Hozrot Isʼhak (a:) (24:1—26:35)
24
Hozrot Isʼhak (a:)or bia
1 Ibrahim i shomoy kub murobbi ar zaoagir foti oigesoin. Mabude tanre hoḳolbae tone borkot nazil ḳorsla.
2 Ar tan ḳas gulam, baṛir furan ze gulamor ufre tan hoḳoltar bar deoa asil tare ḳoila, “Tumar atḳan amar urator tole harao.
3 Ami tumare asman-zominor malik Alla Mabudor name ḳosom ḳoraiar, ami ze Kenani oḳlor maze takiar, tarar kunu fuṛire amar fuar bou banaia tumi anio na.
4 Tumi amar desho gia, amar fua Isʼhakor lagi amar ḳesh-kuṭumor maz taki egu ḳoina saia anbae.”
5 Ou hi gulame tanre ḳoila, “Zudi kunu fuṛie amar loge i desho aite razi na oin, taile ze desh saṛia afne aisoin, afnar fuare ami hono loia zaitam ni?”
6 Tain ḳoila, “Ḳobordar! Tumi amar fuare kunumonte-u hino loia zaio na.
7 Ze asmani Alla Mabude amare, amar bafor baṛi ar zonom maṭi tone bar ḳoria anchoin, tain amar loge bat-soal ḳori kosom ḳoria ḳoisoin, i deshḳan tain amar oarish oḳolre diba. Tain tumar age-u tan firistare hono faṭaiba, zate amar fuar lagi tumi hon tone egu ḳoina antae faro.
8 Zudi kunu fuṛie tumar loge aite razi na oy, te amar i kosom taki tumi kalas; ta-o amar fuare tumi kunu laḳan-u hino loia zaio na.”
9 Ou hi gulame tan munib Ibrahimor urator tole at haraia oula ḳosom ḳorla.
10 Bade hou gulame tan munibor uṭor fal taki doshṭa uṭ loila. Ar munibor bala bala zinish oḳol loia, Oram-Nohoroyim deshor zeno Nahur taḳta hobaedi roana oila.
11 Ar hainja bala zebla beṭinte fani anat bar oin, ou shomoy hi gulame ṭaunor bare ek kuar ḳasat tan uṭ oḳolre toila.
12 Toia ou dua ḳorla, “O Mabud, amar munib Ibrahimor Alla, aroz ḳori, aiz amar samne kamiabi zair ḳoro, ar amar munib Ibrahimre meherbani koro.
13 Deḳo, i ṭaunor fuṛinte fani neoat aira ar ami ino kuar ḳasat ubai roisi.
14 Te ou fuṛintor maze ami zare ḳoimu, ‘Afnar ḳoyla lamaia amare tuṛa fani kaoaukka’, er zuafe zudi hou fuṛie ḳoin, ‘Afne fani kaukka ar afnar uṭ oḳolre-o ami fani kaoaimu’ taile ou fuṛi-u zanu tumar gulam Isʼhakor lagi tumar fosondor fuṛi oin. Teu ami buzmu, tumi amar munibre meherbani korlae.”
15 Tan dua shesh na oite-u Botuelor fuṛi Rebekae ḳaḳo ḳoyla loia ṭaun taki bar oia aila. Ou Botuel oila Ibrahimor bai Nahuror bibi Milkar fua.
16 Rebeka asla kub shundori, abiati, shoti nari. Tain kua taki koyla boria zebla uṭia aira,
17 ou shomoy-u Ibrahimor gulame douṛaia tan gese gia ḳoila, “Doya ḳori afnar ḳoyla taki amare tuṛa fani kaoaukka.”
18 Rebekae ḳoila, “Huzur, fani kaukka.” Ou ḳota ḳoia-u tain zoldi kori koylaṭa ḳaḳo tone ato ania fani kaite dila.
19 Fani kaoaibar bade Rebekae tanre ḳoila, “Ami afnar uṭ oḳolre-o tarar fias miṭaia fani kaoaimu, tara feṭ boria fani kaiba.”
20 Ḳoia-u tain zoldi kori fanir gamlat ḳoylar fani ḍalia hirbar douṛaia kuar gese gela. Ar hoḳol uṭre fani tuli dila.
