27
Ibal faṛo kurbani kana banaio
1 Musa nobie Boni Israilor murobbi oḳolre loia manshore ḳoila, “Ami tumrare aiz zeta zeta hukum diram, tumra ita furafur amol ḳorio.
2 Tumrar Mabud Allae tumrare ze desh dan ḳorra, Zordan gang faroia hari tumra zebla hou desho zaibae, zaoar bade ḳoyeḳṭa boṛo boṛo fattor ḳaṛa ḳori hazaia, itare suna dia faḳa ḳorio.
3 Ar otar ufre ou Tourator tamam hukum-ahkam lekio. Buzrae ni, tumrar moy-murobbir Mabud Allae, dud ar mour banḍar-ala ze deshḳan tumrare dibar oada ḳorsoin, in taki hou desho gia harle,
4 Zordan gang faroia Ibal faṛor ufre uṭia, amar batail aizkur hukum mafik tumra hou fattor oḳol hazaia ḳaṛa ḳorio, ar itare suna dia faḳa ḳorio.
5 Ar hono tumrar Mabud Allar name fattordi ekkan kurbani kana banaio. Ou fattoror maze luar kunu atiar lagaio na.
6 Asta asta fattor dia tumrar Mabud Allar ou kurbani kana banaio, banaia er ufre tumrar Mabud Allar name zalail kurbani adae ḳorio.
7 Ar salamoti kurbani-o adae ḳorio. Ou kurbanir gust ḳaia tumrar Mabud Allar samne kushi-bashi korio.
8 Ar suna lefa hou fattoror ufre Tourator ou hukum-ahkam oḳol kub shundor ḳori lekio.”
9 Bade Musa nobie Lebi kandanor imam oḳolre loia hoḳol Boni Israilre ḳoila, “O Boni Israil, nirai o, ar amar ḳota huno, oḳon to tumra nizor Mabud Allar ḳas proza bonigeso.
10 Te tumra tan hukume solio, ar ami aiz zeta niom-ḳanun, hukum-ahkam zanailam, ita amol ḳorio.”
Ibal faṛ taki lannoti buli
11 Musa nobie ou din manshore hukum dila, ḳoila,
12 “Zordan gang faroia harle ou shomoy Shimion, Lebi, Ehuda, Isaḳor, Iusuf, ar Bin-Iamin ḳandanor manush oḳol gia nek duar nishana hishabe Gorisim faṛor ufre uṭio.
13 Ar bodduar nishana hishabe Ruben, Sadu, Ashir, Sobulon, Dan ar Noftali kandanor manush gia Ibal faṛor ufre uṭio.
14 Bade Lebi kandanor manush oḳol ubaia, Boni Israilor tamam manshore zure zure sillaia ḳoibae,
15 “Ze manshe laḳṛi ba fattor kudia, shuna-rufa ba fitol golaia kunu murti banae, ar puja ḳorar niote ogure nia lukail zagat toy, he to lannoti. I murtire to Mabude gin ḳoroin, ita ḳali kamaror ator ḳam. Ikan hunia hoḳole ḳoio, Amin.
16 “Ma-bafre zegie beijjot ḳore, he lannoti. Ikan hunia hoḳole ḳoio, Amin.
17 “Doḳoldarir niote zominor ail ba shimana kuṭi zegie horae, he lannoti. Ikan hunia hoḳole ḳoio, Amin.
18 “Anda manshore zegie bul fot deḳai dey, he lannoti. Ikan hunia hoḳole ḳoio, Amin.
19 “Bideshi musafir, etim, ar ṛaṛi beṭintor bisar-salishit zegie be-insafi kore, he lannoti. Ikan hunia hoḳole ḳoio, Amin.
20 “Haton maʼr loge zegie zina ḳore, he afon bafre beijjot ḳore. He to lannoti. Ikan hunia hoḳole ḳoio, Amin.
21 “Kunu foshur loge zegie zina ḳore, he to lannoti. Ikan hunia hoḳole ḳoio, Amin.
22 “Zegie nizor boinor loge, haton maʼr, ba haton bafor torofa boinor loge zina ḳore, he to lannoti. Ikan hunia hoḳole ḳoio, Amin.
23 “Nizor hoṛir loge zegie zina ḳore, he to lannoti. Ikan hunia hoḳole ḳoio, Amin.
24 “Zegie lukaia kunu manshore kun ḳore, he to lannoti. Ikan hunia hoḳole ḳoio, Amin.
25 “Ni-oforadi manshore kun ḳorar chuktie zegie ṭeḳa ḳae, he to lannoti. Ikan hunia hoḳole ḳoio, Amin.
26 “Ou shoriotor kunu hukum-ahkam zegie mane na, zegie ita amol ḳore na, he to lannoti. Ikan hunia hoḳole ḳoio, Amin.