119
परमप्रभु आ अरेशो लोव़ ठेयब सेल्शो
एको भजन संग्रह कली सुन के हिब्रू आकछेर यो देंनीम। मारदे हना मेको आ टुक्रा टुक्रा हिब्रू लोव़ ङा आल्फाबेट रे पा गोइनीम। ङोंइती ङा टुक्रा आलेफ देंसीब, अध्याय नेल्ल आन ङोंइती ङा हिब्रू आकछेर लोव़मी आलेफ बाक्ब।
आलेफ
1 सु सु रिम्शो पाइनीमी नु दोस मताइब बाक्नीमी, मेको ग्येरसीशो मुर बाक्नीम। मारदे हना मेकोपुकीमी परमप्रभु यावे आ अरेशो टिशो बाक्नीम। भजन संग्रह ११२:१-२
2 सु सुमी परमप्रभु आ देंशो मिम्शा पाइनीमी नु आन थुं नेल्लेमी मेको कली माल्नीमी, मेकोपुकी ग्येरसीशो मुर बाक्नीम।
3 मेको मुरपुकी काइ मरिम्शो मपथु, परमप्रभु आ लांम गाक्नीम।
4 गे इन ब्रेक्शा अरेशो आंइ कली होस पा पचा कली गेशो बाक्तीनी।
5 गो गेना हना यो इन फुल्लुम मुशा ब्रेक्शो लोव़ पशा गाक्ङल।
6 गो इन शेंतीके नेल्ले होस पा पशो नङ हना, मुने मदोक्ङ वा।
7 गो इन निसाफ पतीक लोव़ शेंसाक्यी हना, इन कली रिम्शो थुंमी ठेयब सेल्ने चाप्नुङ।
8 गो इन फुल्लुम मुशा ब्रेक्शो लोव़ टीनुङ। आं कली काइ मप्रोंइयीनी।
बेथ
9 ठिटा वोंइश मुर दोपा हेंथे मपथु, आन लांम गाक्ने चाप्नीमी? मेको इन लोव़ टिशा ला मो पने चाप्नीम।
10 गो आं थुं नेल्लेमी इन कली माल्नुङ। आं कली इन शेंतीके रे ङोन लचा मगेयीनी।
11 गो मरिम्शो मपङल, दे इन लोव़ आं थुंम वोइश्शो बाक्नुङ।
12 परमप्रभु यावे, इन नें ठेयब बाक्ब। आं कली इन फुल्लुम मुशा ब्रेक्शो लोव़ शेंदीनी। भजन संग्रह ११९:२६,६४,६८
13 गो इन देंशो पतीक लोव़ नेल्ल शेंनुङमी।
14 गो शुश शोंप तशा ग्येरसीशो मुर खोदेंशो पा इन देंशो लां तशा ग्येरसाक्यी।
15 गो इन ब्रेक्शा अरेशो मिम्ना मिम्न, इन लां कोव़शा गाक्नुङ।
16 गो इन फुल्लुम मुशा ब्रेक्शो लोव़ तुइश्शा, ग्येरसाक्यी। इन लोव़ मप्रेंनुङ।
गिमेल
17 इन गेय पाइब कली रिम्शो पने। मिनु गो इन लोव़ टिशा ब्रोंइङल।
18 गे आं कली मिक्च ताइब सेल्यीनी। मोपा गो इन अरेशो लोव़ ङा छक लाक्चा ङा गेय तने चबुल।
19 गो रागीम पौना का बाक्नुङ। गे इन शेंतीके लोव़ आं मतुइक्चा ङा पा मख्रुइक्तीन। भजन संग्रह ३९:१३
20 आं थुं गेना हना यो इन पतीक लोव़ तुइक्चा कली माल्स ङा माल्स बाक्ब।
21 गे इन शेंशो प्रोंइब ठेयब लेश्शो नु सराप रशो मुर आन कली हुइक्नीनी। ब्यवस्था २७:२६; गलाती ३:१०
22 गे मेको आन शुक्शी पतीके नु दोस गेतीके आं क्येङा ङोन वोतीन। मारदे हना गो इन देंशो टीब मुर बाक्ती।
