Fobitro Tourat Shorif dusra sifara
Hizrot
Forisiti
Hizrot sifara oilo Fobitro Tourat Shorifor dui nombor sifara. Alla Pake ou sifarar maze tan foyda ḳora ashraful moḳlukator (shrisṭir shera zat) gese nizor forisoy zair ḳorsoin. Allar munsha-morzi, kun ḳam ḳorle tain kushi ar kun ḳame tain bezar oin, ar tan bonda oḳolre tain ḳoto maya ḳoroin, naforman oḳolre touba ḳorar ḳoto beshi shuzug dein, ou sifarar maze ita zana zae.
I sifarar maze Allar nobi Hozrot Musa (a:)or itihash ase. Tan zonom, tain kila huru taki boṛo oila, ḳemne deshantori oila, ar kun halote Alla Mabudor didar-doroshon faila ota zana zae.
Musa (a:)or zomanar 400 bosor age, Mishoror bashsha eḳ Feraune Hozrot Iusuf (a:)re kub maya ḳorta, Iusufor baba Hozrot Iakub (a:)or bongshodor Boni Israilre-o kub maya ḳorta. Mishori oḳole erare Boni Israil na ḳoia, Ibrani koia ḍakita. Ibrani shobdor mani oilo, rifuzi ba boitol. Iusuf (a:)or ufator bade, aroḳ Feraun Mishoror bashsha oia Boni Israilor ufre kub zur-zulum ḳoria tarare gulam banailo, oile Allae Hozrot Musa (a:)re faṭaia Boni Israilre Feraunor gulami taki azad ḳorla.
Alla Pake Hozrot Musa (a:)or gese Boni Israil ar tamam adom zatir lagi Allar shoriotor siroḳalin doshṭa hukum zanaila. Ou hukum hokkol nobi, rosul, fegambore manchoin. Er kunu rod-bodol nai.
Ou sifarat deḳa zae, Allae Hozrot Musare hukum dila Allar lagi tain ekkan fobitro gor banaita, ou goror noksha-o Allae tanre deḳaila. Ou goror bitre asil fobitro Herem Shorif, manshe i gorre fobitro Milon-tambu ḳoia ḍakita. Ikan oilo hou amolor Kaba Shorif, asta duniar hoḳol muminor kibla. Boni Israil zati ou shomoy musafiror laḳan zagae zagae gia roita, erlagi ou ebadot ḳanare tarar loge ḳori boia nita. Ar i sifarar heshe ase, Hozrot Musa (a:)or hukum mafik Boni Israile ou tambu gor banaila.
Ermaze ase:
(1) Allae Boni Israilre azad ḳorla 1:1—15:21 ayat
(2) Morubumit Boni Israilor sofor 15:22—18:27 ayat
(3) Mabudor loge tan bondar milonor usilla 19—24 ruku
(4) Allar fobitro gor bananir hukum 25—31 ruku
(5) Allar birudde Boni Israilor naformani 32—34 ruku
(6) Allar fobitro gor banani 35—40 ruku
Allae Boni Israilre azad ḳorla (1:1—15:21)
1
Boni Israilor ufre zulum
1 Allae Hozrot Iakubor noya nam disla Israil, erlagi tan bongshor nam oilo Boni Israil. Iakube tan bibin-baichchain ar foribaror hoḳolre loia Mishor desho gelagi. Ou shomoy tan loge oia zera gela, erar nam oilo,
2 Ruben, Shimion, Lebi, Ehuda,
3 Isaḳor, Sobulon, Bin-Iamin,
4 Dan, Noftali, Sadu ar Ashir.
5 Iakubor bongshor hokkoltae milia shottoir zon asla. Ar Iusuf ag taki-u Mishoro taḳta.
6 Bade Iusuf, tan baiain, ar hi amolor hoḳol mara gela.
7 Oile tarar bador bongshodor baṛia kub bolala oila. Era sairobae sitria asta Mishor desh borigela.
8 Ermaze Mishoro eḳzon noya bashsha oila, ein Iusufre sinoin na.
9 Ein nizor proza oḳolre ḳoila, “Saia deḳo, Boni Israil amra taki beshi-o ar bolala-o.
10 Te ao, amra eḳ fondi kori, ita zenu ar na baṛoin. Arnae tara baṛia heshe zuddor ḳalo amrar dushmonor loge milia amrar birudde zuddo ḳorbo, bade amrar desh taki zaibogi.”
11 Teu tara shordar lagaila erare maria-doria zur-zulum ḳoria ḳam ḳoranir lagi. Era Feraunor foshol raḳar lagi Pitum ar Ramashesh namor duiṭa ṭaun-o banaila.
12 Oile erar ufre zoto beshi zur-zulum ḳora oilo, era-o oto beshi baṛila ar sitrila. Erlagi Mishori oḳole Boni Israilre kub ḍoraigela.
13 Ḍoraia eraredi aro ḳoṭin ḳam ḳoraila.
14 Maṭi kam, iṭor ḳam ar ḳetor maze ḳoshṭor ḳam ḳoraia erar zanre titta banaililo. Ar tara zur-zulum ḳoria nisṭur-fashanor laḳan ḳam ḳoraito.
15 Bade Mishoror bashshae Shifra ar Fuah namor duizon Ibrani dai beṭire hukum dila,
16 “Tumra Ibrani beṭintor dai girit gia, itar fuain foyda oile-u marilaio, ḳali fuṛintore zita rakio.”
17 Oile hi dai beṭinte Allare ḍoraita gotike, Mishori bashshar hukum na mania fuaintore-o zita raḳta.
18 Teu bashshae erare nia zikaila, “Ita ḳam ḳene ḳorlae? Fuaintore ḳene zita raḳlae?”
19 Tara zuaf dila, “Ibrani beṭin Mishori beṭintor laḳan nae, tara bout bolala. Daibeṭi tarar ḳasat zaibar age-u tarar hurutta foyda oizae.”
20-21 Ou duio beṭie Allare ḍoraita ḳori, Allae rohomot ḳoria tarare-o aolad dila. Ar Boni Israil-o aro beshi kori baṛia kub shoktiman oila.
22 Ita dekia Feraune nizor proza oḳolre hukum dila, “Ibrani oḳlor kunu fuain oile-u tumra Nil nodo falai dio, ḳali fuṛintore zita rakio.”