Hozrot Isar duk-koshṭo ar mout (22:1–23:56)
22
Hozrot Isa al-Mosire zane marilibar fondi
1 Ihudi oḳlor Ḳamir Saṛa Ruṭir Id ḳasat ailo, ou idor nam Azadi Id.
2 Ibae moulana ar boṛo imam oḳole foramish ḳorla, Hozrot Isare am manshor ges taki lukaia kila zane marta. Tara am manshore kub ḍoraita.
Ihuda Iskariator beimani
3 Ou shomoy tan barozon sahabir mazor eḳzon, en nam Ihuda Iskariat, en bitre Shoytan hamailo.
4 Ein Isare doraia deoar lagi lukaia Baytul-Mukaddoso gela. Gia honor daroga ar boṛo imam oḳlor loge foramish ḳorla, kun nomunae Isare tarar ato dorai deoa zae.
5 Teu imam oḳol kub kushi oia oada ḳorla, tanre doraia dile tare boḳshish diba.
6 Ete Ihuda-o razi oia manshor aforḳe, tanre dorai deoar shuzug tukanit roilo.
Hozrot Isar aḳeri mezbani
7 Bade Azadi Id ailo, ou idor din meṛa-baichcha kurbani deoa oy.
8 Teu Isae sahabi Fitor ar Hannanre hukum dila, “Tumra gia amrar lagi idor ḳani tiar ḳoro, amra hoḳol aia eḳloge ḳaimu.”
9 Era zikaila, “Huzur, afnar kial kita, amra kunano gia ḳana tiar ḳortam?”
10 Tain ḳoila, “Huno, ṭauno hamaia harle tumra deḳbae, eḳ beṭae fanir ḳoyla boria loia zaira. Tumra en ḳore ḳore zaio, gia ein ze goro hamaiba,
11 hou goror malikre ḳoio, ‘Huzure zikaisoin, tan sahabi oḳolre loia Azadi Idor ḳani ze goro ḳaita, i musafir ḳana kuai?’
12 He tumrare ufror talat hazail-faṛail boṛo ek kuṭa deḳaia dibo. Hono gia tumra randa-baṛa ḳorio.”
13 Hasau tara gia tan ḳota mafik hoḳolta faila, faia Azadi Idor ḳani-o tiar ḳorla.
14 Bade shomoy aile Isae tan barozon sahabi loia ḳanit boila.
15 Boia ḳoila, “Amar boṛo kial asil mosibotor mukamuki oibar age, aḳeri idor ḳani kan tumrare loia ḳaitam.
16 Ami tumrare ḳoiram, Allar bashshair asol morzi-munsha furafur hasil na oa forzonto, ami ar kunu idor ḳani kaitam nae.”
17 Bade tain shorbotor fiala loia Allar shukria zanaia ḳoila, “Ou fuṭain tumra baṭia ḳailao.
18 Ar huno, ami tumrare ḳoiram, Allar bashshai na aoa forzonto, ami ar anguror kunu shorbot ḳaitam nae.”
19 Erbade ruṭi ato loia Allar shukria zanaila. Ruṭi ṭukraia sahabi oḳolre dila, ḳoila, “Mono ḳorio iṭa amar ḳaya, ou ḳaya ami tumrar lagi shofi dimu. Amare mono ḳorar lagi tumitain-o ola ḳorio.”
20 Ḳaoar bade shorbotor fiala ato loia ḳoila, “Amar lour zoriae Allar loge manshor milonor ze noya usilla nazil or, ou fiala oilo er nishana. Amar ou lou tumrar nazator lagi dimu.
21 Te deḳrae ni! Amare zegie doraia dibo, he oḳon amar loge ou dostarḳanat boia ḳar.
22 Allae zela hukum ḳorsoin, ami bin-Adomor mout to ola-u oibo. Haere hae! Lannoti hou adom, zegie amare doraia dibo.”
23 Sahabi oḳole eḳe-oinnore zikaila, “Te amrar mazor kun manshe ila ḳam ḳorbo?”
Kun zon hoḳol taki boṛo
24 Ou shomoy sahabi oḳlor maze kun zon hoḳol taki boṛo, ota loia tarar maze torka-torki lagigelo.
25 Teu Isae tarare ḳoila, “Bidormi deshor raza oḳole tarar prozar ufre munibgiri deḳain. Tarar zomidarre ḳoa oy zongonor dust.
