22
Allar loge milonor usillar shorto
(4) Ḳeti-furonor niom
1 “Ḳeu kunu manshor goru ba meṛa-sagol suri koria ania zudi besilae ba zobo ḳorilae, te ek gorur bodla fasgu, eḳ meṛa ba sagolor bodla sairgu firot dite oibo.
2-4 Sure tar surir malor ḳeti-furon dite oibo, oile tar zudi keti-furon dibar kunu takkot na taḳe, te tare besia er ḳeti-furon adae ḳorte oibo. Suri kora goru-gada ba meṛa-sagol zudi suror gese zita faoa zae, taile he ita egur bodla dugu firot dite oibo.
“Kunu sure zudi surit gia goro hamaibar bala dora ḳailae ar zoḳom oia morizae, taile tare marar lagi marra zon dayi oito nae. Oile shuruz uṭar bade zudi dinor bala ila oy, te i kunor lagi he dayi oibo.
5 “Ḳeu zudi tar goru-sagol nizor bagano ba ḳetor maze raḳat gia saṛi dey, ar itae gia manshor ḳetor foshol ḳailae, te tar nizor ḳetor hoḳol taki bala ongsho bodla dia ḳeti-furon dite oibo.
6 “Kunu zaga taki aguin lagia zudi zuf-zongol zole, ar bade ou aguin gia ḳeuror ḳetor maze banda muiṭ, ṭeki ba asta ḳet zoli zae, te aguin zegie zalaisil, he itar ḳeti-furon dibo.
7 “Ḳeu zudi aroḳzonor gese mal-samana ba ṭeḳa-foysha amanot toy, ar amanot-daror gor taki ita suri oizae, te ou sur dora foṛle, sure er ḍabul firot dibo.
8 Oile sur dora na foṛle, hi goror malike nize-u ita lukaise ni, oḳan zanar lagi tare Allar dorbaro azir ḳorbae.
9 “Aroḳ zonor doḳolo ase, oula kunu goru-gada, meṛa-sagol, finnor ḳafoṛ ba zekunu arail samana dekia ḳeu zudi mono ḳore iṭa tar mal, taile iṭar salishir lagi tara duiozon gia Allar dorbaro azir oibo. Allae zare dushi shaibosto ḳorba, he tar birudi zonre er ḍabul firot dibo.
10 “Ḳeu zudi tar goru-gada, sagol-meṛa ba oinno kunu foshure kunu girostor gese raḳat dey, ar ogu morizae, zoḳom oizae ba araizae, oile er kunu shakki na mile,
11 te ou giroste nize-u zen ita ḳorse na, iṭa he Mabudor samne gia ḳosom ḳoria miṭ-maṭ ḳorbo. I foshur malike-o ikan mante oibo, tain kunu ḳeti-furon faita nae.
12 Oile i girostor ges taki zudi iṭa suri oizae, te malike ḳeti-furon faibo.
13 Zudi kunu zongli zanuare doria igure marilae, taile er formanor lagi ogur fara-siṛa ṭukrain ania deḳani lagbo. Teu er kunu ḳeti-furon lagto nae.
14 “Ḳeuror ges taki kuzia ana kunu foshu zudi malikor aforḳe zoḳom oy ba morizae, te zein kuzia anchoin, ein er ḳeti-furon diba.
15 Oile malikor samne-u zudi oula oy, te ḳeti-furon lagto nae. I foshu zudi ṭeḳa dia baṛa ḳori ana oy, te ou baṛar ṭeḳa-u oibo er ḳeti-furon.
Allar loge milonor usillar shorto
(5) Shomazor befare
16 “Biar aḳt oise na, oula kunu shoti fuṛire ḳeu zudi misa matia ania tair loge zina ḳorilae, taile hou beṭae fuṛir bafre zorimana dia ou fuṛire bia ḳorte oibo.
17 Oile fuṛir bafe zudi tar fuṛire i fuar gese bia dite kunumonte-u razi na oy, ta-o i zorimana dite oibo.
18 “Kunu zadugir beṭire tumi zita rakio na.
19 “Kunu foshur loge ḳeu zina ḳorle, tare nisoy zane mara oibo.
20 “Ḳali Mabud saṛa dusra kuntar name zudi keu kunu boli-foshad dey, te tare-o shesh ḳorilte oibo.
21 “Kunu bin-deshi manshor loge bad bebohar ḳorio na, tare zulum ḳorio na. Mono rakio, tumra-o eḳ shomoy Mishor desho musafir aslae.
22 “Kunu ṛaṛi beṭire ba kunu etim huruttare duk dio na.
23 Tarare duk dile tara zudi kande, te i kandon nisoy ami kobul ḳormu.
24 Ete amar gusa oibo aguin borabor. Tumra zuddot foṛia morbae, tumrar bou-o ṛaṛi oibo, tumrar huruttain-o oula etim oiba.
25 “Tumra zudi amar kunu obabi bondare ḳoroz deo, taile shudkuror laḳan tar ges taki shud nio na.
26 Ḳeuror gotror saddor bondok raḳle, shuruz ḍubar age-u tar saddor firot dilaio.
27 Ḳaron uṛibar lagi oṭa-u tar eḳmatro shombol. Ikan nilegi he kita uṛia hutibo? Huno, he zudi amar gese ḳande, te ami to rohmanur rohim, ami tar ḳandon hunmu-u.
28 “Tumi Allar birudde matio na, tumar kunu bisarok-salishre-o boddua dio na.
29 “Tumrar ḳetor foshol ba anguror shorbotor ze baṭ amare dibar ḳota, amar i baṭ dite deri korio na. Tumra hoḳlor boṛo fuain amare dilaibae.
30 Tumrar goru-basur ar sagol-meṛar lagi-o ou eḳ shoman hukum. Itar hoḳol boṛo meda baichchain shatdin forzonto tarar maʼr gese roiba, aṭ dinor din amare dilaibae.
31 “Tumra-u oibae amar fak-fobitro bonda. Zongli zanuare maria falaise, ila kunu zandaror gust tumra ḳaio na; ita kukurre ḳaoaio.