96
परमप्रभु रागी नेल्ल ङा पिप बाक्ब
१इतिहास १६:२३-३३
1 परमप्रभु यावे कली नक कुम्सो का पय। रागी रागी ङा मुर नेल्लेमी परमप्रभु यावे कली कुम्सो पने।
2 परमप्रभु यावे कली कुम्सो पने। आ नें ठेयब सेलीन। गे नाक्त किंत किंत मेको मुर आन कली श्येत रे प्रोंइशो आ पर्बम रागी रागी ङा मुर आन कली शेंदीने।
3 रागी रागी ङा मुर आन दातेमी मेको आ सक्ति आ पर्बम लोव़ पने। जात जात ङा मुर आन दातेमी आ छक लाक्चा ङा गेय आ पर्बम लोव़ पने।
4 मारदे हना परमप्रभु यावे ठेयब बाक्ब। ठेयब सेल्शा मान पाइक्चा पुंइसीब बाक्ब। मेको देवी देवता नेल्ल आन क्येङा मान पा हिंचा माल्शो बाक्ब।
5 मारदे हना जात जात ङा मुर आन देवी देवता शोर गाक्शो मूर्ति ला बाक्नीम। तन्न परमप्रभु यावेमी सरीङ सेल्तु।
6 मान ततीके नु नेल्ल क्येङा ठेयब दुम्तीके मेको नु बाक्ब। मेको आ बाक्तीक सक्ति नु छेङछेङम ब्रीशो बाक्ब।
7 गे रागीम बाक्ब खिं खिं ङा मुरपुकीमी परमप्रभु यावे कली “गे सक्ति नु छेङछेङ पाइश्शो बाक्नीनी” दे ठेयब सेलीन।
8 गेपुकीमी परमप्रभु यावे आ नें थिशा, मेको कली “गे ठेयब बाक्नीनी” देनीन। चढ़ेतीक चाक्शा, मेको आ बाक्तीक ङा लाङगाम जाक्कीन।
9 रिम्शो पतीकेमी ग्योम्सीशा, परमप्रभु यावे कली “गे ठेयब बाक्नीनी” दे लोव़ पने। रागी ङा मुर नेल्ले मेको आ ङोंइती मेको कली मान पा ख्रिंख्रि पने।
10 गे रागी रागी ङा मुर आन दातेमी “परमप्रभु यावे पिप बाक्ब” दे शेंदीन। रागी महिम्सीचा ङा पा सेल्शो बाक्ब। मेको मयाक्सीब। मेकोमी जात जात ङा मुर आन कली कुल मकोव़थु निसाफ पाइब। भजन संग्रह ९३:१
11 सरीङ नु रागी ग्येरसीसल। समुन्द्र नु मेकेर बाक्ब नेल्ल रेयके पामेक्ल। भजन संग्रह ९८:७-९; यसैया ४९:१३
12 रू नु मेकेर वाशो नेल्ल ग्येरसीमल। मिनु ब्वाकीम बाक्शो रवा नेल्ल ग्येरशा,
13 परमप्रभु यावे आ ङोंइती कुम्सो पाइनीम। मारदे हना परमप्रभु यावे जाक्ब। मेको रागी कली निसाफ पथ जाक्ब। मेकोमी रागी नेल्ल कली ठीक पतीकेमी निसाफ पाइब। मिनु जात जात ङा मुर आन कली थमा पा आन कुल मकोव़थु निसाफ पाइब। भजन संग्रह ८२:८; प्रेरित १७:३