23 मिनु सासन पाइबपुकी बुक्शा, आं कली मरिम्शो पाइक्चा कली लोव़ गारपाइक्नीम। मो हना यो गो, इन गेय पाइबमी, इन फुल्लुम मुशा ब्रेक्शो लोव़ मिम्स ङा मिम्स बाक्नुङ।
24 इन देंशो लोव़ आं थुं ग्येरपाइक्ब नु आं कली अर्ती गेब बाक्नीम।
दालेथ
25 आं थुं लुक्च लशो बाक्ब। इन लोव़ पतीकेमी आं थुं बारपाइय्यीनी।
26 गो इन कली आं पशो तुइक्पाइक्तन्नी। मिनु गे आं लोव़ लेत्ताक्नी। इन फुल्लुम मुशा ब्रेक्शो लोव़ शेंदीनी।
27 गे इन ब्रेक्शा अरेशो लोव़ रुप्पाइय्यीनी। मिनु गो इन छक लाक्चा ङा गेय मिम्स ङा मिम्स बाक्नुङ।
28 आं थुं सुर्ता पा लुक्च लत। इन लोव़ पतीकेमी आं कली ब्रोंइचा गेयीनी।
29 दूली लां आं क्येङा ङोन वोतीन। मिनु गे शिशी पा इन अरेशो लोव़ शेंदीनी। भजन संग्रह ११९:१०४,१२८
30 गो इन कली मप्रोंइतीक लां योव़ता। गो इन पतीक लोव़ आं ङोंइती वोइक्ता।
31 परमप्रभु यावे, गो इन देंशो थमा पा पाइनुङ। आं कली मुने मदोक्पाइय्यीनी।
32 गो इन शेंशो पना पन बाक्ती। मिनु गे आं रुप्तीक थुं बारपाइक्नीनी।
हे
33 परमप्रभु यावे, इन फुल्लुम मुशा ब्रेक्शो लोव़ शेंदीनी। मिनु गो मेको नोले सम्म मप्रोंइनुङ।
34 गे आं कली रुप्तीक थुं गेयीनी। मिनु गो इन अरेशो लोव़ आं थुं नेल्लेमी पाइनुङ।
35 इन शेंतीके लांम गाक्पाइय्यीनी। मारदे हना गो मेको कली दाक्नुङ।
36 आं थुं कली इन देंशो ला मिम्पतीन। शुश क्येट चेम्तीके ममिम्पतीन।
37 मरिम्शो थोव़क मकोव़पाइय्यीनी। इन दाक्चा ङा पा ब्रोंइचा गेयीनी।
38 गे इन गेय पाइब कली इन थोक्शा पशो लोव़ खाप्पीन। इन थोक्शा पशो लोव़ इन कली मान पा हिंब आन कली बाक्ब।
39 हिंचा ङा शुक्शी पाइक्चा पुंइसीतीक आं क्येङा ङोन वोतीन। मारदे हना इन पतीक लोव़ रिम्शो बाक्नीम।
40 इन ब्रेक्शा अरेशो लोव़ शुश दाक्नुङ। इन निसाफ पतीकेमी आं कली ब्रोंइचा गेयीनी।
वाव
41 परमप्रभु यावे, इन गेना हना यो दाक्तीक आं कली दुम्ल। इन थोक्शा पशो लोव़ खोदेंशो पा आं कली श्येत रे प्रोंइयीनी।
42 मिनु गो आं कली शुक्शी पाइब आन कली लोव़ लेन्ने चाप्नुङ। मारदे हना गो इन लोव़ थमा सुइक्नुङ।
43 गे इन थमा लोव़ पचा कली मतेक्यीनी। मारदे हना गो इन पतीक लोव़ आस पा बाक्नुङ।
44 गो इन अरेशो लोव़ थमा पा गेना हना यो टीनुङ।
45 मिनु गो सुइ क्येङा महिंथु बाक्नुङ। मारदे हना इन ब्रेक्शा अरेशो लोव़ माल्ता।
46 गो पिप आन ङोंइती इन देंशो लोव़ आ पर्बम लोव़ पाइनुङ। मिनु मुने मदोक्नुङ। मत्ती १०:१८
