Hozrot Ibrahim (a:) (11:1—23:20)
11
Babil minar
1 Hi zomanat asta duniait ḳali eḳ bashae matta, ar tarar buli oḳol-o eḳlaḳan-u asil.
2 Tara fubedi aguaia zaite zaite Shinar deshor eḳ homan zaga faia hoḳano-u boshot ḳorla.
3 Tara eḳe-oinnore ḳoilo, “Ao, amra iṭ banaia aguindi zalai.” Ḳoia-u tara fattoror bodla iṭ ar sun-shurkir bodla tartel lagailo.
4 Tara aro ḳoilo, “Ao, amrar nizor lagi eḳṭa shohor banai, ar oula eḳṭa gor-o banai, zeḳṭar minar gia asman lagal faibo. Teu amrar nam-o oibo ar amra duniait sitritam-o nae.”
5 Manshe ze usa gor ar shohor banaira ikṭa deḳat Mabud lami aila.
6 Ar ḳoila, “Era eḳ zator manush, erar mat-ḳota-o eḳ; erlagi tara ou ḳamor maze at dise. Nizor motlob hasilor lagi era ar kunu bada-u manto nae.
7 Te ao, amra lamia gia tarar bulir maze gulmal lagai dei, zate tara eḳzone aroḳzonor mat buzto na fare.”
8 Erbade Mabude hou zaga taki tarare asta duniait sitrai dila. Ar tarar hou shohor bananir ḳam-o bond oigelo.
9 Ou ḳarone hou zagar nam oilo Babil [mani, gulmal], hoḳano-u Mabude hara duniair bulir maze gulmal lagai disla. Hoḳan taki-u tain tarare asta duniait sitrailila.
Hozrot Ibrahim (a:)or baf-dadain
10 Ou oilo Shamor ḳandanor boyan. Banor dui boros bade Shamor boyosh zebla eḳ-sho boros, ou shomoy tan fua Arfaksador zonom oilo.
11 Arfaksador zonmor bade Sham aro fas-sho boros basia asla. Er maze tan aro fua-fuṛin oisla.
12 Arfaksador faytish bosoror shomoy tan fua Shaleḳor zonom oilo.
13 Shaleḳor zonmor bade tain aro sair-sho tin boros basia asla. Er maze tan aro fua-fuṛi oisla.
14 Shaleḳor tish boros boyoshor shomoy tan fua Aberor zonom oilo.
15 Aberor zonmor bade Shaleḳ aro sair-sho tin boros basia asla. Er maze tan aro fua-fuṛi oisla.
16 Aberor soutish bosoror shomoy tan fua Falezor zonom oilo.
17 Falezor zonmor bade Aber aro sair-sho tish boros basia asla. Er maze tan aro fua-fuṛi oisla.
18 Falezor tish boros boyoshor shomoy tan fua Raur zonom oilo.
19 Raur zonmor bade Falez aro dui-sho noy boros basia asla. Er maze tan aro fua-fuṛi oisla.
20 Raur bottish bosoror shomoy tan fua Saruzor zonom oilo.
21 Saruzor zonmor bade Rau aro dui-sho shat boros basia asla. Er maze tan aro fua-fuṛi oisla.
22 Saruzor tish bosoror shomoy tan fua Nahuror zonom oilo.
23 Nahuror zonmor bade Saruz aro dui-sho boros basia asla. Er maze tan aro fua-fuṛi oisla.
24 Nahuror untish bosoror shomoy tan fua Tareḳor zonom oilo.
25 Tareḳor zonmor bade Nahur aro eḳ-sho unnish boros basia asla. Er maze tan aro fua-fuṛi oisla.
26 Tareḳor shottoir bosoror shomoy tan fuain Abram (tan bador nam Ibrahim), Nahur ar Haronor zonom oisil.
27 Ou oilo Tareḳor ḳandanor boyan. Tareḳor fuar nam asil Abram, Nahur ar Haron. Ar Haronor fuar nam Lut.
28 Haron tan baba zinda taḳte-u, tan zonom-maṭi Babil deshor Ur ṭauno mara gesla.
29 Abram ar Nahur duizone bia ḳorsla. Abramor bour nam asil Sara. Ar Nahuror bour nam Milka. Milka ar Iska asla Haronor fuṛin.
30 Oile Sarar kunu fua-fuṛi asil na, tain niaoladi asla.
31 Tareḳe Abram, Lut ar Sarare loia Kenan desho zaoar lagi Babil deshor Ur ṭaun taki roana oila. Abram oila Tareḳor fua, Haronor fua Lut oila Tareḳor nati, ar Sara oila Tareḳor fua Abramor bou. Foyla tara Haran name eḳ ṭauno gela ar hoḳano boshot ḳorla.
32 Tareḳ dui-sho fas boros boyosho Haran ṭauno mara gela.