18
अब्सालोम साइक्चा पुंइसीशो
1 दाऊदमी आं नु बाक्शो मुर आन कली लडाइ पचा कली पुक्मी बाक्त। मिनु हजार का नु सहे का ङा मुर आन कप्तान योव़मी बाक्त।
2 मिनु नोले दाऊदमी आ लडाइ पाइब आन कली भाग सां सेल्मी बाक्त। भाग का योआब आ हुकुममी, भाग का सेरूयाह आ तौ अबीशै योआब आ लोक्ब आ हुकुममी नु भाग का गित्त आ खिं ङा मुर इत्ताइ आ हुकुममी गेमी बाक्त। मिनु पिपमी “गो यो गेपुकी नु लडाइम लाइनुङ” देंमाक्त। २सामुएल १५:१९
3 तन्न मेकोपुकीमी “ममाइ, गे चहिं मलने। ब्रुशा प्रोक्चा माल्ताक्क हना, आंइ कली सुइम मतुइक्नीम। गो उइक्थ बेक्तक हना यो, मेकोपुकीम आंइ कली मकोव़नीम। तन्न गे आंइ १० हजार खोदेंशो बाक्नीनी। मोपतीके गे सहरम बाक्शा, आंइ कली वारच पाइतीनी हना, रिम्शो दुम्ब” देंमा बाक्त।
4 मिनु पिपमी “मो हना गो, गे मार देंनी, मेको पाइनुङ” देंमाक्त। मिनु मेको ठेयब लाप्चोम राप्शा बाक्माक्त। मिनु लडाइ पाइबपुकी हजार का, सहे का ङा हुल पा आ ङोंइती रे लमा बाक्त।
5 पिपमी योआब, अबीशै नु इत्ताइ आन कली “गो आं पर्बम मेको ठिटा अब्सालोम नु मरिम्शो मपने” दे अब्सालोम आ पर्बम लडाइ पाइब आन कली अरेशो मुर नेल्लेम नेन्मे बाक्त। २सामुएल १८:१२
6 मिनु लडाइ पाइबपुकी इस्राएली नु लडाइ पथ जाक्दीम्मा बाक्त। मेको लडाइ एफ्राइम ङा ब्वाकीम दुम्माक्त।
7 मेकेर दाऊद आ मुरपुकीम इस्राएली आन कली फ्रूमे बाक्त। मेको नाक्ती थम ठेयब लडाइ दुम्शा २० हजार मुर बेक्मा बाक्त।
8 लडाइ राज्य आ एर ओंथ नेल्ल ब्रमाक्त। तरवारम साइश्शो क्येङा ब्वाकीम साइश्शो मुर शुश दुम्मा बाक्त।
9 अब्सालोममी दाऊद आ मुर कली तवा बाक्त। अब्सालोम आ खच्चर ङोइश्शो बाक्माक्त। मेको खच्चर शुश राशी पाइश्शो ठेयब बोल्यो रवा का आगा रे ग्रीशा लमाक्त। मिनु अब्सालोम आ चां मेको बोल्यो रवा आ राशीम ब्वेक्ता बाक्त। मिनु मेको ग्युक्शा लीमाक्त। आ खच्चर चहिं ग्रीशा लाक्गा बाक्त।
10 मुर कामी मेको तशा योआब कली “गो अब्सालोम कली बोल्यो ठेयब रवा काम ग्युक्शा लीशो ताता” मदा बाक्त।
11 योआबमी मेको मुर कली “गे मेको कली मोपा तशा, मारदे मसदी? गो इ कली १० टुक्रा चांदी नु काम्बरी का गेन वा” देंमाक्त।
12 मेको मुरुम योआब कली “गे आं कली हजार का टुक्रा चांदी गेतीनी हना यो, गो पिप आ तौ आ पर्बम आं गुइ मक्युक्नुङ। मारदे हना पिपमी ‘मेको ठिटा अब्सालोम कली सुम थिप्बा, मेकोमी रिम्शो पने’ दे अबीशै, इत्ताइ नु इन कली देंशो गो नेल्लेम नेंतक। २सामुएल १८:५
13 मिनु गो मेको कली मरिम्शो पा साइक्ता हना, मेको लोव़ पिपमी रीब पा नेंब। मिनु गे दोस मताइब दुम्नीनी” देंमाक्त।
14 मिनु योआबमी “गो गे नु लोव़ पा मग्योल्नुङ” देंमाक्त। मिनु मेकोमी तूतीक सां शेशा, अब्सालोम मो पा रवाम ग्युक्शा बाक्मेनु, आ कुचुमी थोक्गा बाक्त। मेना सम्म अब्सालोम सेस बाक्शो बाक्माक्त।
15 मिनु योआब आ या कुरब १० जना मुरुम अब्सालोम कली आ एर ओंथ बाक्शा, मेको कली आप्शा सदमे बाक्त।
16 मिनु योआबम तुराही तबा बाक्त। मिनु लडाइ पाइबपुकी इस्राएली आन कली खेदा पचा प्रोंइशा, लेम्मा बाक्त। मारदे हना योआबम लडाइ पाइब आन कली तेक्मी बाक्त।
17 मेकोपुकीम अब्सालोम आ बेक्शो रां लाइश्शा, ब्वाकी ङा ठेयब ढोडोङगा काम ताइक्तमे बाक्त। मिनु मेको तार शुश फुल्लु पुक्गमे बाक्त। मिनु इस्राएली नेल्ल आन आन खिं प्रोक्मा बाक्त। यहोसु ८:२९