21 Mabude tan i sofor kamiab ḳorsoin ki na iṭa zanar lagi hi gulame nirobe Rebekar bae sai roila.
22 Uṭ oḳole fani kaia harle, tain ada tolar eḳṭa shunar naḳor not ar dui ato dosh tolar duiṭa shunar bala Rebekare dia zikaila,
23 “Afnar babar nam kita? Afne ḳoukka sain, afnar bafor baṛit amrar rait taḳar zaga oibo ni?”
24 Rebekae ḳoila, “Amar babar nam Botuel. Dadar nam Nahur ar dadir nam Milka.
25 Te afnar uṭor ḳanir lagi amrar baṛit bout ḳer-busi ase ar roibar zaga-o ase.”
26 Ou hi gulame Mabudor soizda ḳoria ḳoila,
27 “Hokkol proshongsha Mabudor, zein amar munib Ibrahimor Alla. Tain amar malikre tan deoa oada raḳte ar imandari deḳaite faurisoin na. Tain amare-o fot sinaia amar munibor kuṭmor baṛit loia aisoin.”
28 Rebekae douṛaia gia tan maʼr baṛir hoḳolre ita zanaila.
29 Rebekar eḳ bair nam asil Labon. Ou Labone douṛaia kuar ḳasat aila enre deḳta ḳori.
30 Bonir ator bala ar naḳor not dekia, ar hi manshe zeta ḳoise ita hunia, tain aia deḳla, manushṭa kuar ḳandat tar uṭor gese ubai roise.
31 Labone tanre ḳoila, “O Mabudor rohomotor manush, aukka. Bare ubai roisoin ḳene? Ami afnarar lagi gor, ar uṭor lagi zaga zuit ḳoria aisi.”
32 Ou hi gulame tarar baṛit gia uṭ oḳlor gaiṭ lamaite-u, Labone ḳer ar busi ania dila. Tane ar tan logor hoḳolre at-fao doar fani-o dila.
33 Bade tan samne ḳani deoa oilo, teu tain ḳoila, “Ami kitar lagi ino aisi, ita na hunaia ḳani kaitam nae.” Labone ḳoila, “Te ḳoilaukka.”
34 Ou tain ḳoila, “Ami Ibrahimor gulam.
35 Amar malikre Mabude bout borkot nazil ḳorsoin, aiz tain bout doni-mani. Mabude tanre bout goru-meṛa, uṭ-gada, shuna-rufa, ar bandi-gulam disoin.
36 Tan bibi Sayrar murobbi boyosho munibor eḳzon fua oisoin, ar ou fuare-u tain, tan hoḳolta dilaisoin.
37 Tain amare ḳosom ḳoraia ḳoisoin zen, tain ze desho boshot ḳorra, hi Kenan deshor kunu fuṛire zate tan fuar bou na banai.
38 Er bodla tan bafor ar tan ḳandanor baṛit gia tan fuar lagi eḳzon ḳoina saia nei.
39 Ou ami amar munibre ḳoilam, ‘Zudi kunu fuṛi amar loge aite razi na oin?’
40 Tain ḳoila, ‘Mabud, zanre ami kezmot ḳori, tain-u tan firistare faṭai diba, zate tumar sofor kamiab oy. Ar tumi amar nizor bongsho ar amar bafor ḳandan tone, egu fuṛire amar fuar lagi saia anbae.
41 Tarar hino gele zudi tara kunu fuṛire na dein, taile tumi amar i kosom taki kalas faibae.’
42 “Ou aiz ami kuar gese aia dua ḳorlam, ‘O Mabud, amar munib Ibrahimor Alla, tumi zudi amar i sofor kamiab ḳoro taile,
43 deḳo, ami ou bora kuar gese ubai roisi, ar kunu fuṛie ono fani neoat aile ami koimu, ḳoyla taki amare tuṛa fani kaoao.
44 Ar zudi tai koy, ‘Tumi-o fani kao ar tumar uṭ oḳolre-o ami fani tulia dimu’, taile ou fuṛi-u zanu amar munibor fuar lagi tumar fosond ḳora fuṛi oy.’