26 Oile tumra ilan oio na. Tumrar maze zein hoḳol taki boṛo, ein hoḳlor huru ouk. Ar zein neta, ein ḳadimdaror laḳan ouk.
27 Ḳo sain kun zon boṛo? Zein ḳana ḳain, na ze ḳadimdari kore? Zein ḳana ḳain ein-u nae ni? Te ami nize-u to tumrar ḳadimdari koriar.
28 “Huno, amar hoḳol bala-mosiboto tumra amar loge loge aslae.
29 Ar amar batuni bafe amare zela godi ar ḳemota dan ḳorsoin, ami-o oula tumrare ḳemota dan ḳorram.
30 Ou ḳemota faia, tumra-o amar bashshait dakil oia amar loge boia ḳana-fina ḳaibae, amar loge godit boia Boni Israilor baro gusṭir bisar-adalot ḳorbae.
Hozrot Fitoror befare agam ḳobor
31 “Saimon, Saimon, huno, dan-saul zela saindi saniain, Shoytane-o tumrare ola saniaito saise.
32 Oile tumar lagi ami aroz ḳorsi, tumar iman zanu ḳomzur na oy. Te tumi eḳbar gelegi-o touba ḳoria zebla firot aibae, ou shomoy tumar ou baiaintor imani bol-o mozbut ḳorio.”
33 Fitore ḳoila, “Huzur, ami to afnar loge oia zelo zaite, ba zan dite-o tiar asi.”
34 Tain ḳoila, “Fitor, ami tumare ḳoiram, aiz fotabala murgae bang dibar age-u, tumi tin-tinbar ḳoibae, tumi amare sino na.”
35 Bade tan sahabi oḳolre zikaila, “Ḳo sain, ami zebla tumrare ṭeḳar toli, gaiṭ-buski ita kunta na dia ḳali faoe faṭaislam, hi shomoy tumrar kuntar obab oisil ni?” Tara ḳoila, “Ji na, kunu obab oise na.”
36 Isae ḳoila, “Te oḳon ami koi, oḳon zar ṭeḳar toli ba gaiṭ-buski ase, he ota loge raḳouk. Zar toluar nai, he tar saddor besia toluar ḳorid ḳorouk.
37 Pak Kalamor ayato to leḳa ase, tanre naforman oḳlor ḳataro milail oibo. I ayat to amar ufor dia-u folibo. Amar befare zotota leḳa ase, ita hokkolta oḳon folizar.”
38 Teu sahabi oḳole ḳoila, “Huzur deḳoukka, ino dukan toluar ase.” Tain ḳoila, “Ota-u to bout.”
Zoytun faṛo Hozrot Isar toklif
39 Ḳana-finar bade Isa bar oia boraborkur laḳan hou Zoytun faṛo gela, sahabi oḳol-o tan ḳore ḳore gela.
40 Hono gia harle Isae tarare ḳoila, “Tumra dua ḳoro, zate kunu forikkat na foṛo.”
41 Ḳoia hari sahabi oḳlor ges taki sair nol foriman duroi gia, zanu fatia dua ḳorat boila.
42 Tain ḳoila, “Behesti baba, tumar ichcha oile mosibotor i fialaṭa amar ges tone horailao. Oile amar ichchae nae, tumar ichchae-u ouk.”
43 Teu behest taki eḳ firista aia Isare doroshon dia tan bol baṛaila.
44 Bade tain monor duke fereshan bonia aro ḳator oia dua ḳorla. Erlagi tan gotror gam lour fuṭar laḳan maṭit foṛto laglo.
45 Dua shesh ḳoria sahabi oḳlor ḳandat aia deḳla, monor duke ḳator oia tara gumai gesoin.
46 Dekia tarare ḳoila, “Gumairae ḳene? Uṭia dua ḳoro, zate forikkat na foṛo.”
47 Isa mato roisoin, ou shomoy aḳta-u hikano bout manush aila. Erar hokkolor age asil Ihuda, he Isar barozon sahabir mazor eḳzon. Ihudae tanre hunga dibar lagi kandat ailo.
