17
अहीथोफेल आ अर्ती क्याम्शो
1 अहीथोफेलम अब्सालोम कली “आं कली १२ हजार योव़शो मुर गेयीनी। मिनु गो मुलाक्दो दाऊद कली खेदा पाइनुङ।
2 मेको दशा, आ थुं लुक्च लशा बाक्मेनु, मेको कली थित्नुङ। मिनु मेको नु बाक्ब मुर नेल्ल ब्रशा प्रोक्नीम। मिनु गो पिप कली ला साइक्नुङ, अरु सुइ मसाइक्नुङ।
3 मिनु गो इस्राएली नेल्ल आन कली ग्युम्ली आ ग्युम्ले बाक्तीक जाक्शो खोदेंशो पा इन बाक्तीक चाक्नुङमी। गे मुर का आ सोक्त माल्ना माल्न बाक्नीनी। लीशो मुर मारेइ मदुम्नीम” देंमाक्त।
4 मिनु अब्सालोम नु इस्राएल ङा खाल्पा नेल्लेम अहीथोफेल आ अर्ती दाक्तमे बाक्त।
5 तन्न अब्सालोमम “अरकी आ हुशाइ कली ब्रेत्तीन। मेकोमी मार देंबा, मेको नेंय” देंमाक्त। २सामुएल १६:१६
6 मिनु हुशाइ अब्सालोम आ ङोंइती जाक्मेनु, अब्सालोममी “अहीथोफेल आ देंशो नेल्ल शेंदा बाक्त। मेको आ देंशो पचा, दे मपचा? मपचा हना, गे मार मिम्नेवे देंनो” देंमाक्त।
7 मिनु हुशाइमी अब्सालोम कली “एको मुल ङा अहीथोफेल आ देंशो ठीक मदुम्ब” देंमाक्त।
8 मिनु हुशाइमी लेंशा “गे इन आफ नु मेको नु बाक्ब मुरपुकी थम जोक्ब लडाइ पाइबपुकी बाक्नीम, दे तुइक्नीनी। मेकोपुकी चाइक्ब रोइक्चा पुंइसीशो वां खोदेंशो दुम्शो बाक्नीम। इन आफ लडाइ पतीकेम जोक्ब तुइक्ब बाक्ब। मेको नाक्दो आ लडाइ पाइब नु काथा मबाक्ब।
9 मुल यो मेको तेकोइ ढोडोङगा नु अरु बाक्तीकेमी ख्रुइश्शा बाक्म माइ? मिनु इं लडाइ पाइबपुकी ङोंइती साइक्चा पुंइसाक्म हना, मेको नेंबपुकीमी ‘अब्सालोम आ नोले खोइक्बपुकी बेक्ना बेक्न बाक्नीम’ देंशो नेंनीम।
10 मोदेंशो दुम्मेनु, महिंब गुप्स खोदेंशो थुं पाइश्शो लडाइ पाइब मुर यो हिंनीम। मारदे हना इस्राएली नेल्लेमी इन आफ बोल्यो लडाइ पाइब मुर बाक्ब, दे तुइक्नीम। मेको नु बाक्ब थम बोल्यो बाक्नीम, दे तुइक्नीम।
11 आं अर्ती चहिं मार बाक्ब देंशा हना, दान रे बेयर-शेबा सम्म ङा इस्राएली नेल्ल आन कली खुप्चा माल्नीम। मेको समुन्द्र ङा बाल्वा खोदेंशो पा शुश बाक्नीम। मिनु गे मोदेंशो पा लडाइ पथ लने।
12 मिनु मेको ते बाक्त हना यो, गो मेको कली थिश्शा लडाइ तोइनय। गो सीत यिशो खोदेंशो पा मेको तार जुक्नय। मिनु मेको नु मेको कली खोइक्ब का यो ब्रोंइचा मताइनीम।
13 मेको प्रोक्शा सहर लशा, बाक्तीक पुंइशा बाक्त हना यो गो इस्राएली नेल्ल मेकेर लशा मेको सहर कली डोरीम कीशा फुल्लु का यो ख्रोप्शा मलीपाइक्थु, दिंमम चाक्नय” दे हुशाइमी देंमाक्त।
14 मिनु अब्सालोम नु इस्राएली नेल्लेमी “अहीथोफेल आ अर्ती क्येङा अरकी आ हुशाइमी गेशो अर्ती रिम्शो बाक्ब” देंमा बाक्त। मारदे हना परमप्रभु यावेमी अहीथोफेल आ अर्ती क्याम्शा, अब्सालोम कली खतम पोक्चा कली मो पवा बाक्त। २सामुएल १५:३१-३४
15 मिनु नोले हुशाइमी चढ़ेब सादोक नु अबीयाथार आस कली अहीथोफेलम अब्सालोम नु इस्राएल ङा खाल्पा आन कली गेशो अर्ती नु आ गेशो अर्ती नेल्ल शेंदीम्सी बाक्त।