47 गो इन शेंतीके तुइश्शा ग्येरसीनुङ। मारदे हना गो मेको कली दाक्नुङ।
48 गो इन शेंशो लोव़ ठेयब सेल्चा दाक्नुङ। मोपा इन फुल्लुम मुशा ब्रेक्शो लोव़ मिम्ना मिम्न बाक्नुङ।
चायीन
49 इन गेय पाइब कली पशो लोव़ मिम्तीन। आं कली मेको आ लां कोव़पाइय्यीनी।
50 गो श्येत जङानु, इन थोक्शा पशो लोव़मी आं कली लेम्शा ब्रोंइचा गेब।
51 ठेयब लेश्शो मुरुमी आं कली शुश शुक्शी पाइनीम। तन्न गो इन अरेशो लोव़ मप्रोंइनुङ।
52 परमप्रभु यावे, गो इन साइ ङोंइती ङा पतीक लोव़ मिम्शा, आं थुं नाइक्नुङ।
53 इन अरेशो लोव़ प्रोंइब मुर आन पर्बम गो गाइश्शा चुरशा बाक्ती।
54 गो ते बाक्ती हना यो, इन फुल्लुम मुशा ब्रेक्शो लोव़ आं कुम्सो दुम्शो बाक्तेक्म।
55 परमप्रभु यावे, गो नाक्दो इन कली मिम्शा, इन अरेशो लोव़ पाइनुङ।
56 गो आसीक राइब दुम्ती। मारदे हना गो इन ब्रेक्शा अरेशो लोव़ टिशा बाक्ती।
हेथ
57 परमप्रभु यावे, गे आं परमप्रभु बाक्नीनी। गो इन लोव़ टिना टिन बाक्नुङ।
58 गो आं थुं नेल्लेमी इन कली पुंइता। इन थोक्शा पशो लोव़ खोदेंशो पा, आं कली शिशी पाइय्यीनी।
59 गो इन पतीके मिम्शा, इन देंशो लोव़ ङा लांम गाक्नुङ।
60 गो इन शेंतीके रीब पा टीनुङ। गो देश मपाइनुङ।
61 इन अरेशो लोव़ मटीबपुकीमी आं कली फ्रेंताक्यीमी हना यो, गो इन अरेशो लोव़ मप्रेंनुङ।
62 गो नाक्दो बोक्शा, इन निसाफ पतीक लोव़ आ पर्बम इन कली ठेयब सेल्नुङ। भजन संग्रह ४२:९
63 गो इन कली मान पा हिंब नु इन ब्रेक्शा अरेशो लोव़ टीब आन वारच नङ।
64 परमप्रभु यावे, रागी इन गेना हना यो दाक्तीकेमी ब्रीशो बाक्ब। इन फुल्लुम मुशा, ब्रेक्शो लोव़ शेंदीनी।
टेथ
65 परमप्रभु यावे, इन लोव़ खोदेंशो पा गे इन गेय पाइब कली रिम्शो पाइक्तीनी।
66 आं कली रुप्ब नु तुइक्ब सेलीन। मारदे हना गो इन शेंतीके थमा सुइक्नुङ।
67 गो श्येत जचा क्येङा ङोंइती हेंथे लां खोइश्शो नङ। तन्न मुल इन लोव़ टीनुङ।
68 गे रिम्शो पाइब नु दाक्ब बाक्नीनी। मोपतीके आं कली इन फुल्लुम मुशा, ब्रेक्शो लोव़ शेंदीनी।
69 ठेयब लेश्शो मुरपुकीमी आं पर्बमी जोल पाइनीम। गो चहिं आं थुं नेल्लेमी इन ब्रेक्शा अरेशो लोव़ पना पन बाक्नुङ।
70 मेको आन थुं थांइशो बाक्ब। तन्न गो इन अरेशो लोव़ तुइश्शा ग्येरसीशो बाक्नुङ।
71 गे आं कली श्येत जपाइक्तीनी, मेको रिम्शो बाक्त। मोपा इन फुल्लुम मुशा ब्रेक्शो लोव़ शेंसाक्यी।
72 मिनु हजार हजार टुक्रा सुन चांदी क्येङा इन अरेशो लोव़ आं कली रिम्शो बाक्ब।
योध
