3
दाऊद आ खिं ङा मुर
1 सावल नु दाऊद आस खिं ङा मुर शुश नाक्त सम्म लडाइ पस ङा पस बाक्मा बाक्त। मिनु दाऊद बोल्यो दुम्ना दुम्न लमाक्त। सावल आ खिं ङा मुर चहिं मचाप्ब दुम्ना दुम्न लमा बाक्त। २सामुएल ५:१०
2 हेब्रोनमी दाऊद आ तौपुकी जरमेसीमा बाक्त। मेको आ ङोंइती जरमेशो तौ अम्नोन बाक्माक्त। मेको आ ममा येज्रेल ङा अहीनोआम बाक्माक्त। १इतिहास ३:१-४; २सामुएल १३:१
3 मेको आ माइला तौ किलेआब बाक्माक्त। मेको आ ममा कारमेल ङा बेक्शो नाबाल आ मीश अबीगेल बाक्माक्त। मेको आ साइला तौ अब्सालोम बाक्माक्त। मेको आ ममा गेशुर ङा पिप तल्मै आ तमी माकाह बाक्माक्त। २सामुएल १५:१
4 काइला अदोनीयाह बाक्माक्त। मेको आ ममा हग्गीथ बाक्माक्त। ठाइला शेफत्याह बाक्माक्त। मेको आ ममा अबीतल बाक्माक्त। १राजा १:५
5 आ कान्छा इथ्रेआम बाक्माक्त। मेको आ ममा दाऊद आ मीश एग्लाह बाक्माक्त। मेको नेल्ल हेब्रोनम जरमेशो दाऊद आ तौ बाक्मा बाक्त।
आब्नेरमी दाऊद नु कसम जशो
6 सावल नु दाऊद आस खिं ङा मुर आन दातेमी लडाइ दुम्ना दुम्न लमेनु, आब्नेर सावल आ खिंमी बोल्यो दुम्ना दुम्न लमाक्त।
7 मिनु सावल आ कान्छी मीश का बाक्माक्त। मेको आइयाह आ तमी बाक्माक्त। मेको आ नें रिस्पाह बाक्माक्त। मिनु इश-बोशेथम आब्नेर कली “गे आं आफ आ कान्छी मीश नु मारदे इमे?” दे मदा बाक्त।
8 आब्नेरमी इश-बोशेथ आ लोव़ नेंशा गाइश्शा “मार, गो यहूदा आ गेय पाइब कुचुम नङा? मुल सम्म गो इ आफ सावल आ खिं ङा मुर, आ लोक्ब नु आ वारच आन कली मानेब मुर बाक्ती। गो इन कली दाऊद आ गुइम मगेङ। मो हना यो गे एको मीश मुर आ पर्बम आं कली दोस गेनीनी।
9 गो परमप्रभुमी दाऊद कली देंशो मपाता हना, आं कली सजाइ गेयील। परमप्रभु यावेमी दाऊद कली दोदेंशो कसम जवा, गो मोदेंशो पाइनुङ।
10 ‘सावल आ खिं ङा मुर आन राज्य रोइक्चा नु दाऊद कली इस्राएल यहूदा नु दान रे बेयर-शेबा सम्म सासन पपाइक्नुङ’ दे परमप्रभु यावेमी देंशो बाक्ब” दे आब्नेरम इश-बोशेथ कली देंमाक्त।
11 मिनु इश-बोशेथ आब्नेर क्येङा हिंतीके मारेइ लोव़ मलेत्ता बाक्त।
12 मेको नोले आब्नेरम हेब्रोनम बाक्ब दाऊद कली “एको रागी सु के बाक्बा? गे गो नु कबल का पने। मिनु गो इस्राएल नेल्ल इन के सेल्चा कली वारच पाइनुङ” दे लोव़ कुरब मुर सोइक्ता बाक्त।
