2
दाऊद यहूदा ङा पिप दुम्शो
1 मेको नोले दाऊदमी परमप्रभु यावे कली “मार गो यहूदा ङा सहर काम लङा?” दे हिल्लो पवा बाक्त। मिनु परमप्रभु यावेमी “लावो” देंमाक्त। मिनु दाऊदमी “तेको सहरम लङ” दे हिल्लो पवा बाक्त। मिनु “हेब्रोन सहरम लावो” देंमाक्त। १सामुएल २३:६,९; १सामुएल ३०:७-८
2 मोपतीके दाऊद आ मीश निक्शी येज्रेल ङा अहीनोआम नु कारमेल ङा बेक्शो नाबाल आ मीश अबीगेल नु मेकेर लमाक्त। १सामुएल २५:४२-४३
3 मिनु दाऊदमी आ नु गाक्ब मुर आन खिं ङा मुर नेल्ल यो लाइक्मी बाक्त। मिनु मेकोपुकी हेब्रोन सहरमी बाक्मा बाक्त।
4 मिनु यहूदा ङा मुरपुकी जाक्शा, दाऊद कली तेल लुक्शा, आन पिप सेल्मे बाक्त। मिनु मुरपुकीमी दाऊद कली “याबेश-गिलाद ङा मुरपुकीम सावल कली थिम्तेक्म” दे नेंपदमे बाक्त। २सामुएल ५:३; १सामुएल १६:१३; १सामुएल ३१:११-१३
5 मिनु दाऊदम याबेश-गिलाद ङा मुर आन कली लोव़ कुरब मुर सोइश्शा “परमप्रभु यावेम इन कली आसीक गेवल। मारदे हना गे इन प्रभु सावल कली रिम्शो पा थिम्तीनी।
6 मिनु परमप्रभु यावेमी इन कली गेना हना यो दाक्शा मप्रोनल। मिनु गो यो इन पशो गेय आ पर्बम इन कली इनाम गेनुङ।
7 मोपतीके बोल्यो नु महिंब दुमीन। मारदे हना इन प्रभु सावल बेक्शा लत। मिनु यहूदा ङा मुरपुकीम आं कली आन पिप सेल्तीमी” दे लोव़ कुरब मुर सोइक्ता बाक्त।
इश-बोशेथ पिप दुम्शो
8 मेना सावल आ लडाइ पाइब मुर आन ठेयब मुर नेर आ तौ आब्नेरमी सावल आ तौ इश-बोशेथ कली यर्दन ओंथ हांबु महा-नाइमम चाक्गा बाक्त। १सामुएल १४:५०; उत्पत्ती ३२:२-३
9 मिनु गिलाद, अश्शुर, येज्रेल, एफ्राइम, बेन्यामीन आ थर ङा मुर नु इस्राएली नेल्ल आन पिप सेला बाक्त।
10 सावल आ तौ इश-बोशेथ इस्राएल ङा पिप दुम्मेनु ४० बर्स दुम्शो बाक्माक्त। मेकोमी बर्स निक्शी सम्म सासन पवा बाक्त। तन्न यहूदा ङा मुर दाऊद आ नोले खोदमे बाक्त।
11 दाऊदमी हेब्रोन सहरम यहूदा ङा मुर आन कली ७ बर्स ६ महिना सम्म सासन पवा बाक्त।
आसाहेल बेक्शो
12 नेर आ तौ आब्नेर, सावल आ तौ इश-बोशेथ नु आ गेय पाइबपुकी महा-नाइम रे गिबोन लमा बाक्त।
13 सेरूयाह आ तौ योआबमी दाऊद आ गेय पाइब आन कली लाइश्शा गिबोन ङा दोम्लीम लडाइ पवा बाक्त। मेको निक्शी गिबोन ङा दोम्लीम ग्रुम्सा बाक्त। मिनु काम दोम्ली आ आइक्ची हांबुम, काम दोम्ली आ ओंथ हांबुम आस लडाइ पाइब आन कली राप्पदसे बाक्त। १सामुएल २६:६; यहोसु ९:३,१७
14 मिनु आब्नेरम योआब कली “इ लडाइ पाइब मुर नु आं लडाइ पाइब का का पा ग्रुम्शा इस ङोंइती लडाइ पामेक्ल” देंमाक्त। मिनु योआबमी “दुम्ब, मो पामेक्ल” देंमाक्त।
15 मोपतीके मेकोपुकी ग्रूशा लशा, बेन्यामीन नु सावल आ तौ इश-बोशेथ आन मुर १२ जना नु दाऊद आ मुर १२ जना का का पा राम्मा बाक्त।