45 “Amar dua shesh na oite-u deki, Rebekae ḳoyla ḳaḳo loia kuat aira fani tulta. Fani tular bade ami koilam, ‘Doya ḳoria amare tuṛa fani kaoaukka.’
46 Tain zoldi kori kaḳo tone ḳoyla lamaia amare ḳoila, ‘Ou nein, fani kain. Ami afnar uṭ oḳolre-o fani kaoaimu.’ Teu ami fani kailam, ar tain amar uṭ oḳolre-o fani kaoaila.
47 Bade ami tane zikailam, ‘Afne ḳar fuṛi?’ Tain ḳoila, ‘Ami Botuelor fuṛi, amar dadar nam Nahur ar dadir nam Milka.’ Ou ami tan naḳo not ar ato bala findaia dilam.
48 Bade ami Mabudor soizda ḳorlam. Ar zein amar munib Ibrahimor Alla, hou Mabudor shukur adae ḳorlam, tain-u amare ṭik fote salaia anchoin zate ami amar munibor batizire, tan fuar lagi tukaia fai.
49 Teu oḳon afnara amar munibor bae dorod ar insaf ḳorba ni, ḳoukka. Zudi na ḳoroin ta-o ḳoukka, zate ami ḍaine-baue zaitam fari.”
50 Ou Labon ar Botuele ḳoila, “Goṭona to Mabud taki-u oise. Oḳon amrar bala-bura matar kunta-u nae.
51 Ou deḳoukka, Rebeka to ono ase, te Mabudor hukum moto afnar munibor fuar bou banaibar lagi ere loia zaita farba.”
52 I mat hunia Ibrahimor gulame Mabudor soizda ḳorla.
53 Erbade tain shuna-rufar goyna-gaṭi ar ḳafoṛ-sufoṛ bar ḳoria Rebekare dila, er loge Rebekar ma-baire-o bout dami dami ufohar dila.
54 Bade tain ar tan logor hoḳole ḳaoa-daoa shesh ḳoria hoḳano-u rait ḳaṭaila. Biane gum taki uṭia tain ḳoila, “Amar munibor gese zaoar lagi amare bidae dilaukka.”
55 Teu Rebekar ma ar baie ḳoila, “Fuṛigu aro doshḳan din amrar gese taḳouk, bade zaibone.”
56 Ou hi gulame tarare ḳoila, “Mabude zebla amar i sofor kamiab ḳorsoin, taile amare deri na ḳoraia bidae dilaukka, amar munibor gese zaigi.”
57 Era ḳoila, “Amra taile fuṛire samne ania zikailai.”
58 Ar Rebekare ḍakia ania zikaila, “Tumi kita tan loge zaibae ni go?” Tain ḳoila, “Aichcha, zaimune.”
59 Ou tara Ibrahimor gulam ar tan logor manshor loge tarar boin ar tan bandi beṭire bidae dila.
60 Ar Rebekare dua ḳoria ḳoila, “Boin go, tumi laḳ laḳ aolador ma o. Tumar aolade dushmon oḳolre gail ḳorouk.”
61 Rebeka ar tan bandi oḳole toiar oia uṭor ufre soṛia, Ibrahimor gulamor ḳore oia roana dila. Ou laḳan hou gulame Rebekare loia bar oila.
62 Isʼhak i shomoy Negebo taḳta. Tain Ber-Lohoy-Rui namor zaga tone firot aila.
63 Eḳdin biali bala tain bondedi aṭat bar oila. Aḳta-u souk tulia saia deḳla, ḳoyṭa uṭ aira.
64 Rebekae-o duroi tone Isʼhakre dekia-u uṭor ufor taki lami gela.
65 Ar hou gulamre zikaila, “Ou zein bondor mazedi amrar bae aira, ein ḳe?” Gulame ḳoila, “Ein to amar munib.” Ou Rebekae burkar forda lamai dila.
66 Ar hi gulame zeta zeta ḳoria aisoin, hoḳolta Isʼhakre zanaila.
67 Isʼhake tan ma Bibi Sayrar tambut Rebekare loia gia tane bia ḳorla. Ar tanre maya ḳorla. Tan maʼr moutor bade, Rebekar mayae-u tan zano shanti faisla.