13 मिनु दाऊदमी मेको आन कली “दुम्ब। गो गे नु कबल पाइनुङ। तन्न गो इ कली लोव़ का पाइनुङ। गे सावल आ तमी मिकाल कली मचाक्तीवी हना, आं ङोंइती मजाक्को, दे मतीन” दे माइक्मी बाक्त।
14 मिनु दाऊदमी सावल आ तौ इश-बोशेथ कली यो “आं मीश मिकाल गेयी। गो मेको आ पर्बम सहे का जना पलिस्ती आन ख्रोइक्तीक चिनु ख्रोइश्शो कुशुल थाप्ताक्ङ” देंपाइक्थ मुर सोइक्ता बाक्त। १सामुएल १८:२५-२७
15 मोपतीके इश-बोशेथम मुर सोइश्शा मिकाल आ वोंइश लाइश आ तौ, पाल्तीएल आ बाक्तीक रे चाक्पदा बाक्त। १सामुएल २५:४४
16 मेको ङाक्ना ङाक्न बाहुरीम सहर सम्म मिकल आ नोले खोइश्शा पिमाक्त। मिनु आब्नेरमी “लेश्शा खिं लावो” दे मदा नोले लेम्माक्त।
17 मिनु नोले आब्नेरम इस्राएल ङा खाल्पा आन कली “शुश ङोंइती रे गेपुकीम दाऊद कली पिप सेल्चा माल्शो ननी।
18 मुल मेको पची जाक्त। मारदे हना परमप्रभु यावेमी दाऊद कली ‘गो आं गेय पाइब दाऊद आ गुइ रे आं मुर इस्राएली आन कली पलिस्ती नु आन जोरी सत्रु नेल्ल आन गुइ रे प्रोंइनुङ’ दे लोव़ थोक्शो बाक्ब” देंमाक्त।
19 आब्नेरमी बेन्यामीन आ थर ङा मुर नु यो लोव़ पवा बाक्त। नोले आब्नेर दाऊद आ बाक्तीक हेब्रोन लमाक्त। मिनु इस्राएली नु बेन्यामीन आ थर ङा मुर आन पचा देंशो लोव़ नेल्ल देंमाक्त।
20 मिनु आब्नेर २० जना मुर नु दाऊद आ बाक्तीक हेब्रोन जाक्दीम्माक्त। दाऊदम आब्नेर नु मेको नेल्ल आन कली भोज गेमी बाक्त।
21 मिनु आब्नेरमी दाऊद कली “मुल आं कली इस्राएली नेल्ल आन कली आं प्रभु, पिप इन ङोंइती चाक्चा गेयीनी। मिनु मेकोपुकीम गे नु कबल का पाइनीम। गे इन दाक्शो राज्य कामी रागी नेल्ल ङा पिप दुम्नीनी” देंमाक्त। नोले दाऊदमी आब्नेर नु गारशा सोइक्ता बाक्त।
योआबम आब्नेर कली साइश्शो
22 मेना योआब दाऊद आ मुरपुकी नु गारशा, लडाइ पा मार मार रोइश्शा जाक्मा बाक्त। आब्नेर चहिं गाक्ने थुम्तीके दाऊद नु हेब्रोन सहरम मबाक्माक्त। मारदे हना दाऊदम मेको नु गारशा, सोइक्ने थुम्शो बाक्माक्त।
23 मिनु योआब नु लडाइ पाइब हुल जाक्मानु, मुरुमी “नेर आ तौ आब्नेर दाऊद आ बाक्तीक जाक्मेनु, दाऊदमी मेको नु गारशा सोइक्ताक्व” दे नेंपदमे बाक्त।
24 मिनु योआबम पिप आ बाक्तीक लशा “गे एको मार पनी? आब्नेर इन बाक्तीक जाक्माक्त। गे मारदे मेको कली मो लेश्शा सोइक्तीनी?