73 गे आं कली सेल्तीनी। मिनु इन शेंशो लोव़ शेंसीचा कली रुप्तीक थुं गेयीनी।
74 इन कली मान पा हिंबपुकी आं कली तशा ग्येरसीनीम। मारदे हना गो इन लोव़ ङा लां कोव़ना कोव़न बाक्नुङ।
75 परमप्रभु यावे, इन निसाफ पतीके ठीक बाक्नीम। गो मेको तुइक्नुङ। गे आं कली इन दाक्शा मप्रोंइतीकेमी श्येत गेतीनी।
76 इन गेय पाइब, आं कली इन गेना हना यो दाक्तीकेमी इन थोक्शा पशो लोव़ खोदेंशो पा लेम्दीनी।
77 गे आं कली शिशी पाइतीनी हना, गो ब्रोंइनुङ। मारदे हना इन अरेशो लोव़ तुइश्शा, ग्येरसाक्यी।
78 ठेयब लेश्शो मुर मुने दोक्मल। मारदे हना मेकोपुकीमी आं कली मो दिम्ताक्यीमी। गो चहिं इन अरेशा ब्रेक्शो लोव़ मिम्ना मिम्न बाक्नुङ।
79 इन कली मान पा हिंब आं नेक्था जाक्मल। मोपा इन देंशो लोव़ रुप्मेक्ल।
80 गो इन फुल्लुम मुशा ब्रेक्शो लोव़ पशा दोस मतङल। मोपा मुने मदोक्ङल।
काफ
81 गो आं श्येतम इन प्रोंइतीक शुश माल्नुङ। मिनु गो इन लोव़ ङा लां कोव़ना कोव़न बाक्नुङ।
82 गो इन थोक्शा पशो लोव़ शुश रिम्ना रिम्न बाक्नुङ। मिनु “आं कली गेना लेम्नीनी?” दे हिल्लो पाइनुङ।
83 मारदे हना गो कुनम वोइश्शो कुशुल के थैलो खोदेंशो बाक्नुङ। मो हना यो गो इन फुल्लुम मुशा ब्रेक्शो लोव़ मप्रेंदु।
84 गो, इन गेय पाइब, दोशो सम्म फाल्चा माल्नुङा? गे आं कली खेदा पाइब आन कली गेना निसाफ पाइनीनी?
85 ठेयब लेश्शोपुकीमी आं कली खाल्टा दोम्तेक्म। मेकोपुकी इन अरेशो काइ मपाइब बाक्नीम।
86 इन शेंतीके नेल्ले गेना हना यो लीनीम। मिनु मेकोपुकीमी आं कली मोशा खेदा पाइनीम। आं कली वारच पाइय्यीनी।
87 मेकोपुकीमी आं कली रागी रे हेररा क्याम्ताक्यीमी। गो चहिं इन ब्रेक्शा अरेशो लोव़ मप्रोनु।
88 इन गेना हना यो दाक्तीकेमी ब्रोंइपाइय्यीनी। मोपा गो इन देंशो टिना टिन बाक्नुङ।
लामेध
89 परमप्रभु यावे गेना हना यो बाक्ब। इन लोव़ स्वर्गम वोइश्शो बाक्ब। यसैया ४०:८
90 इन मुर आन कली दाक्शा मप्रोंइतीके पाला पाला सम्म लीब। गे रागी सेल्शा वोइक्तीनी। मिनु मेको महिम्सीब।
91 इन लोव़ पतीकेमी मेको महिम्सीब। मारदे हना नेल्लेमी इन लोव़ टीनीम।
92 इन अरेशो लोव़म आं कली मग्येरपाइश्शो हना, गो आं श्येतम बेक्ङ वा। येरमीया १५:१६
93 गो इन अरेशा ब्रेक्शो लोव़ गेनायो मप्रेंनुङ। मारदे हना गे मेको आ पतीकेमी आं कली ब्रोंइपाइक्तीनी।
94 गो इन मुर नङ। आं कली प्रोंइयीनी। मारदे हना गो इन ब्रेक्शा अरेशो लोव़ माल्ता।
