2
Boni Israile deshe deshe gura
1 Hozrot Musae aro ḳoila, “Mabude amare zela hukum disla, oula amra fisaia gia morubumir mazedi Nil doriar muka roana dilam. Seiror faṛia elaḳa sokkor dia zaite amrar bout din gelogi.
2 Bade Mabude amare ḳoila,
3 tumra bakka din taki ou faṛia elaḳat sokkor dirae, oḳon uttor muka roana deo.
4 Erbade tain amare ḳoila, ami tumrare zanaitam tumra oḳon Shek Ishʼor aolador doḳole taḳa Seir deshor bitredi zaite oibo. Gele tumrare dekia tara ḍoraiba, oile tumra kub hushiar roio, era to tumrar baiain.
5 Tarar loge ḳaijja-fosad ḳorio na. Mono rakio, tarar deshor eḳ inchi zomi-o ami tumrare ditam nae. Ḳaron asta Seir faṛor malikana ami Shek Ishʼre dilaisi.
6 Tarar ou desh faroia zaibar ḳalo tumrar ḳani-kuraki lagle ṭeḳadi loia ḳaibae, oula fani-o loia ḳaibae.
7 “Tumrar Mabud Allae hoḳol ḳamor maze-u tumrare rohom-borkot disoin. Ou oto boṛo morubumi faronir bala tain tumrare hefazot ḳorsoin. Ou sallish bosor dori tumrar Mabud Alla tumrar loge loge asoin, erlagi kunu laḳan obab oise na.
8 “Teu amra fatari fote aṭilam, aṭia amrar bai Seiror bashinda Ishʼor aolador desh falaia gelam. Amra Araba tolbumir ze rasta Elat ar Izion-Geber taki bar oia aise, ou fotedi na gia Muabor morubumir muka aṭa dorlam.
9 Ar Mabude amare ḳoila, tumra Muabi oḳolre sataio na, kunu zuddor bab-shab deḳaio na. Mono rakio, tarar deshor kunu zomi-u ami tumrare ditam nae. Tarar razdani Aur ṭaunor malikana ami Lut nobir aolad Muabi oḳolre dilaisi.”
10 (Age Eimi zatir manush ou elaḳat roita, ita asla foyluan zati, tara forimane asla bout zon, ar deḳte Anaki zatir laḳan usa-muṭa lamba.
11 Anaki oḳlor laḳan Eimi oḳolre-o Rofayi name ḍaḳa oito, oile Muabi oḳole itare Eimi koia ḍakita.
12 Seir faṛo Hurio oḳole boshot ḳorta, bade Ishʼor aolad oḳole tarare ḳedaia dia ikan doḳol ḳorla. Mabudor ate Boni Israile zela Kenan deshor malikana faia Kenani oḳolre ḳedaiba, ṭik ola Ishʼor aolad oḳole-o ḳorsla. Tara Hurio oḳolre binash ḳoria hoḳol zomi-maṭi doḳol ḳoria nize hono boshot ḳorla.)
13 Musa nobie aro ḳoila, “Bade Mabude hukum dila, tumra zoldi kori roana o, ar Zered faṛia ḳal faroia hofaro zao. Teu amra faroilam.
14 Ar Kadesh-Bornea taki bar oia hari Zered gulla faroia aite amrar aṭtish bosor lagsil. Ermaze oula oilo, Mabude age ḳosom ḳaia zela ḳoisla, oula Kadesh-Bornea taki baronir ḳalo amrar zoto sifai asla, era hoḳol-u ou aṭtish bosore morigela.
15 Boni Israil shomaz taki tarare binash ḳorar ag forzonto Mabud tarar bifokke asla.
16 “Ou hoḳol sifai moria shesh oia harle,
17 Mabude amare ḳoila,
18 Aiz tumra Muabi oḳlor deshor shimana faroibae, tarar razdani Aur ṭaunor ḳandabae zaibae.
19 Oile tumra zebla Boni-Amman deshor ḳasat zaibaegi, gia tarare sataio na, tarare zuddor bab-shab deḳaio na. Mono rakio, tarar deshor kunu zaga-u ami tumrare ditam nae, ikanor malikana to ami Lut nobir aolad Boni-Ammanre dilaisi.”