25 गे नेर आ तौ आब्नेर कली तुइक्नीनी। मेकोम इन कली जोल पा इन पर्बम रुप्चा कली नु गे मार पा बाक्नी, मेको तुइक्चा कली जाक्शो बाक्ब” देंमाक्त।
26 मिनु योआब दाऊद आ बाक्तीक रे ग्रूशा, लोव़ कुरब मुर कली आब्नेर आ नोले सोइक्ता बाक्त। मिनु मेकोम आब्नेर कली सिराह ङा कुवा रे लेश्शा चाक्दीत्मे बाक्त। तन्न दाऊदम मेको नेल्ल मतुइक्ता बाक्त।
27 मोपा आब्नेर हेब्रोनम लेश्शा जाक्मेनु, योआबमी लोव़ पचा, दे सुइ मबाक्तीकेम लदा बाक्त। मिनु आ कोव़जम थोक्गा बाक्त। मोपा मेको आसाहेल साइश्शो आ पर्बम बेक्माक्त। १राजा २:५; २सामुएल २:२३
28 मिनु नोले दाऊदम मेको लोव़ नेंशा “गो नु आं राज्य परमप्रभु यावे आ ङोंइती गेनायो नेर आ तौ आब्नेर साइश्शो आ पर्बम दोस मताइब दुम्नीकी।
29 मेको दोस योआब नु आ आफ आ खिं ङा मुर आन पियाम दुम्ल। योआब आ खिंम ग्रांग्रा यितीके रोइ पाइब कि कोव़र मुशो रोइ पाइब कि कोक्के तिक्शा गाक्ब कि तरवारम साइक्चा पुंइसीब कि जचा मताइब मुर का गेना हना यो बाक्ल” देंमाक्त।
30 मोपा योआब नु आ लोक्ब अबीशैमी आब्नेर कली सदसे बाक्त। मारदे हना आब्नेरमी मेको आस लोक्ब आसाहेल कली गिबोन ङा लडाइम साइश्शो बाक्माक्त। न्यायाधीस ८:१८-२१; २राजा १४:५
31 मिनु दाऊदमी योआब नु आ नु बाक्ब नेल्ल आन कली “इन वा खाक्कीन। मिनु भाङग्रा फेक्सीन। मिनु आब्नेर आ पर्बम रोंका पने” देंमाक्त। मिनु पिप दाऊद बेक्शो आब्नेर कुरब आन नोले गाक्माक्त।
32 मिनु आब्नेर कली हेब्रोनम थिम्मे बाक्त। मिनु पिप आब्नेर आ तुरसुम ठेयब सेंदा पा ङाक्माक्त। मिनु मुर नेल्ल यो ङाक्मा बाक्त।
33 मिनु पिपमी आब्नेर आ पर्बम रोंका पशो कुम्सो सेला बाक्त। मेकोमी “मार, आब्नेर परमप्रभु यावे आ अरेशो मटीब खोदेंशो दुम्शा, बेक्चा माल्दा?
34 इ गुइ मफ्रेंशो बाक्त। इ खोइलीम साङलो मपाइश्शो बाक्त। गे परमप्रभु यावे आ अरेशो मटीब आन ङोंइती मेकोपुकी खोदेंशो पा गोल्ते” देंमाक्त। मिनु मुर नेल्ल मेको आ पर्बम लेंशा ङाक्मा बाक्त।
35 मिनु मुरपुकीमी दाऊद कली “नां लाक्चा ङोंइती जने” देंमा बाक्त। तन्न दाऊदमी कसम जशा “नां मलाक्गा सम्म गो मारेइ जचा थोव़क मथीनुङ। थीता हना, परमप्रभुमी सजाइ गेयील” देंमाक्त।
36 मुर नेल्लेम मेको लोव़ रुप्शा बिस्समा बाक्त। मिनु ग्येरसमा बाक्त। पिप आ पशो नेल्ल दाक्तमे बाक्त।
37 मेको नाक्ती इस्राएल ङा मुर नेल्लेमी नेर आ तौ आब्नेर साइश्शोमी पिप आ दोस मबा, दे तुइक्तमे बाक्त।
38 मिनु पिपमी आ गेय पाइब आन कली “मुलाक्ती इस्राएलमी लडाइ पाइब नु ठेयब मुर का बेक्त, दे तुइक्चा माल्नीनी। १सामुएल २६:१५
39 गो तेल लुक्शो पिप दुम्ती हना यो, मुलाक्ती सक्ति मपाइश्शो दुम्शो बाक्नुङ। एको हुश ख्राक्श पोक्ब सेरूयाह आ तौ गो नु मगारनीम। परमप्रभु यावेमी मरिम्शो पाइब आन कली आन पशो क्येक्क लेप्ब” देंमाक्त। २सामुएल २:१८