16 मिनु मेको नेल्लेमी आंम आंम जोरी सत्रु आन पियाम ग्याइश्शा कोखाम तरवारम आप्मे बाक्त। मोपा नेल्ल कालेम बेक्मा बाक्त। मोपतीके गिबोन आ नेक्था ङा रू कली हेल्काथ-हच्चुरीम देंनीम। मेको नें आ अर्थ तरवार आ क्योरतीक देंसीब।
17 मेको नाक्त थम ठेयब लडाइ दुम्माक्त। मिनु आब्नेर नु इस्राएल ङा मुर दाऊद आ मुर आन क्येङा ब्रुमा बाक्त।
18 सेरूयाह आ तौ सांफा योआब, अबीशै नु आसाहेल मेकेर बाक्शो बाक्मा बाक्त। आसाहेल ब्वाकी ङा दोरब किश्श खोदेंशो रीब पा गेय पाइब बाक्माक्त। १इतिहास २:१६
19 मेकोम ग्युरा पेरा एर ओंथ मारेइ मकोव़थु दोरशा आब्नेर कली खेदा पवा बाक्त।
20 मिनु आब्नेरम नोले लेश्शा कोव़शा “मार गे आसाहेल नवे?” दे हिल्लो पवा बाक्त। मिनु आसाहेलमी “गो नङ” देंमाक्त।
21 मिनु आब्नेरमी “ग्युरा गे कि पेरा गे लशा, लडाइ पाइब का कली आ मार मार रोइक्तो” देंमाक्त। तन्न आसाहेलमी मेको कली खेदा पचा मप्रोना बाक्त।
22 मिनु आब्नेरमी लेंशा “आं कली खेदा पचा प्रोंइयी। गो इ कली मारदे साइक्नुङा? इ लोक्ब योआब आ ङोंइती दोपा आं कुल कोंइनुङा?” देंमाक्त।
23 तन्न आसाहेल एर ओंथ लने मबिस्से बाक्त। मिनु आब्नेरमी आ तूतीक नोले गे आप्शा मेको आ कोव़ज ख्रिदा बाक्त। मिनु मेकेर गोल्शा बेक्माक्त। मिनु आसाहेल बेक्शो बाक्तीके जाक्शा मुर नेल्ल दिक्मा बाक्त। २सामुएल ३:२७
24 मिनु योआब नु अबीशैमी आब्नेर कली खेदा पस ङा पस पाम्से बाक्त। मिनु नां मलाक्थु, मेकोपुकी अम्माह डांडा जाक्मा बाक्त। अम्माह डांडा गिअह आ ङोंइती, गिबोन रे गोरशो रागी ङा लांम बाक्ब।
25 बेन्यामीन आ थर ङा मुर आब्नेर गे बुक्मा बाक्त। मिनु हुल का दुम्शा, अम्माह डांडा तार लडाइ पचा कली ठीक दुम्मा बाक्त।
26 मिनु आब्नेरमी ठेयब सेंदा पा योआब कली “मार, गेना हना यो क्योरमुस ङा मुस, साइक्मुस ङा साइक्मुस बाक्चा? मेको नोले मरिम्शो दुम्ब, दे गे मतुइक्नेवे? आंम लोक्ब आन कली खेदा पचा प्रोंइचा, दे इ मुर आन कली ममाइक्नेवे?” देंमाक्त।
27 मिनु योआबमी “परमप्रभु ब्रोंइशा बाक्शो खोदेंशो पा, गे मो मदेंशो नवे हना, मुरपुकीम दीसा सुनी सम्म यो आन लोक्ब आन कली खेदा पचा मप्रोनेम वा” देंमाक्त।
28 मिनु योआबम तुराही तबा बाक्त। मिनु मुर नेल्लेमी इस्राएली आन कली खेदा पचा प्रोन्मे बाक्त। मिनु लडाइ नांइसे बाक्त।
29 आब्नेर नु आ मुरपुकी नाक्दो रे अराबाह रे गाक्शा यर्दन खोला शोक्समा बाक्त। मिनु सुनी रे गाक्शा महा-नाइमम जाक्दीम्मा बाक्त।
30 मिनु योआबमी आब्नेर कली खेदा पचा प्रोंइशा, लडाइ पाइब आन कली पुक्मी बाक्त। मिनु आसाहेल प्रोंइशा, दाऊद आ मुर १९ जना मबाक्मा बाक्त।
31 तन्न दाऊद आ लडाइ पाइबपुकीमी बेन्यामीन आ थर ङा मुर नु आब्नेर आ नोले खोइक्ब ३ सहे ६० जना आन कली सदमे बाक्त।
32 मेकोपुकीम आसाहेल कली कुरशा लाइश्शा, आ आफ आ तुरस बेथलेहेम सहरम थिम्मे बाक्त। मेको नोले योआब नु आ मुरपुकी नाक्दो रे गाक्शा नां सोव़ सोव़ हेब्रोन सहरमी जाक्दीम्मा बाक्त।