26
Foyla foshol ar dosh baṭor eḳ baṭ dibar niom
1 “O Boni Israil huno, tumrar Mabud Allae tumrare ze deshor malikana dira, tumra zebla hou deshor doḳol faia hono boshoti korbae,
2 ou shomoy tumrar Mabud Allar deoa zominor hoḳol zator foshol taki, foyla faoa fosholor eḳṭa ongsho eḳ ṭukrit boria algaia toio. Ar tumrar Mabud Allae nizor Baytulla Shorif hishabe ze zagare fosond ḳorba, ou foshol loia hono zaio.
3 Gia hono azir imam sabre ḳoio, amrar Mabud Allae amrar moy-murobbir gese ḳosom ḳaia ze deshḳan dibar oada ḳorsla, amra oḳon ono aisi, aia tan samne azir oisi.
4 Teu imam sabe tumrar at taki folor ṭukri nia Alla Mabudor kurbani kanar samne toiba.
5 Bade tumra forteḳe tumrar Mabud Allar samne ubaia ḳoio, amrar ḳandanor mul murobbi Hozrot Iakub asla eḳzon Orami musafir, tain tuṛa ḳoyzon manshore loge loia Mishor desho geslagi. Gia Mishor desho musafir halote boshot ḳorar ḳalo tan usillae tara eḳ mohan zati, ar bout boṛo bolala zati bonla.
6 Bade Mishoror manshe amrar loge bojjati korla, amrare duk-koshṭo dia, amraredi koṭin gulami korailo.
7 Amra duk faia amrar moy-murobbir Mabud Allar dorbaro ḳandilam. Teu Mabude amrar foriad hunia, amrar duk-koshṭo, ḳoṭin gulami, ar amrar ufror zulumor bae nozor dila.
8 Ar tan bolala-mozbut at baṛaia, kub ḍor-ḳof deḳaia, kudroti lila-ḳela dia ar asanok gozob ḍalia Mishor desh taki amrare bar ḳori anla.
9 Tain-u amrare ou desho anchoin, dud ar mour banḍar-ala aramor ou desh amrare dan ḳorsoin.
10 Erlagi O amrar Mabud, tumar deoa zominor fosholor foyla baṭ loia ami tumar samne azir oisi. Oḳan ḳoia, tumrar Mabud Allar samne ou ṭukri toio, toia tanre soizda ḳorio.
11 Tumrar Mabud Allae tumrare ar tumrar foribarre zoto nomunar balai korsoin, ota mono ḳoria tumra nize, Lebi kandanor hoḳole, ar tumrar loge roura bideshi musafir oḳole kushi-bashi korio.
12 “Forti tin bosor bade bade tumra foy-fosholor dosh baṭor eḳ baṭ Lebi kandanor manshore, bideshi musafir oḳolre, etim ar ṛaṛi beṭintor maze bilai dio. Teu era feṭ bori kaia tumrar deshor maze arame roiba. Erlagi ikṭar nam oilo Doshomangshor Bosor.
13 Bade tumra forteḳe tumrar Mabud Allare ḳoio, Mabud, ami tumar hukum mafik amar ruzir fobitro baṭre, amar gor taki nia Lebi kandanre, musafir oḳolre, etim ar ṛaṛi beṭintore bilai disi. Ami tumar kunu hukumor ḳelaf ḳorsi na, ba faurisi na.
14 Murdar lagi kanda-ḳaṭi ar ahazari korar shomoy ami ou fobitro ongshor kunuta ḳaisi na, ba nafak halote ita baṛir bare nisi na, ar itar kunu ongsho murdar name dan-ḳoyrat-o ḳorsi na. Ami amar Mabud Allar hukum mafik solchi, tumar hukum mafik hoḳol ḳam ḳorsi.
15 Oḳon, O Mabud, tumar fobitro boshot ḳana taki, tumar arshe-azim taki toledi saia deḳo, ar tumar ḳas proza Boni Israilre rohom-borkot deo. Amrar moy-murobbir loge ḳosom ḳora oada mafik, tumi amrare dud ar mour banḍar-ala ou ze deshḳan dan ḳorso, er maṭit tumi rohom-borkot nazil ḳoro.
Allai oada-chukti
16 “Tumrar Mabud Allae aiz tumrare ou hukum dira, tumra tan batail niom-ḳanun ar hukum-ahkam mania solio. Tumra dile-zane ashik bonia ita amol ḳorio.
17 Tumra to aiz shikar ḳorso, ou Alla-u oila tumrar Mabud, tumra tan fote solbae, tan hukum-ahkam, tan shoriot ar niom-ḳanun manbae, tan ḳota hunbae.
18 Erlagi Mabude-o aiz shikar ḳorsoin, tan oada mafik tumra oḳon tan proza, tumra-u tan ḳas shompod, tumra tan hoḳol hukum-ahkam amol ḳorbae.
19 Tain aro ḳoira, tan foyda ḳora tamam zatir ufre tumrare boṛo ḳorba. Tumrar ijjot, shunam ar tarif, hoḳol zatir ufre roibo. Tan oada mafik tumra oibae tumrar Mabud Allar name eḳ fobitro proza.”