50
1 Iusufe tan bafor mukor ufre muk lagaia ḳandita lagla ar tanre hunga dila.
2 Bade tain nizor odinor hekim oḳolre hukum dila, tara tan bafor lashre momi banaibar lagi. Teu tara tan gotro momir moshla lagaila.
3 Tara i kamo sallish din lagaila, ou ḳamo to sallish din-u lage. Ar Mishori oḳole tan lagi shottoir din boria ahazari korla.
4 Ou ahazarir dinor bade, Iusufe Feraunor baṛir manshore ḳoila, “Afnara zudi amare doya ḳoroin, te Feraunre amar ou ḳotaḳan zanaukka zen.
5 Babae amare ḳosom ḳoraia ḳoisla, ‘Huno, ami to morizimu, te Kenan desho amar lagi zuit ḳora ḳoyboro amare dafon ḳorio.’ Teu oḳon tanre dafonor lagi, doya ḳori amare zaite deukka, babare ḳoybor dia-u ami hirbar aimu.”
6 Feraune zuaf dila, “Tain tumare zela ḳosom ḳoraisoin, tumi gia oula-u ḳoro.”
7 Teu Iusufe tan bafre dafonor lagi roana dila; ar Feraunor hoḳol gulame, tan dorbaror murobbi oḳole ar Mishoror moy-murobbi oḳole,
8 Iusufor nizor foribar, tan baiain ar tan bafor foribaror hoḳole roana dila. Gushono ḳali tarar huruttain ar goru-meṛar falain toia gela.
9 Tara bout guṛar gaṛi ar guṛ-soar oḳol loia eḳ biraṭ dol hazia roana dila.
10 Ar Zordan gangor hofaro Aṭador dan maṛar zagat gia, tara hoḳole shatdin dori Iusufor bafor lagi kub ahazari ar bilaf ḳorla.
11 Aṭador dan maṛar zagat tarare ila ahazari korat dekia, hi deshor bashinda Kenani oḳole ḳoila, Mishori oḳlor lagi iṭa kub bezuita ahazari; erlagi Zordan gangor faror ou zagar nam oigelo, Abel-Mishroyim [mani, Mishori oḳlor ahazari].
12 Israile tan fuaintore zela osiot ḳorsla, tara tanre ola-u ḳorla.
13 Tara tan lash Kenan desho loia gela, ar Momrir gese Moḳfelar zominor, guhar maze tanre dafon ḳorla. Iṭa ḳobrostan bananir lagi Ibrahime, Hiṭṭi Ifrunor ges taki loisla.
14 Bafre dafon ḳorar bade Iusuf, tan baiain ar zoto manush tan bafre dafon ḳorat loge gesla, tara hoḳole Mishoro firia aila.
Hozrot Iusuf (a:)e baiainre maf ḳorla
15 Baf morigesoin dekia Iusufor baiainte mata-mati korla, Iusufe kiba amrare ginnaibo ar amra tar zeta ḳeti korsi, oḳon ita hokkoltar bodla loibo.
16 Teu tara Iusufor gese ḳobria faṭaia ḳoila, “Tumar bafe morar age i osiot ḳorsla zen,
17 tumra Iusufre ou ḳotaḳan ḳoio, tumar baiainte tumar zeta ḳeti korsoin, doya ḳori tumi tarar hi oinnae ar guna maf ḳori dio. Erlagi amra minot ḳoriar, tumar bafor Allar ou gulam oḳolre maf ḳori dilao.” Tarar mat hunia Iusufor ḳandon aillo.
18 Bade tan baiainte tan samne aia maṭit foṛia ḳoila, “Huno, amra to tumar gulam.”
19 Oile Iusufe tarare ḳoila, “Tumra ḍoraio na. Ami kunu Allar ḳolifa ni?
20 Tumra to amar ḳeti kortae saislae, oile Allae itare balai banailla, zela aiz deḳrae, te tan kial asil ou laḳan ḳori bout manshor zan basaita.
21 Tumra oḳon ḍoraio na. Ami tumrare ar tumrar fua-fuṛintore deḳa-huna ḳormu.” Tain ou laḳan ḳori tarare buz dila ar kush dile mat-ḳota matila.
Hozrot Iusuf (a:)or inteḳal
22 Bade Iusuf ar tan bafor aolad oḳole Mishoro boshot ḳorat roila. Iusuf eḳ-sho dosh boros zinda asla.
23 Tain Afraimor natinosha forzonto deḳla ar Manoshar fua Makiror huruttain-o Iusufor ato foyda oila.
24 Bade Iusufe tan baiaintore ḳoila, “Amar to moutor oḳt aichche, nisoy Allae tumrar bae nozor raḳba. Tain Ibrahim, Isʼhak ar Iakubor gese ze desh dita ḳori kosom ḳorsoin, tumrare on taki hou desho loia zaiba.”
25 Ar Iusufe Boni Israilre ou osiot ḳoraila, “Nisoy Allae kunudin tumrar bae nozor ḳorba. Te on taki zaoar bala tumra amar aḍḍi oḳol tulia loia zaio.”
26 Heshe eḳ-sho dosh boros boyosho Iusuf mara gela. Teu manshe tan lashre kushbu-mosholadi makia momi banaia Mishor desho ek kafonor baksor bitre toila.