21
Allar loge milonor usillar shorto
(2) Ḳorida bandi-gulamor befare
1 Mabude Musare aro ḳoila, “Tumi Boni Israilre amar ou niom-ḳanun oḳol zanao.
2 “Tumra zudi kunu Ibrani beṭare ḳorid ḳoria gulam banao, te ou gulame soy bosor tumrar gulami korbo, bade shat bosoror bala tar ges taki kunta na nia, tare emne-u azad ḳori dibae.
3 He zudi eḳla tumrar gese ae te eḳla-u zaibo; ar zudi boure loge loia ae, te bou loia zaibo.
4 Oile tar munibe zudi tare bia ḳorai taḳe, ar tar kunu hurutta-murutta oin, taile i beṭi ar huruttain munibor gese-u roiba; he ḳali eḳla azad oibo.
5 Ar hi gulame zudi saf ḳori koy zen, he tar munib ar tar bou-baichchar mayae, erare saṛia zaito nae,
6 te i malike tare loia Allar dorbaro azir oibo. Tare duaror ḳofaṭ ba soukaṭor loge uba ḳoria munibe shik dia tar ḳano fuṛ ḳorbo. Teu he hara zindegibor munibor gulamit roibo.
7 “Kunu manshe zudi bandigirit dibar lagi tar nizor fuṛire besilae, te gulam oḳol zela soy bosor bade munibor baṛi taki emne-u azad oizain, ou fuṛi to ila azad oito nae.
8 Tair munib zudi tair ufre kushi na oin, te ṭeḳa-foyshar bodla taire azad ḳori dite oibo. Taire dusra kunu zatir manshor gese besibar eḳtiar nai, ḳaron munibe to tan nizor dayitto adae ḳorsoin na.
9 Oile munibe zudi tan nizor fuar lagi taire fosond ḳoria nein, te taire afon fuṛir laḳan hoḳol ḳemota dite oibo.
10 Munibe zudi ou bandire bia ḳorar bade, dusra kunu ḳoinare bia ḳore, ta-o i bandir kuraki, ḳafoṛ-sufoṛ ar shorilor faona hok taire deoa lagbo.
11 He zudi ou tino hok furafur adae na ḳore, te i fuṛire eḳdom bina foyshae azad ḳori dite oibo.
Allar loge milonor usillar shorto
(3) Mara-marir shaza
12 “Mair ḳaia zudi kunu manush morizae, te zegie tare marse, tare-o zane mara oibo.
13 Oile he nize zudi kun na ḳorar niote mare, aḳta kunu ḳarone goṭizae ba ami Allar morzie ita oy, te ou kuni zon gia ola kunu zagat bagito farbo, ze zagar ḳota ami tumrare ḳoimu.
14 Ar ḳeu zudi zania-hunia ichcha ḳori keurore kun ḳoria, bade aia amar kurbani kanar gese-o asroy loy, ta-o hon taki doria nia tare zane mara oibo.
15 “Ze manshe tar afon ma ba bafor ufre at tule, tare nisoy zane mara oibo.
16 “Ḳeu zudi kunu manshore suri koria ania besilae, ba ou manshore tar gese faoa zae, te tare nichchoy zane mara oibo.
17 “Ze manshe afon ma ba bafre gali-galaz ḳore, tare-o nichchoy zane mara oibo.
18 “Kunu manshe ḳaijjat lagia zudi logor zonre ṭushi ba fattordi mare, i mair ḳaia ou zon na morle-o bisnat hutia foṛono taḳe,
19 heshe uṭia laṭi bor dia sola-fira ḳorar zorur oy, te zegie tare marse tare zane mario na. Ḳali hou zonor ḳam-ḳazor ḳeti ar tar shullo-ana daoai koros dite oibo.
20 “Ḳeu zudi tar ḳorida gulam-bandire laṭi dia mare ar mair ḳaia ogu morizae, te ere shaza dite oibo.
21 Oile mair ḳaoar dui-eḳdin bade zudi basia roy, te kunu shaza deoa lagto nae, ḳaron ou gulam to tar nizor samana asil.
22 “Mara-mari korat lagia zudi aḳta ḳeu kunu beṭire mare ar tair feṭor baichcha nosṭo oizae, oile ar kunu ḳeti na oy, te ou beṭir zamair dabi ar bisari-salishor bibechona mafik ere ḳeti-furon dite oibo.
23 Oile zudi tair aro kunu ḳeti oy, taile ere ou laḳan shaza dibae:
24 zanor bodla zan, souḳor bodla souk, dator bodla dat, ator bodla at, faor bodla fao,
25 zalanir bodla zalani, zoḳomor bodla zoḳom, dagor bodla dag dite oibo.
26 “Ḳeu zudi tar ḳorida gulam ba bandir kunu sokut marae souk nosṭo oizae, te ou souḳor bodla he i gulamre azad ḳori dite oibo.
27 Zudi maria er dat falai dey, ta-o ere azad ḳori deoa lagbo.
28 “Kunu gorue gutaia zudi kunu beṭa ba beṭire marilae, te gorur malikre kunu shaza deoa lagto nae. Ḳali hi gorure fattordi iṭaia marilite oibo, i gorur gust ḳeu ḳaito farto nae.
29 Oile i gorur zudi hamesha oula gutanir ḳaichchot taḳe, ar hi malikre hushiar ḳorar bade-o he iṭare aṭḳae na, ermaze i gorue kunu beṭa ba beṭire marilae, te i gorure fattor maria marilite oibo, ar tar malikre-o marilite oibo.
30 Zudi i malikor gese kunu ḳeti-furon saoa oy, taile he ou zorimana dia nizor zan basaito farbo.
31 I gorue zudi kunu huruttare gutaia marilae, taile erlagi-o ou homan niom oibo.
32 Kunu gorue zudi keuror gulam ba bandire gutaia marilae, taile gorur malike hi gulamor malikre tish tola foriman rufa dite oibo ar hi gorure-o fattor mari marilite oibo.
33 “Ḳeu zudi kunu gator muk kulia toy ba gat kudia igur muk guria na toy, ar i gator bitre kunu goru ba gada foṛizae,
34 taile gator malike foshur malikre ḳeti-furon dite oibo. Oile i mora foshu faibo gator malike.
35 “Ḳeuror gorue zudi aroḳzonor gorure gutaia marilae, te hou zita gorure besia, er dam ar mora gorur dam-o era duiozone homan homan ḳori baṭia niba.
36 Oile ag taki zudi zana-huna taḳe zen, i gorue ola gutae, ar tar malike tare na aṭḳae, te gorur bodla goru dite oibo, bodla deora zone ou mora goruṭa faibo.