95 इन अरेशो लोव़ मटीबपुकीमी आं कली साइक्चा कली बाप्शो बाक्नीमी। गो चहिं इन देंशो मिम्शा बाक्नुङ।
96 मुरुमी नेल्ल क्येङा रिम्शो मारेइ सेल्ने मचाप्नीम। गो मेको तुइक्नुङ। तन्न इन शेंशो लोव़ नेल्ल क्येङा रिम्शो बाक्ब।
मेम
97 गो इन अरेशो लोव़ शुश दाक्नुङ। गो नाक्त किंत किंत मेको आ पर्बम मिम्नुङ। भजन संग्रह १:२
98 गे इन शेंशो लोव़म आं जोरी सत्रु आन क्येङा आं कली तुइक्ब सेल्ब। मारदे हना मेको गेना हना यो गो नु बाक्ब।
99 मिनु आं कली शेंब आन क्येङा गो जोक्ब तुइक्ब दुम्ती। मारदे हना इन देंशो मिम्ना मिम्न बाक्ती।
100 गो खाल्पा आन क्येङा यो जोक्ब तुइक्ब दुम्ती। मारदे हना इन ब्रेक्शा अरेशो लोव़ टिना टिन बाक्नुङ।
101 गो इन लोव़ टिचा कली मरिम्शो लां मखोइक्थु बाक्नुङ।
102 गो इन देंशो पतीक लोव़ रे ङोन मलङ। मारदे हना गे आं कली शेंताक्यीनी।
103 इन देंशो लोव़ ब्रोव़शो बाक्ब। मेको खुदो क्येङा यो जिजी बाक्ब।
104 इन ब्रेक्शा अरेशो लोव़ रे रुप्ब दुम्ती। मोपतीके गो दूली पतीक नेल्ल काइ मदाक्नुङ। भजन संग्रह ११९:२९
नुन
105 इन लोव़ आं खोइली कली छेङछेङ बाक्ब, आं लां तचा कली रांको खोदेंशो बाक्ब। २पत्रुस १:१९
106 गो इन निसाफ पतीक लोव़ पाइनुङ, दे कसम जशा खाप्ता।
107 परमप्रभु यावे, गो शुश श्येत जाइनुङ, इन लोव़म देंशो खोदेंशो पा आं कली ब्रोंइचा गेयीनी।
108 परमप्रभु यावे, गो इन कली ठेयब सेल्शो, चढ़ेतीक खोदेंशो पा ब्रने। मिनु आं कली इन पतीक लोव़ शेंदीनी। भजन संग्रह १९:१५
109 गो गेना हना यो बेक्चा चिक्शा बाक्ती। मो हना यो गो इन अरेशो लोव़ मप्रेंनुङ।
110 इन अरेशो लोव़ मटीबपुकीमी आं कली ब्वारद दाइश्शो बाक्नीम। मो हना यो इन ब्रेक्शा अरेशो लोव़ मप्रोंइनुङ।
111 इन देंशो लोव़ गेना हना यो आं शोंप बाक्ब। मारदे हना मेकोमी आं थुं शुश ग्येरपाइक्ब।
112 गो इन फुल्लुम मुशा ब्रेक्शो लोव़ मबेक्ङा सम्म पाइनुङ, दे आं थुं फ्रेंशा बाक्ती।
सामेख
113 गो थुं निक्शी पाइश्शो मुर आन कली काइ मदाक्नुङ। मिनु इन अरेशो लोव़ दाक्नुङ। भजन संग्रह ३१:७; १राजा १८:२१
114 गे आं ख्रुइक्तीक नु तेक्तीक बाक्नीनी। गो इन लोव़ ङा लां कोव़ना कोव़न बाक्नुङ।
115 गो आं परमप्रभु आ शेंतीके पने चबुल, गे मरिम्शो पाइबपुकी, आं क्येङा ङोन लने।।
116 इन थोक्शा पशो लोव़ खोदेंशो पा आं कली ब्रोंइचा गेयीनी। मिनु गो इन लां कोव़शा, मुने मदोक्ङल।
117 आं कली प्रोंइचा कली वारच पाइय्यीनी। गो गेना हना यो इन फुल्लुम मुशा ब्रेक्शो लोव़ दाक्नुङ।
