram foshur foyla meda baichcha oy, te imam sabor ṭik kora damor loge aro fas baṭor eḳ baṭ beshi dia iṭare ḳalas ḳori nito farbo. Ar he zudi kalas ḳori na ney, te ou dame iṭare besilite oibo.
28 “Oile kunu manshe zudi tar nizor kunu samana Mabudor name siroḳalin saf-kobala dolilor laḳan mannot ḳorilae, te ou mannot ḳora samana ar ḳalas ḳoria firot nito farto nae, ba besto-o farto nae. Ita zomi-zoma ouk, ba kunu manush, ba foshu oile-o, ita siroḳalor lagi Mabudor name ḳas fobitro samana hishabe goinno oibo.
29 Kunu manshore Mabudor name siroḳalor lagi ola mannot ḳoria dilaile, tare ar ḳalas ḳori neoa zaito nae, tare zane marilite oibo.
30 “Zomino taki zeta fol-foshol mile, itar dosh baṭor eḳ baṭ to Mabudor. Ita ḳetor foshol ouk ba gasor fol ouk, hoḳolta-u Mabudor name fak-fobitro.
31 Ḳeu zudi tar ou dosh baṭor eḳ baṭ ḳalas ḳoria nito sae, te er loge aro fas baṭor eḳ baṭ beshi dite oibo.
32 Forteḳ foshur falor dosh baṭor eḳ baṭ Mabudor, mani fale foshu gonar shomoy forteḳ dosh nombor foshu ogu Mabudor name fak-fobitro.
33 Ou dosh nombor foshu oguin bad ba bala ita deḳar kunu zorur nae, ba iṭa bodlaia dibar shuzug nai. Ḳeu zudi iṭar bodla dey, te ou dosh nombor foshu ar bodla foshu duioṭa-u Mabudor name fak-fobitro oizibo, ita ar ḳalas ḳori neoa zaito nae.”
34 Mabude Tur faṛor ufre Musa nobir gese, Boni Israilor lagi ou hukum-ahkam oḳol dan ḳorsila.