48 Isae tare ḳoila, “Ihuda, ami bin-Adomre hunga dia dorai dirae ni?”
49 Ou shomoy Isar ḳandat zera asla, tara buzilila kita or. Buzia ḳoila, “Huzur, otare amrar toluardi martam ni?”
50 Ḳoia-u eḳ sahabie toluardi sed mari fordan imamor gulamor ḍainor ḳan ḳaṭilila.
51 Oile Isae ḳoila, “Bad deo, ar mario na.” Oḳan ḳoia tain hi gulamor ḳan atai dia tare bala ḳorilla.
52 Hozrot Isare aṭok korat zoto boṛo imam, Baytul-Mukaddosor daroga, ar murobbi oḳol aisla, Isae tarare zikaila, “Manshe sur-ḍaḳait dorte zela laṭi-sulfi loia zain, tumra amare dorat oula aiso ni?
53 Ami to forteḳ din-u Baytul-Mukaddoso tumrar samne aslam, hi shomoy amare dorlae na ḳene? O, oḳon nisoy tumrar shomoy, andairor razotto salu oise.”
Hozrot Fitoror oshikar
54 Dushmonor dole Isare aṭok koria fordan imamor baṛit loia gelagi. Sahabi Fitor duroi hori hori Isar ḳore oia gela.
55 Uṭanor maze bakka manshe aguin doraia tabanit lagla, Fitor-o ono aia shorik oila.
56 Ou shomoy eḳ bandi beṭie agunir foror maze Fitorre dekia bala ḳori saia ḳoilo, “Ou beṭa-o hogur loge asil.”
57 Fitore ḳoila, “Na beṭi, ami ere sini-u na.”
58 Tuṛa bade aroḳzone Fitorre dekia ḳoilo, “Tumi-o otar logor eḳzon.”
Tain ḳoila, “Na ba, ami nae.”
59 Aro eḳod gonṭa bade aroḳzone boṛo golae ḳoilo, “Oy, oy, ogu-o er loge asil, e-o to Galilor manush.”
60 Tain ḳoila, “Dur beṭa! Tumi ita kita mato, kunta buzi na.”
Fitore ota ḳoira, ermaze aḳta-u murgae bang dilailo.
61 Teu Isae muk firaia Fitoror bae saila. Saite-u Fitoror mono oigelogi, huzure to age-u ḳoisla, “Aiz fotabala murgae bang dibar age-u, tumi tinbar ḳoibae, tumi amare sino na.”
62 Teu Fitor bare gia kub ḳandon ḳandila.
Deshor fotua komiṭir samne Hozrot Isa
63 Hozrot Isare doria ania faradar oḳole tanre ṭaṭṭa-moshkora ar mair-doir ḳorlo.
64 Tan souk bandia ḳoilo, “Hoi, tui bule nobi, te oḳon gaibi ko sain, tore ḳegie marlo?”
65 Oula aro boutta ḳoia tanre beijjot ḳorlo.
66 Rait fuanir bade deshor fotua komiṭir murobbian, boṛo imam ar alim oḳol dola oila, ar Isare tarar samne anaia ḳoila,
67 “Tumi zudi Allar oada ḳora hou al-Mosi o, te amrare ḳo.” Isae ḳoila, “Ami koile-o to tumitain ekin ḳortae nae.
68 Kunta zikaile-o zuaf ditae nae.
69 Oile ami bin-Adom oḳon taki-u arshe-azimo Allar ḍainor kursit boimu.”
70 Teu hokkole zikailo, “Te tumi-u kita Allar ḳas mayar zon Ibnulla ni?” Tain ḳoila, “Oy, tumitain-u to ḳoirae, ami-u hein.”
71 Teu tara hokkole ḳoilo, “Te ar shae-shakkidi kita ḳortae? Amra nizor ḳane-u to tar zobanbondi hunlam.”