20
Geraror bashshae Bibi Sayrare nila
1 Ar Ibrahime hin tone Negebor morubumir bae gia Kadesh ar Shuror mazḳano Gerar desho roila.
2 Hono hirbar tan bou Sayrare nizor boin ḳoia forisoy dila. Erlagi hinor bashsha Abimalike manushdi Sayrare tan gese nilagi.
3 Ar rait Allae Abimalikre kuabe ḳoila, “Huno, ou ze beṭire tumi loia aiso, tair to zamai ase, erlagi tumi oḳon moutor muko.”
4 Abimalik oḳono Sayrar gese gesoin na. Erlagi tain ḳoila, “O Malik, ni-oforadi zati oile-o kita afne marilaita ni?
5 Ou manushṭae to nize-u ḳoise, ein tar boin. Ar ou beṭie-o ḳoisoin na ni, ein tan bai? Ami to shorol mone ni-oforadi ate i kam ḳorsi.”
6 Allae kuabe tanre ḳoila, “Ami-o zani, tumi shorol mone i kam ḳorso. Erlagi tumare gunar ḳam taki ami dom loailam. Taire soite dilam na.
7 Oḳon tumi tan bibire tan gese firot dilao. Tain eḳzon nobi. Tain tumar lagi dua ḳorba, teu tumar zan basbo. Ar zudi taire firot na deo, te zanilio, tumi ar tumar hoḳol-u nisoy morbae.”
8 Ou Abimalike fozore uṭia tan nizor uzir-nazir oḳolre ita hoḳolta ḳoila, ita hunia tara kub beshi ḍoraila.
9 Bade Abimalike Ibrahimre anaia ḳoila, “Afne amrar loge ita kun zator bebohar ḳorla? Ami afnar gese kita dush ḳorsi zen, afne amare ar amar bashshaire oto boṛo gunar daye falaila? Afne to amar loge ita oinnae ḳam ḳorla.”
10 Abimalike aro ḳoila, “Afne kita dekia ila ḳam ḳorla?”
11 Ibrahime zuaf dila, “Ami mone ḳorslam, i zagar manshor Allar bae kunu ḍor-boy nae, erlagi amar bour lalose hoyto tara amare kun ḳorba.
12 Ar tai hasau amar boin lage, ḳaron tai amar haton goror boin, ar oḳon amar bou.
13 Allae zebla amare amar bafor baṛi tone bar ḳori anla, ou shomoy ami taire ḳoislam, ‘Tumi amare ou mayaḳan ḳorio, amra zeno-u zai na ḳene, tumi amare tumar bai koia forisoy dio.’ ”
14 Bade Abimalike ḳotoṭa meṛa-goru, bandi-gulam Ibrahimre dila ar tan bibi Sayrare-o firot dilaila.
15 Abimalike ḳoila, “Deḳoukka, amar asta deshṭa-u afnar samne foṛi roise, te afnar zeno fosond ono-u roukka.”
16 Tain Sayrare ḳoila, “Deḳoukka, ami afnar baire eḳ azar rufar ṭeḳa dilam. Ar afnar ijjotor hoḳol bisaror foysala oilo.”
17 Bade Ibrahime Allar gese dua ḳorla, ar Allae Abimalik, tan bou ar tan bandi oḳolre shifa ḳorla ar tarar hurutta-o oila.
18 Ḳaron Ibrahimor bibi Sayrar lagi Mabude Abimalikor baṛir hoḳol beṭintor hurutta oa bond ḳori disla.