1 Bibi Sayra eḳ-sho shataish boros basila; Allae tane otodinor hayati disla. 2 Bade Kenan deshor Kiriot-Orbo mani Hebrono inteḳal ḳorla. Ar Ibrahime tan lagi bout ḳanda-ḳaṭi ar ahazari korla. 3 Heshe tan murda bibir ges tone horia gia hou deshor Hiṭṭi oḳolre ḳoila, 4 “Ami to bideshi musafir oia afnarar ono roiar. Meherbani kori kobrostan banaibar lagi amare tuṛa zomi deukka, ami amar samne tone amar murdare dafon ḳori.” 5 Hiṭṭi oḳole tane ḳoila, 6 “Huzur, amrar ḳota hunoukka. Afne to amrar maze Allar mohobbotor buzurg. Amrar gurustanor maze zeno fosond oy, ono-u afnar murdare dafon ḳoroukka. Tanre dafon ḳorar lagi amrar ḳeu-u nizor banail ḳoybor saṛte omot ḳorto nae.” 7 Ou Ibrahime ubaia hinor Hiṭṭi oḳlor samne mata nuaia ijjot ḳori koila, 8 “Amar bibire ino dafon ḳorat zudi afnarar kunu omot na taḳe, te doya ḳori amar arziḳan hunoukka. Afnara amar oia Shuhoror fua Ifrunre ḳoukka, 9 tan zominor hesh matat Moḳfela ze guha ase, oḳanta zenu ḳobrostan bananir lagi tain fura dam loia amar gese besilain.” 10 Aro Hiṭṭi oḳlor loge i shomoy Ifrun-o hono boat asla. Ibrahimor mator zuafe hou Hiṭṭi oḳlor samne Ifrune ḳoila, 11 “Na, na, afne doya ḳori amar matḳan hunoukka. Ami hoḳlor samne-u i zomi ar guha afnare dilailam, afnar murdare dafon ḳorilain.” 12 Teu Ibrahime hirbar hinor hoḳlor samne mata nuaia, 13 hi deshor hokkolre hunaia Ifrunre ḳoila, “Hunoukka, zomiḳanor dam ami dilai. Afne-o zomiḳanor dam neukkagi, bade amar murdare ono dafon ḳormu.” 14 Ifrune tanre zuaf dila, 15 “Huzur, amar ḳota hunoukka, ou zomiḳanor dam oilogi sair-sho tola rufa, te afnar-amar lagi ita kunta-u nae. Afnar murdare ḳoybor dilaukka.” 16 Ou Ibrahime Ifrunor ḳota mania Hiṭṭi oḳlor samne tain, Ifrunor saoa dam mafik, faikari mafe sair-sho tola rufa tanre mafia dila.

17 Ou laḳan Momri ṭaunor gese Moḳfelat Ifrunor ze zomin asil hou zomin ar honor guha ar zominor sairobae zoto gas-gasali asil, 18 ita hoḳolta-u hinor Hiṭṭi oḳol ar ṭaunor mukor hoḳlor samne, Ibrahimor malikanae ailo. 19 Bade Ibrahime Kenan deshor Momri ṭaun ba Hebronor Moḳfelar guhat tan bibi Sayrare dafon ḳorla. 20 Ou laḳan Moḳfelar ou guha shoho asta zominḳan gurustanor lagi, Hiṭṭi oḳlor at tone Ibrahimor ato ailo.