26
Allar hukume solar furuskar
1 “Tumra kunu nomunar deb-debir murti banaio na. Laḳṛidi banail murti, ba kunuzat fattorre devta hishabe boail ḳorio na. Pujar niote fattor kudia banail kunuzat murti tumrar deshor maze rakio na. Mono rakio, ami Alla-u tumrar Mabud.
2 Amar deoa forteḳ Zummabar tumra manio, amar fobitro Kaba gorre tumra ijjot ḳorio. Ami-u to Mabud.
3 “Tumra zudi amar hoḳol hukum-ahkam ar niom-ḳanun mania amol ḳoro,
4 te ami tumrare ṭikmoto meg-fani dimu. Teu tumrar zomino foy-foshol folibo ar gas-gasalie-o fol-mul dibo.
5 Tumrar ḳetor foy-foshol oto beshi oibo zen, angur tular shomoy azile-o, tumrar foshol maṛa deoat roibae. Ar zominor maze noya bis bain deoar shomoy azile-o, ou shomoy forzonto angur tulat roibae. Tumra feṭ boria ḳana-fina ḳaibae, ar nirafode nizor baṛit boshot ḳorbae.
6 “Ami tumrar desho shanti dimu, tumra shantie gumaibae, ḳeu aia tumrare kunu ḍor-ḳof deḳaito nae. Tumrar desh taki hoḳol zator hingshro zanuarre ami kedai dimu, ar kunu sifai dole-o tumrar desho hamla ḳorat aito nae.
7 Tumrar dushmon oḳolre ḳedaia nibae, tumrar sokur samne tarar moron oibo.
8 Tumrar ḳali fas zon sifaie eḳ-sho dushmonre, ar eḳ-sho sifaie dosh azar zonre ḳedaia nibae, tumrar dushmon tumrar sokur samne toluaror tole morbo.
9 Ami tumrar bae doyar nozore saimu, tumrar aolad baṛaia tumrar ḳandan boṛo ḳormu, ar tumrar loge amar oada-chukti boail raḳmu.
10 Noya bosoror foshol tular lagi ugar ḳali korar ag forzonto, agor bosoror fosholdi tumrar ḳana-fina solbo.
11 Tumrar bae taki amar muk firaitam nae, tumrar maze-u roibo amar boshot gor.
12 Ami tumrar loge sola-fira ḳormu, ami oimu tumrar Mabud, tumra oibae amar ḳas proza.
13 Kial rakio, ami Alla-u tumrar Mabud. Mishor desh taki ami-u tumrare azad ḳori anchi, zate tumra Mishori oḳlor gulami kora na lage. Tumrar gordona taki zual bangia falaia, mata usa ḳori aṭibar haloto ami-u tumrare anchi.
Naformanir shaza
14 “Oile tumra zudi amar ḳota na huno, amar ou hukum-ahkam na mano,
15 amar batail ain-ḳanunre nafosond ḳoro, amar deoa shoriotre elami koro, ar amar hukum na mania, amar oada-chuktir ulṭa solo,
16 te ami tumrar ufre ola ḳaṛa mosibot dimu, tumrar shoril koy oar bemar dimu, gozobi jokka bemar ar bezuita taf oibo, ota bemare tumrar sokur faoar koy oibo, shorilor ḳomzuri aibo. Tumra zomino ḳet ḳorle-o fayda oito nae, tumrar foshol dushmone ḳaibo.
17 Ami tumrar ḳeti korat lagizimu, ar tumra nizor dushmonor gese aribae. Tumrare zetae ingsha ḳoroin, otae tumrare shashon ḳorba, ar ḳeu tumrare na ḳedaile-o, tumra zanor ḍore emne-u bagibae.
18 “Erbade-o zudi tumra amar ḳota na huno, te ami tumrar gunar shat gun beshi shaza dimu.
19 Ami tumrar bol-shoktir beṭagiri bangia surmar ḳorilimu. Tumrar matar ufror asmanre luar laḳan, ar faor tolor maṭire tamar laḳan shokto ḳormu.
20 Teu tumra oto menot ḳoria-o kunu fol faitae nae. Ḳetor zomino foshol dorto nae, gas-gasalit fol milto nae.
21 “Tumrar dilor maze zudi amar lagi kunuzator dushmoni taḳe, amar batail hukum zudi tumrar ḳano na hamae, te ami tumrar naformanir lagi shat gun beshi shaza dimu.
22 Tumrar maze ami hingshro zanuar faṭaimu, itae tumrar fua-fuṛintore ḳaiba, tumrar foshur falre binash ḳorba, ar tumrar manshor foriman-o ḳomailiba, deshor fot-gaṭ ḳali foṛi roibo.
23 “Ou hoḳol goṭona goṭar bade-o tumra zudi amar ain-ḳanunor ulṭa solo,
24 te ami nize tumrar dushmon bonia, tumrar gunar shat gun beshi shaza dimu.