18 ङोंइती अब्सालोममी पिप आ बेंसीम थाम का ख्रुक्शो बाक्माक्त। मारदे हना मेकोमी “आं नें वोइक्चा कली आं तौ मबाक्ब” देंशो बाक्माक्त। मेकोमी मेको थाम कली आ नें वोइश्शो बाक्माक्त। मुल सम्म मेको थाम कली अब्सालोम आ थाम देंसीब। २सामुएल १४:२७
19 मिनु सादोक आ तौ अहीमाजम “परमप्रभु यावेम क्येक्क लेत्ताक्व। मिनु पिप कली आ जोरी सत्रु आन गुइ रे प्रोंइतु, देंचा कली आं कली दोरपा सोइक्तीनी” देंमाक्त। २सामुएल १५:३६; २सामुएल १७:१७
20 तन्न योआबमी मेको कली “मुलाक्ती इ लोव़ लाइक्तीक नाक्त ममाइ। अर्को नाक्ती गे लोव़ लाइक्चा माल्नेवे। मारदे हना मुलाक्ती पिप आ तौ बेक्शो बाक्ब” देंमाक्त।
21 मिनु योआबमी कूश आ खिं ङा मुर का कली “लशा, इ तशो नेल्ल पिप कली नेंपतो” दे मदा बाक्त। मिनु मेको कूश आ मुर योआब कली बाप्शा सेउ पा दोरशा लमाक्त।
22 मिनु सादोक आ तौ अहीमाजम लेंशा, योआब कली “मार दुम्त हना यो आं कली कूश ङा मुर आ नोनोले दोरशा लचा गेयीनी” देंमाक्त। मिनु योआबमी “आं तौ गे मारदे लाइनेवे? इ लोव़ आ पर्बम गे मारेइ इनाम मताइनेवे” दे मदा बाक्त।
23 मिनु मेकोमी “मार दुम्त हना यो, गो दोरशा लाइनुङ” देंमाक्त। मिनु योआबमी “मो हना लावो” देंमाक्त। मिनु अहीमाज यर्दन ङा बेंसी रे पा दोरमाक्त। मिनु मेकोम कूश आ खिं ङा मुर कली ग्रामाक्त।
24 मेना दाऊद लाप्चो निक्शी आस दातेमी बाक्शो बाक्माक्त। खाल पाइबमी गारो आ तार लशा कोव़ङा बाक्त। मिनु मुर का दोरशा पिशो तवा बाक्त।
25 मिनु मेको खाल पाइबम पिप कली ठेयब सेंदा पा देंमाक्त। मिनु पिपमी “मेको आ का ला बाक्त हना, मारेइ लोव़ चाक्तु” देंमाक्त। मेको मुर आन नेक्था जाक्माक्त।
26 मिनु मेको खाल पाइबमी अर्को मुर का यो दोरशा पिशो तवा बाक्त। मिनु लाप्चो खाल पाइब कली “कोव़ङीन, दे अर्को मुर का यो आ कान दोरशा पिन पिन बाक्ब” देंमाक्त। मिनु पिपमी “मेकोम यो लोव़ चाक्गा माइ” देंमाक्त।
27 मिनु मेको खाल पाइबमी “मेरे ङोंइती दोरब सादोक आ तौ अहीमाज खोदेंशो पा दोरत” देंमाक्त। मिनु पिपमी “मेको रिम्शो मुर बाक्ब, मेकोम रिम्शो लोव़ चाक्गा माइ” देंमाक्त।
28 मिनु अहीमाजम पिप कली ठेयब सेंदा पा “नेल्ल रिम्शो बाक्ब” देंमाक्त। मिनु पिप आ ङोंइती खुम्की पा बाप्शा, पिप कली “परमप्रभु यावे, इन परमप्रभु ठेयब बाक्ब। मेकोम आं प्रभु, पिप इन कली मरिम्शो पाइब आन कली इन गुइमी गेशो बाक्ब” देंमाक्त।
29 मिनु पिपमी “मार मेको ठिटा अब्सालोम रिम्शोन बाक्मे?” देंमाक्त। मिनु अहीमाजम “इन गेय पाइब योआबम आं कली सोइक्तानु, गो ठेयब ग्रांग्ये माग्ये दुम्शो ताता। तन्न मार दुम्शो बाक्मे मतुइक्नुङ” देंमाक्त।
30 मिनु पिपमी मेको कली “गे मेकेर राप्शा बाक्को” दे मदा बाक्त। मिनु मेको मेकेर राप्शा बाक्माक्त।
31 मिनु मेको कूश आ मुर जाक्शा मेकोमी “आं प्रभु, आ पिप, इन कली नेल्ल रिम्शो बाक्ब। मारदे हना मुलाक्ती परमप्रभु यावेमी इन कली मरिम्शो पाइब आन गुइ रे प्रोंइशो बाक्ब” देंमाक्त।
32 मिनु पिपमी मेको कूश आ मुर कली “मेको ठिटा अब्सालोम रिम्शोन बाक्मे” दे हिल्लो पवा बाक्त। मिनु मेको कूश आ मुरुमी “आं प्रभु, पिप आ जोरी सत्रु नु मरिम्शो पाइब नेल्ल मेको ठिटा खोदेंशो दुम्मल” देंमाक्त।
33 मिनु पिप आ थुं ग्येत्थ लुक्च दुम्शा, मेको ठेयब लाप्चो आ तार ङा कोठाम लशा ङाक्माक्त। मिनु गाक्ना गाक्न लमेनु “आं तौ अब्सालोम, आं तौ अब्सालोम, इ पा ङा गो बेक्शो नङ हना, दुम वा। अब्सालोम! आं तौ, आं तौ” दे ङाक्माक्त।