8
Kohena edi dobila ede tautau mo, Keriso ia mamohoina.
1 Eda ribariba eai ta, ginauri bagubagunana ede ina: eda kohena‐saesaena ta ia i babawa Eaubada ena terona namanamarina nima‐tutuna eai, galewa eai,
2 apa‐tabuna mamohoina wa arinai ia tauheaeai, iaede Eaubada i abihetoro wa, nige tatao.
3 Kohena‐saesaedi gamagaridi se tauribaedi bena ainauia eo aitalasam Eaubada se mosei; arinai teina eda kohena‐saesaena ta ia hinage bena enana i leama i mosei.
4 Ena ia tanoubu eai ta ma‐miana, ia taba nige kohena eai i laulau, paana isi nonohadi ina, ainauia tautorena, doha laugagaeo eai edi dobila se mosedio.
5 Adi paisoa eai galewa ginauridi se abiwataidi, doha tautauna se ginauri, doha Mose Eaubada i ribahesanapuei wa huia ne i hetubu bena apa tabuna wa i ginauri: i ene, “U ita komakomani, ginauri gamagaridi doha tautauna oea tupina eai se heitam wa, iaede u ginauriwataidi.”
6 Na huia ta Keriso heaheari paisoana loloaririna i lobai, Eaubada dobila esau i hetubu, wasawasana, dobila paana ede ribahesunuma lolodi, nige doha bagubagunana wa.
7 Ribahesunuma bagubagunana ena i lolo, taba nige esau bena ta eooi.
8 Ia mo nige ena lolo gonoana, arinai i hegiru i ene:
“Sora au ita, asubenadi abo se lage, Guiau ie riba;
ribahesunuma harihariuna abo ea hetubu Isaraela numana arinai, eo Iudea numana;
9 nige doha ribahesunuma esau wa, tamadiyao enadi ea ribaei
nei asubenana eai ea abilau nimadi eai
Aigupito edi tano eai ea woeahaidi;
paana Guiau ie riba i ene, egu ribahesunuma nige se miatahitahini,
arinai nige ea nuatuidi.
10 Ribahesunumana ede ina, abo ea hetubu Isaraela numana enadi,
asubenadi me muridi eai, Guiau ie riba;
egu laugagaeo abo ea toredi edi nuanuatu eai,
nuadi eai hinage abo ea uri‐auridi,
Eau abo edi Eaubada ede,
isi abo egu basileia tataodi.
11 Taba nige tau esau ena eanua tauna, e ena tau mamohoi
i heata i ene, “Guiau bena u nuatui,’
paana gamagaridi abo abigu se atao,
gagiri‐konekonena i lau e tau saesae‐aririna,
12 Edi laulau baaea eai abo ea nuatoatoaedi,
edi baaea taba nige huia esau ea henuaisiniuioi.” (Jer. 31.31-34.)
13 Wau ribahesunuma harihariuna i ribaei wa, arinai ede bagubagunana i beabeao. Na ginauri wa i beabeao, iaede ena huia i lauo, nige baeaona abo i tauyamui ariri.