3
Bashon deshor bashsha Uzre araila
1 Hozrot Musae Boni Israilre aro ḳoila, “Hishbon desh taki amra Bashon desho zaoar fote roana oilam. Bashonor bashsha Uze ḳobor faia zuddo ḳorar lagi tar hoḳol sifai dol loia Idri ṭauno ailo.
2 Ar Mabude amare ḳoila, O Musa, i bashshare tumi ḍoraio na. Huno, ami tare, tar asta deshre, tar sifai dolre tumar ato tulia dilaisi. Tumi Hishbon desho Amuri zatir bashsha Sihunor ze dosha goṭaiso, ogure-o oula ḳorio.
3 “Ou nomunae amrar Mabud Allae Bashon deshor bashsha Uzre, tar hoḳol manshore amrar ato shomzai dila. Amra-o ita hokkolṭire binash ḳorlam, kunugure zinda raḳsi na.
4 Amra tar deshor hoḳol gau-geram, ṭaun-bondor doḳol ḳorlam. Tarar shaiṭ ḳan ṭaun-u doḳol ḳorillam, kunta bad roilo na. Asta Orgub elaḳa, mani Bashonor bashsha Uzor fura bashshai amrar doḳolo nilamgi.
5 Ou ṭaun oḳol-o usa usa oal dia baunḍori kora asil, itar geiṭo asil boṛo boṛo kil. Ar baunḍori saṛa-o bout gau-geram asil.
6 Amra hoḳol ṭaun ar gau-geramre ekkebare binash ḳorsi. Age Hishbonor bashsha Sihunor ze dosha goṭaisi, oḳon Bashon deshor beṭain-beṭin, huruttain, hoḳol gau-geram ar ṭaunre-o eḳoi laḳan binash ḳorsi.
7 Oile tarar hoḳol foshur fal ar gonimotor mal-samana amra loia aisi.
8 “Amra ou shomoy Zordan gangor fub faror Amuri zatir duio bashshar doḳolor, Ornon ḳal taki Hormun faṛ forzonto ḳobza ḳorslam.
9 (Sidonor manshe ou Hormun elaḳare Sirion ḳoia ḍaḳoin, ar Amuri zatie ḳoin Sonir.)
10 Faṛia elaḳar ou tʼol zagar hoḳol ṭaun ar gau-geram, asta Giliod elaḳa, bashsha Uzor Suloḳa ar Idri ṭaun shoho asta Bashon deshre amra doḳol ḳorlam.”
11 (Fura Rofayi zatir maze ḳali Bashon deshor bashsha Uz zita roisla. Ou bashsha luar falongo hutita, ikan lambae noy at ar faṛe sair at. Boni-Amman zatir Rabba ṭauno ikan oḳono toa ase.)
Boni Israilor zomir bag-baṭura
12 Hozrot Musae aro ḳoira, “Amrar doḳol ḳora Ornon ḳalor faro Aruar ṭaunor bairor utoror elaḳa, ar faṛia Giliod elaḳar ordeḳ zaga, honor hoḳol ṭaun ar gau-geram oḳol, Boni Israilor Ruben ar Sadu ḳandanre dilailam.
13 Giliod deshor baki ongsho ar bashsha Uzor ges taki ana asta Bashon deshre ami Manosha ḳandanor ordeḳ manshore dilam.” (Bashon deshor asta Orgub elaḳare Rofayi zatir desh ḳoia ḍaḳa oito.
14 Manosha ḳandanor eḳ zonor nam asil Zayir, he asta Orgub elaḳa mani, Goshuri ar Maḳati zatir shimana forzonto doḳol ḳoria tar nizor namor mile ou Bashon deshor nam dilo Habbut-Zayir. Erlagi oḳono ikanre ou name ḍaḳa oy.)
15 “Ar Giliodor faṛia elaḳa ami Makirre dilam.
16 Oile Giliod taki Ornonor faṛia ḳalor mazamazi forzonto hoḳol zaga, ar hon taki Boni-Amman zatir shimana Zabbuk kal forzonto ami Ruben ar Sadu ḳandanre dilam.
17 Tarar deshor foismor shimana asil, Araba morubumit Zordan gangor ze ongsho Galil aoror daredi, Pisga namor faṛia elaḳar Araba shagor ba Luna shagor forzonto gese, ou zaga.
18 “Ou zaga oḳnain shomzai dia tarare ḳoilam, iknain bug-doḳol ḳorar lagi tumrar Mabud Allae tumrare disoin. Oile tumrar zeta beṭaintor shorilo bol ase, zera zuddo ḳorar laḳ, era zuit-zait oia Boni Israilor age gia gang far o.
19 Oile tumrare deoa ṭaun ar gau-geramo tumrar bou, fua-fuṛin ar goru-sagol hoḳolta roiba. Ami zani tumrar bout foshu asoin.
20 Bade Mabude zebla tumrar zatir baiainre tumrar laḳan aramor zaga dilaiba, tumrar Mabud Allae Zordan gangor hofaro tarare ze desh dan ḳorra, oḳanor doḳol faia harle, tumra hirbar amar deoa ou zagat firia aio.”
Hozrot Musa (a:)or gang far oa nished
21 Hozrot Musae tarare ḳoira, “Ou shomoy ami Iusare ḳoilam, tumrar Mabud Allae ou duio bashshar kun dosha goṭaisoin, ita to nizor souke deḳso. Te oḳon Zordan faroia tumra zoto deshainto zairae, Mabude ita hokkol deshaintor dosha-o ou laḳan goṭaiba.
22 Erlagi tumra itare ḍoraio na, shoyong Alla Mabud tumrar fokko oia tarar loge zuddo ḳorba.
23 “Ar ou shomoy ami Mabudor dorbaro aroz ḳorlam,
24 O Mabud Moula, tumar gulamre to oḳon-u deḳani dorso, tumi koto mohan ar ḳoto boloban. Tumi ou zotota ḳorso, ita ḳorar shaiddo ḳar ase, asmano ba zominor kunu devtar takkot ase ni, tumar laḳan dafoṭ deḳaito?
25 Moula go, amar boṛo shoḳ oilo, Zordan gangor hofaro gia tumar oada ḳora ou shundor faṛia elaḳa ar Lebanon desh deḳtam, meherbani kori zaite diba ni?
26 Oile Mabude na ḳorla, tain amar arzi hunla na, tumrar ḳarone-u tain amar ufre naraz asla. Mabude zuaf dila, tumi bout ḳoiso, i befare ar mangio na.
27 Aichcha, tumi ou Pisga ṭillar ufre uṭo, uṭia utore-douḳne ar fube-foisme souk falao. Zordan gang faroni nished oile-o, on taki ubaia hou deshre dekilao.
28 Ar tumar ḳadim Iusare hikai deo, kita kita ḳora lagbo. Tar himmot baṛao, bitre shaosh deo, ḳaron hoḳol manshor age roia he gang far ḳoraibo, ar tumi on taki ze desh deḳrae, he eraredi ou desh doḳol ḳoraibo.
29 Oḳan hunia amra Bayt-Piyuror samnor nisa zagat roigelam.”