20 (Age Rofayi oḳol ono roita, erlagi ikanre Rofayi oḳlor desh ḳoia ḍaḳa oito. Ar Boni-Ammane itare Zam-Zamimi koia ḍakita.
21 Rofayi zati foyluan asla, deḳte Anaki zatir laḳan usa-muṭa lamba ar forimane-o bout beshi asla. Mabude Boni-Amman zatir ato itare binash ḳoraila, Boni-Ammane Rofayi zatire ḳedai dia ou desh doḳol ḳorla.
22 Mabude Ishʼor aolad oḳolredi ou eḳoi kam ḳoraila, tain erar ato Hurio zatire binash ḳorla. Era Hurio oḳolre ḳedaia dia, tarar Seir desh doḳol ḳoria boshot ḳorra.
23 Ermaze Koftur dif taki Kofturi zatie aia Obbi zatire binash ḳorla, tarar maṭire doḳol ḳoria boshot ḳorla. Ou Obbi oḳol Gaza ṭaunor daro boshot ḳorta, honor hoḳol gau-geramo tara roita.)
24 “Erbade Mabude ḳoisla, O Boni Israil, tumra bar o, bar oia Ornon ḳalor hofaro zao. Huno, Amuri zatir bashsha Sihun ar tar Hishbon deshre ami tumrar ato shofi disi. Ikan doḳol ḳorat gia bashshare zuddor filḍo lamao,
25 teu deḳbae, ami Mabude aiz taki zogotor hoḳol zatir dilo ḍor harai dimu, tumrar ḍore tara ḳafiba. Tumrar aoaz hunle-u tarar zano doṛfoṛ shuru oibo.”
Bashsha Sihun ar tar zatir binash
26 Musa nobie Boni Israilre aro ḳoila, “Bade ami shanti-chukti korar kiale Ḳadimut morubumi taki Hishbonor bashsha Sihunor gese ḳobria faṭailam, ḳoilam,
27 amra afnar deshor bitredi faroia zaitam sai, onumoti diba ni? Amra atare-fatare kunubae zaitam nae, ḳali mul shoṛokedi aṭia zaimu.
28-29 Amra nogod ṭeḳadi afnar ges taki kani-kuraki ba fani-o ḳorid ḳoria ḳaimu. Amrar Mabud Allae amrare ze deshḳan dita saira, Zordan gang faroia hou desho zaibar ag forzonto, afnar deshor ufredi amrare aṭia zaite deukka. Seiror faṛia elaḳar bashinda Ishʼor aolad oḳole, ar Aur ṭaunor bashinda Muabi oḳole-o amrare ola faroite disoin.
30 “Oile Hishbonor bashsha Sihun razi oilo na, amrare zaite dilo na. Tumrar Mabud Allae-u tar dilre fashan banailla, tar monor bab luar laḳan oigelo, zate tumrar ato tar binash oy, ar ṭik-u ola oilo.
31 Teu Mabude amare ḳoila, O Musa, Sihun ar tar bashshaire ami tumar ato shofi dilam. Oḳon tumi hono zao, gia ou desh doḳole anat lago, ar hono boshot ḳoro.
32 “Teu Iyahaz elaḳat Sihune tar hoḳol sifai dol loia amrar loge laṛai korat ailo,
33 ou shomoy amrar Mabud Allae tare amrar ato falaila. Amra bashshare, tar fuaintore, tar sifai dolre nifat ḳorlam.
34 Ar amra tar hoḳol ṭaun, gau-geram hoḳolta doḳol ḳorlam, tarar hoḳol beṭain-beṭin ar huruttare binash ḳorlam. Eḳzon-o zinda roise na.
35 Ḳali tarar foshur fal ar gonimotor mal-samana amrar lagi anlam.
36 Ornon ḳalor shimanar Aruar ṭaun, ar ou elaḳar ek gau taki arok gau doḳol ḳori kori, Giliod forzonto kunu zaga amrar doḳolor baire roilo na. Amrar Mabud Allae ita hoḳolta amrar ato dila.
37 Ḳali Boni-Amman zatir desh, Zabbuk faṛia ḳalor ḳanda-ḳasar hoḳol zila, faṛor ufror gau-geram, ar amrar Mabud Allae zeta zaga doḳol ḳorte nished ḳorsoin, ou zaga ḳanain tumrar doḳolor baire roilo.”