16 मिनु गे दाऊद कली “गोरशो रागी आ सुरम बास मबाक्थु, गोरशा रागी लाक्शा गाक्कीन। मो मपाइतीनी हना, पिप नु आ नु बाक्ब नेल्ल साइक्चा पुंइसीनीम” देंमाक्त।
17 मेना योनाथन नु अहीमाज एन-रोगेलमी रिम्शा बाक्शो बाक्सा बाक्त। मिनु वाइलीम का लशा, मेको आस कली शेंबाक्माक्त। मिनु मेको निक्शीमी पिप दाऊद कली शेंबाक्सा बाक्त। मारदे हना सहर ङा मुरुम मतामेक्ल, दे मो पाइक्बाक्मा बाक्त। २सामुएल १५:३६; यहोसु १५:७-८
18 तन्न मेना वोंइश आल काम मेको आस कली तशा, अब्सालोम कली शेंदा बाक्त। मोपतीके मेको निक्शी रीब पा बाहुरीम ङा मुर का आ खिं जाक्दीस्सा बाक्त। मेको आ लाङगाम इनार का बाक्माक्त। मिनु मेको निक्शी मेको आगा ओव़सा बाक्त।
19 मेको खिं ङा मुर आ मीशेमी सुम्तीक का चाक्शा, मेको तार बिस्कुन हामा बाक्त। सुइम मारेइ मतुइक्तमे बाक्त।
20 मिनु अब्सालोम आ गेय पाइब मुरपुकी जाक्शा, मेको मीश मुर कली “अहीमाज नु योनाथन ते बाक्सा” दे हिल्लो पामे बाक्त। मिनु मेकोमी “मेको निक्शी आइक्ची हांबु लाक्ताक्स” देंमाक्त। मेको मुरपुकीम एर ओंथ माल्मे बाक्त, तन्न मथिदमे बाक्त। मोपतीके मेकोपुकी यरूसलेम लेम्मा बाक्त।
21 मिनु मेकोपुकी लमा नोले मेको निक्शी इनार रे ग्रूसा बाक्त। मिनु मेको लशा पिप दाऊद कली नेल्ल शोव़ङसे बाक्त। मेको निक्शीमी दाऊद कली “बोक्कीन, रीब पा खोला शोक्सीन” देंसा बाक्त। अहीथोफेल आ देंशो अर्ती ङा लोव़ यो शेंदसे बाक्त।
22 मोपतीके दाऊद नु आ मुरपुकी रीब पा यर्दन खोला शोक्सीमा बाक्त। बुरुरु पा हाम्सो दुम्मेनु, आइक्ची हांबु मजाक्दीप्ब, सुइ मलीमा बाक्त।
23 मिनु अहीथोफेलमी आ अर्ती ङा लोव़ मबिश्शो तुइश्शा, आ गधा ठीक पा आ सहर ङा खिं लमाक्त। मिनु आ खिं ङा मुर आन कली देंचा माल्शो लोव़ देंशा, आं चहिं ग्युक्शा बेक्माक्त। मेको मोपा बेक्शा आ आफ आ तुरसुम थिम्चा पुंइसे बाक्त। १सामुएल ३१:४; १राजा १६:१८; मत्ती २७:५
24 मिनु दाऊद महा-नाइमम जाक्दीम्माक्त। मेना अब्सालोम नु मेको नु बाक्शो इस्राएली यर्दन खोला शोक्सीने थुम्मे बाक्त। २सामुएल २:८
25 अब्सालोमम योआब आ पा ङा इश्माएली इथ्रा आ तौ आमासा कली कप्तान सेला बाक्त। इथ्रामी अबीगेल कली ग्युंबे पवा बाक्त। अबीगेल, नाहाश नु सेरूयाह आस समी आ तमी बाक्माक्त। सेरूयाह योआब आ ममा बाक्माक्त।
26 इस्राएलीपुकी नु अब्सालोमम गिलादमी आन बाक्तीक सेल्मे बाक्त।
27 मिनु दाऊद महा-नाइमम जाक्मेनु, रब्बाहम बाक्ब अम्मोनी नाहाश आ तौ शोबी, लो-देबारम बाक्ब अम्मीएल आ तौ माकीर नु रोगेलीम बाक्ब गिलाद आ मुर बारजील्लाइम, १इतिहास १९:१; २सामुएल ९:४; १राजा २:७
28 ब्रतीक फेक्तीक, ग्योंबपुकी, खप के ग्योंबपुकी, क्योव़ज नु चेरब, फस, सिबी, दाल,
29 खुदो, दहि, भेडा नु दूध के सेल्शो जचा थोव़क दाऊद नु मेको नु बाक्ब मुर आन कली चाक्शा, गेमे बाक्त। मारदे हना मेकोपुकीम दाऊद नु आ मुरपुकी गोरशो रागीम शोव़लु बेक्शो, तूतू दाक्शो नु थाम्पा दशो बाक्नीम, दे तुइक्त्मे बाक्त।