6
परमप्रभु आ सन्दोस चाक्शो
१इतिहास १३:-; १इतिहास १५:१६
1 मिनु दाऊदमी इस्राएल ङा ३० हजार योव़शो मुर आन कली खुप्तीमी बाक्त।
2 मिनु दाऊद नु मेको मुर नेल्ल परमप्रभु आ सन्दोस चाक्चा कली यहूदा ङा बाले सहर रे लमा बाक्त। मेको सन्दोस तार आ नें बाक्त। मुर नेल्ल आन परमप्रभु यावे आ नें मेकेर बाक्ब। मेको करूब आस दातेम बाक्ब। बाले सहर आ अर्को नें किरयथ-यारीम बाक्त।यहोसु १५:९ प्रस्थान २५:२२
3 मेकोपुकीम परमप्रभु आ सन्दोस डांडाम बाक्शो अबीनादाब आ खिं रे ग्रुंइशा, नक बग्गी काम वोदमे बाक्त। अबीनादाब आ तौ निक्शी उज्जाह नु अहीयोमी मेको नक बग्गी खुल्ना खुल्न लदसे बाक्त। १सामुएल ७:१
4 मेकोपुकीम परमप्रभु आ सन्दोस डांडाम बाक्शो अबीनादाब आ खिं रे लदमे बाक्त। अहीयो चहिं मेको बग्गी आ ङोंइती गाक्माक्त।
5 मिनु दाऊद नु इस्राएली नेल्ल आन जोंब बोक्शा परमप्रभु यावे आ ङोंइती कुम्सो पना पन बीना, तार पाइश्शो ठेयब ताप्तीक, खैजडी, मार मार ताप्तीक नु बुप्केल ताप्शा सिल पना पन गाक्मा बाक्त।
6 मेकोपुकी नाकोन आ खलाम जाक्मानु, ब्यफ दाइल पांइससा बाक्त। मिनु उज्जाहम आ गुइ दिंशा, परमप्रभु आ सन्दोस तिक्गा बाक्त।
7 मिनु परमप्रभु यावे उज्जाह कली तशा, गाइक्ता बाक्त। मिनु परमप्रभुमी मेको आ गुइ दिंशा, सन्दोस थिशो तशा, आ सन्दोस आ नेक्था उइ सदा बाक्त। १सामुएल ६:१९; गन्ती ४:१५
8 मिनु दाऊद गाइक्ता बाक्त। मारदे हना परमप्रभु यावेम उज्जाह आ पर्बम गाइश्शा, मेको कली सदा बाक्त। मोपतीके मेकेर पेरेस-उज्जा नें वोदा बाक्त। मेको आ नें मुल सम्म मेकोन बाक्ब।
9 मेको नाक्ती दाऊद परमप्रभु यावे क्येङा हिंमाक्त। मिनु “मुल गो परमप्रभु यावे आ सन्दोस दोपा लाइक्नुङा?” देंमाक्त।
10 मिनु दाऊदमी परमप्रभु यावे आ सन्दोस आ बाक्तीके, दाऊद आ सहर, लाइक्ने मचबा बाक्त। मिनु आ खिं लाइक्चा आ पा ङा मेको गित्त आ खिं ङा मुर, ओबेद-एदोम आ खिंमी चाक्दीदा बाक्त।
11 मोपा परमप्रभु यावे आ सन्दोस ओबेद-एदोम आ खिंमी महिना सां सम्म बाक्माक्त। मिनु परमप्रभु यावेमी गित्त आ खिं ङा ओबेद-एदोम नु आ खिं ङा मुर नेल्ल आन कली आसीक गेमी बाक्त।
सन्दोस यरूसलेमम चाक्शो
