9
Edi tabaohu eo edi ginauri tabudi, isi hinage tautau.
1 Ribahesunuma bagubagunana wa ena aihelahui dobilana se toreyao, eo ena aba‐tabaohu tabuna tanoubu eai ta.
2 Apa tabuna se abinonohai, alona eai mara edi aba‐torena, kandela, eo hatahata, arinai falawa tabuna se wese; esana ede Teha Tabuna.
3 Woeo helabuina aloalona eai tehana ede se ribaei Hetabuaririna,
4 muramura panepane edi aba‐gabuna gold wa metai, eo ake ribahesunuma heiheinoina wa, tupo gamagarina arinai gold se hepatu, se sumaheohi, alona eai gulewa gold, aiai manna edi aba‐usaina, eo Arona ena tue, ie bogu wa, eo we’u wa, aridi eai laugagaeo se uri.
5 Potana eai Serubim namanamarina, nuatoatoa ababawana mabena eai i helogulogu. Teina ta ribana se gamagari, nige gonoana inai aniodi ta ribaedi.
6 Ginauri ta se tore‐nonohaidi doha ina, kohena tataodi huia gamagari se lulusora teha bagubagunana eai, uura eo aitalasam hesabana.
7 Na kohena‐saesaena, ia iabom taba i lusora teha esau, boea‐ariri eai wa, borimai esega sorasorana eai ma‐esega mo, osina i heboriri baguna, iabom enana eo tatao gamagaridi enadi, edi ponori debadi eai.
8 Arinai Earua Tabuna ena abaheatadi, aba‐lusora teha hetabuaririna eai wa dobilana sora nige i masaraha, huiana ne Apa‐tabuna i totoro
9 (parabole ina, eda huia ta tautauna). Dobila eai ta ita sora aitalasam eo ainauia ta toretoredi ia mo ginauri ta nige gonoadi tau‐tabaohu nuana se heaa mamohoi,
10 paana buluma laugagaeodi mo ina (doha buluma aiaina, nomnom, eo hari aiaideuri laulaudi), se hetorodi bena ta laulauedi i lau e hetubuuioi huiana i lage.
11 Na Keriso i laomao, ia eda kohena‐saesaena ede, eo maraitom‐asubena ena ginauri lolodi enana hinage, isi eda apa‐tabuna saesaena, lolo‐aririna, debana eai abo se tubu, nige tatao nimadi eai se ginauridi, eo nige tanoubu abiabina eai se hetubudi,
12 nige bokania e bulumakau nanatudi osinadi eai, na iabom osinana debana eai, teha tabuna eai i lusorao, ma‐esega mo, huia gamagarina enana, hemaurina i lau e nige nosina i abiyao enada.
13 Hage ena bokania eo bulumakau osinadi, eo bulumakau natuna bawesina se gabu ahuna se hesuruauri tatao biibii potadi eai, gonoana i hetabuedi, buluma aba‐heaana ede,
14 abo nige Keriso osinana mo nuamiu i heaa‐aririedi, paisoa matematedi aridi eai i hemaurimiu, bena Eaubada maumaurina au heaheyaiei? Ia nige baaeana begana, iabom i moseuioi Eaubada arinai, Earua Tabuna ena paipaisoa eai.
15 Paana ede ia, arinai ribahesunuma harihariuna ta ie tubu, isi laugagaeo bagubagunana boeana eai mamiadi wa, edi baaea eai abo i hemauridi, ena mate debana eai, isi se eogaidi wa bena edi tupo se lobai ribahesunuma eai ta, i lau e nige nosina.
16 Ena tau i mate, ena gogo soiena pepana eai se uri nonohaiyao, pepana ta ita ta ene tau ie mate.
17 Tau mamiana pepa wa nige aniona, sora i mate abotai se lauwatai, wa?
18 Hinage doha, ribahesunuma bagubagunana eai wa nige se ginauri gaibui, osina eai se hetabuei.
19 Mose lauhesom ribadi gamagaridi laugagaeo eai i ribaedio tatao gamagaridi aridi eai, abotai bulumakau nanatudi eo bokania osinadi ie abi, eo goila eo mamoe uiana buiabuia, eo lugu iniini esau esana hisopa, abo buka eai i helausibusibuei, eo tatao gamagari potadi eai i hesibusibu hinage,
20 i ene, “Teina ribahesunuma laugagaeona osinana ede, Eaubada i ribaei enamiu, au lauwatai.”
21 Hinage apa‐tabuna lulu eai se ginauri wa, eo ginauri tabudi numa alona eai se hepahepaisoaidi wa, ena abiabidi esega, osina eai i lausibuedi.
22 Mamohoi laugagaeo dobilana eai ta ene ginauri gamagaridi osina eai mo se heaadi, baaea nige aba‐ribagigirina ena osina nige i boriri.
23 Arinai i dudurai bena ginauri galewa eai tautaudi ina, doha ina se heaadi; na galewa ginauridi mamohoidi isi abo udoi, atalasam lolo‐ariridi eai mo se heaadi.
24 Paana Keriso ia nige i lusora teha tabuna tautauna eai mo, iaede tatao nimadi eai se ginauri, ia galewa mamohoina eai ie lusora, eo Eaubada matana eai i totoro ita debada eai.
25 Hinage ia nige ma‐hisa i heaitalasamuioi, doha kohena saesaena borimai to borimai i lulusora teha hetabu‐aririna eai, osina i bahei, nige iabom osinana;
26 ena doha ina abo tanoubu ena abatubu eai i laoma huia ta abo ma‐hisa amamna i hearo. Na huia murimuritana eai ta ia i taumasarahama, iabom ena heaitalasamuioi debana eai, bena baaea i torehesuara.
27 Doha tatao edi dobila se toreyao, huia esau eai abo se mate, eo murina eai abo heduduraina,
28 hinage Keriso, huia bagubagunana eai se heaitalasam, tatao gamagaridi edi baaea i baheidi, huia helabuina eai abo i taumasarahauio, baaeana nige’e, abo i taumasaraha taubagibagiena aridi eai, isi aidobu edi mauri ia arinai se abiyao.