95
ठेयब सेल्तीक कुम्सो पय
1 जाक्कीन, ग्येरसीशा परमप्रभु यावे कली कुम्सो पय। इं कली श्येत रे प्रोंइब सेरथे फुल्लु कली ठेयब सेंदा पा कुम्सो पय।
2 “गे रिम्शो पाइब बाक्नीनी” देंना देंन, मेको आ ङोंइती लय। कुम्सो पा मेको कली ठेयब सेल्य।
3 मारदे हना परमप्रभु यावे ठेयब परमप्रभु बाक्ब। देवी देवता नेल्ल आन ठेयब पिप बाक्ब। प्रस्थान १५:११
4 मिनु रागी ङा उइ रे डांडा ङा इर सम्म नेल्ल मेको आ गुइम बाक्ब।
5 समुन्द्र नु सोव़शो रागी नेल्ल मेको आ सेल्शो बाक्ब।
6 जाक्कीन, मेको कली बाप्शा ठेयब सेल्य। इं कली सेल्ब, परमप्रभु यावे आ ङोंइती पोक्च थेक्तय।
7 मारदे हना मेको इं परमप्रभु बाक्ब। गो मेको आ योव़शो भेडा नय। मिनु मुलाक्त मेको आ सेंदा नेनीन। भजन संग्रह १००:३; यूहन्ना १०:२७-२८
8 गेपुकी मेरीबाम पशो खोदेंशो पा इन थुं खकटा मसेलीन। गेपुकी गोरशो रागी मास्साह माइश्शोमी बाक्ची ना पशो खोदेंशो मपने। हिब्रू ३:७-८; हिब्रू ४:७
9 परमप्रभुमी “इन किकी पिपीमी आं पशो गेय नेल्ल ताम्तेक्म हना यो, मेकोपुकीमी आं कली नाक्शा कोव़तीमी। प्रस्थान १७:२,७
10 गो ४० बर्स सम्म मेकोपुकी नु गाइक्ताक्ङ। एको दूली पाइब मुर बाक्नीम। आं कली मटीब बाक्नीम।
11 मोपतीके गो आं गाइक्तीकेमी ‘एको आन कली आं थुं नाइक्पाइक्तीके मगेनुङ’ दे कसम जाता” दे परमप्रभुम देंत। गन्ती १४:२२-२३; हिब्रू ४:३