25 Amar oada-chuktire na manae ami tumrar ufre laṛai-zuddo anaimu. Dushmonre dekia tumra zebla ṭauno gia hamaibae, hono ami tumrar ufre gozobi morki saṛimu, teu tumra dushmonor ato dora foṛbae.
26 Ami tumrar ḳani-kurakir maze obab goṭaimu, teu dosh zon beṭie randite eḳ sular beshi lagto nae. Ḳanit boia tumra ruṭi mafi mafi kaibae, feṭ bora ḳani zuṭto nae.
27 “Ita hoḳoltar bade-o zudi amar ḳota na hunia amar ulṭa solo,
28 te ami gusae aguin oia ami-o tumrar ulṭa solmu, ar tumrar gunar shat gun shaza dimu.
29 Feṭor buke ou shomoy tumra nizor fua-fuṛintore sibaia ḳaibae.
30 Ami tumrar pujar hoḳol manḍob ar duf-duna zalanir zagare-o binash ḳormu, tumrar deb-debir murtir ufre ami tumrar lashor ṭeki toimu, ami tumrar bae kub ginnar nozore saimu.
31 Ami tumrar gau ar ṭaun oḳol, ar hoḳol mosid-mondir binash ḳorilimu. Tumrar sodga-kurbanir dumar geran ami ar kobul ḳortam nae.
32 Ami tumrar deshor ufre ola gozob dimu, zeta dekia tumrar dushmon oḳole-o ḍoraia ḳafiba.
33 Nanan zatir maze ami tumrare sitrai dimu, toluar ato loia ami tumrare ḳedaimu. Tumrar desh binash oibo, tumrar ṭaun ar gau-geram ḳali foṛi roibo.
34 “Tumra dushmonor desho taḳar shomoy, tumrar nizor deshor zomine tar faona ziranir bosor ziraibo. Ou shomoy deshor maṭie tar faona aram faibo.
35 Tumra nize taḳar shomoy zebla ou zomin oḳole ziranir bosor faisil na, oḳon desh binashor shomoy itae hou faona zirani ziraibo.
36 Tumrar mazor zera gia dushmonor desho basia roiba, tarar bitre ami ou laḳan ḍor-ḳof harai dimu, laṛair ḳalo manshe zela dushmonor at taki basar lagi douṛia bage, oula egu fata foṛar aoaz hunle-u tara douṛia bagiba.
37 Toluaror tol taki basar lagi manshe zela zan loia douṛae, ḳeu tumrare na douṛaile-o tumra nize nize douṛaia ola eḳe-oinnor ufre foṛbae. Dushmonor samne tumra ubaitae fartae nae.
38 Tumra nanan zatir manshor maze sitria morbae, ar dushmonor deshe tumrare gilia ḳaibo.
39 Erbade-o zudi tumrar mazor ḳeu hono basia roy, te tara-o nizor ar tarar moy-murobbir naformanir lagi koy oat roiba.
40 “Tara oḳan shikar ḳora lagbo zen, tara ar tarar moy-murobbie amar loge beimani korse, amar hukumor birudita ḳoria guna ḳorse,
41 erlagi ami-o tarar loge dushmonor laḳan bebohar ḳorsi, tarare biṭa-maṭi saṛaia dushmonor desho anaisi. Ota shikar ḳoria tara zudi kator oia norom dile touba ḳoria gunar shaza boite razi oy,
42 te ami Iakubor loge ḳaim ḳora amar oada-chuktir ḳota iad ḳormu, Isʼhakor loge ḳora oada-chuktir ḳotare-o mono ḳormu, ar Ibrahimor loge ḳora amar oada-chuktire iad ḳormu, tarare deoa deshor ḳota-o kial ḳormu.
43 “Tara desh saṛia zaoar bade tarar binash oa desh ḳali foṛi roibo, zominor faona ziranir bosor oḳol-o ziraibo-u ziraibo. Amar hukumor birudita ḳoria naformani korae, amar ainor ulṭa solae tara ola shaza faiba.
44 Oile dushmonor desho taḳar ḳalo ami tarare ola kunu ginna ba elamir souke deḳtam nae, tarare ekkere binash oite ditam nae, zate tarar loge ḳora amar oada-chukti bongo na oy. Mono rakio, ami Alla-u tarar Mabud.
45 Tarar lagi ami tarar moy-murobbir logor oada-chuktire iad ḳormu. Ou moy-murobbi oḳlor Mabud oar niote hoḳol zatir samon dia ami tarare Mishor desh taki bar ḳoria anchi. Ami-u to Mabud.”
46 Ita oilo hou shoriot, hukum-ahkam, ar niom-ḳanun, zeta Tur faṛor ufre Mabude Musa nobir marfote Boni Israilor lagi boail ḳorsoin.