12 मिनु मुरपुकीमी दाऊद कली “परमप्रभु यावेमी, परमप्रभु आ सन्दोस वोइश्शो आ पर्बम ओबेद-एदोम आ खिं ङा मुर नु आ मारेइ मारेइ आन कली आसीक गेप्तु” दे मदमे बाक्त। मिनु दाऊद लशा, ओबेद-एदोम आ खिं रे थाम्पा ग्येरसीशा, मेको परमप्रभु आ सन्दोस आ सहरमी चाक्गा बाक्त।
13 परमप्रभु यावे आ सन्दोस कुरब मुर ६ पैला गाक्शा नोले, मेकोपुकीम ब्यफ का नु दोम्शो बाछा का क्योरशा चढ़ेमे बाक्त। १राजा ८:५
14 दाऊदम सुती के ऊरीम नु थुम्मीम कुरतीके पांइशा, परमप्रभु यावे आ ङोंइती आ जोंब बोक्शा सिल पवा बाक्त। प्रस्थान २८:६; १सामुएल २:१८; १सामुएल २२:१८
15 मिनु दाऊद नु इस्राएल आ खिं ङा मुर नेल्ल रेयके पना पन तुराही ताम्ना ताम्न परमप्रभु यावे आ सन्दोस चाक्गमे बाक्त।
16 मिनु परमप्रभु यावे आ सन्दोस दाऊद आ सहरमी चाक्गमेनु, सावल आ तमी मिकालमी झेल रे कोव़ङा बाक्त। मिनु पिप दाऊद कली परमप्रभु यावे आ ङोंइती प्रेक्ना प्रेक्न, सिल पशो तशा, आ थुंमी ग्रांग्रा दिमाक्त।
17 मिनु मेकोपुकीम परमप्रभु यावे आ सन्दोस वोइक्चा कली दाऊदम कीशो ताम्बुम ओंइदमे बाक्त। मिनु दाऊदमी परमप्रभु यावे आ ङोंइती चोशा चढ़ेतीक नु दुशा बाक्चा आ पर्बम चढ़ेतीक चढ़ेवा बाक्त।
18 दाऊदमी मेको चोशा चढ़ेतीक नु दुशा बाक्चा आ पर्बम चढ़ेतीके चढ़ेने थुम्शा, मुर नेल्ल आन परमप्रभु यावे आ नेंमी आ मुर नेल्ल आन कली आसीक गेमी बाक्त। १राजा ८:५५
19 मिनु दाऊदमी इस्राएली नेल्ल आन कली नु मेकेर देल्शो मीश मुर, वोंइश मुर नेल्ल आन कली शोब्ले का का, चोकटा का का श्ये, सोव़शो अङगुर शोब्ले गेमी बाक्त। मिनु मुर नेल्ल आन खिं खिं लेम्मा बाक्त।
20 मिनु दाऊद आ खिं ङा मुर आन कली आसीक गेथ लेम्मेनु, सावल आ तमी मिकाल मेको कली ग्रुम्थ लाङगा ग्रूशा पिमाक्त। मिनु मेकोम “मुलाक्ती इस्राएल ङा पिप थम ठेयब मिम्सीशो बाक्त। मेको मुलाक्त आ गेय पाइब वाइलीम आन ङोंइती शिश्रा दुम्शा, मुने मपाइश्शो आइक्च मुर खोदेंशो दुम्त” देंमाक्त।
21 मिनु दाऊदम मिकाल कली “इ आफ नु आ खिं ङा मुर आन पा ङा आं कली इस्राएल ङा आ मुर आन पिप सेल्ब परमप्रभु यावे आ ङोंइती मो पाता। गो परमप्रभु यावे आ ङोंइती ग्येरशा सिल पाइनुङ। २सामुएल ५:२
22 गो थमा पा मुल यो मेको क्येङा यो आइक्च दुम्नुङ। तन्न मेको आं वाइलीम आन पर्बम गे मार देंने, मेकोपुकीमी आं कली मो पशो आ पर्बम मान पाइनीम” देंमाक्त।
23 मोपतीके मेको सावल आ तमी मिकाल के आ बेक्ची नाक्त सम्म तमी तौ मदुम्मा बाक्त।