118 इन फुल्लुम मुशा ब्रेक्शो लोव़ ङा लां रे हेंथे गाक्ब नेल्ल आन कली तिल्तीनी। मारदे हना मेको आन लां जोल बाक्त।
119 रागी ङा इन अरेशो मटीब नेल्ल आन कली पुलु खोदेंशो पा फिक्तीनी। मोपतीके गो इन देंशो लोव़ दाक्नुङ। यसैया १:२५
120 गो इन कली मान पा हिंशा ख्रिंख्रि पाइनुङ। मिनु गो इन निसाफ पतीक मिम्शा हिंनुङ।
आयीन
121 गो ठीक निसाफ पाता। आं कली दिप्ब आन कली जिम्मा मगेयीनी।
122 इन गेय पाइब कली वारच पा, रिम्शो पने। इन कली मटीबपुकीमी आं कली दिप्चा मगेने।
123 गो इन प्रोंइतीक नु इन ठीक निसाफ पा पशो लोव़ कली शुश कोव़शा रिम्नुङ।
124 इन गेय पाइब कली इन गेना हना यो दाक्तीकेमी वारच पने। मिनु आं कली इन फुल्लुम मुशा ब्रेक्शो लोव़ शेंदीनी।
125 गो इन गेय पाइब नङ। आं कली रुप्तीक थुं गेयीनी। मोपा गो इन देंशो रुप्ने चबुल।
126 परमप्रभु यावे, इन गेय पची ना दुम्शो बाक्ब। मारदे हना मुरपुकीम इन अरेशो लोव़ मटीम।
127 गो सुन नु क्येख सुन क्येङा इन शेंतीके दाक्नुङ।
128 मोपतीके गो आं लां नेल्लेमी इन ब्रेक्शा अरेशो लोव़ मिम्नुङ। मिनु दूली लां नेल्ल काइ मदाक्नुङ। भजन संग्रह ११९:२९
पे
129 इन देंशो लोव़ शुश रिम्शो बाक्नीम। मोपतीके गो मेको टिना टिन बाक्नुङ।
130 इन लोव़ नेंशोनु, रुप्तीक थुं गेब। मतुइक्ब आन कली तुइक्ब सेल्ब।
131 गो ब्वाक्कु तूतू दाक्शो खोदेंशो पा इन शेंशो लोव़ माल्ना माल्न बाक्नुङ।
132 गे आं गे लेश्शा शिशी पने। इन नें दाक्ब आन कली शिशी पशो खोदेंशो पा आं कली यो शिशी पने।
133 आं कली इन थोक्शा पशो लोव़ ङा लां गाक्पाइय्यीनी। मरिम्शो पतीकेम आं कली हुकुम पचा मगेने।
134 आं कली मुर आन दिप्तीक रे प्रोंइयीनी। मिनु गो इन ब्रेक्शा अरेशो लोव़ पने चबुल।
135 इन कुल इन गेय पाइब तार नां खोदेंशो पा ब्रपतीन। मिनु इन फुल्लुम मुशा ब्रेक्शो लोव़ आं कली शेंदीनी।
136 गो ङाक्नुङ। मारदे हना मुरपुकीमी इन अरेशो लोव़ मटीम।
चाधे
137 परमप्रभु यावे, गे रिम्शो पाइब बाक्नीनी। मिनु इन पशो निसाफ ठीक बाक्नीम।
138 गे इन देंशो लोव़ ठीक निसाफ पतीकेमी वोइक्तीनी। गो मेको कली थमा सुइक्नीकी।
139 गो चुरना चुरन बाक्नुङ। मारदे हना आं कली खेदा पाइबपुकीमी इन लोव़ प्रेंताक्म। भजन संग्रह ६९:१०
140 इन थोक्शा पशो लोव़ शुश रिम्शो बाक्ब। मिनु गो, इन गेय पाइबमी मेको दाक्नुङ।
141 गो आइक्च बाक्नुङ। आं कली सुइमी महिक्नीम। मो हना यो गो इन ब्रेक्शा अरेशो लोव़ मप्रेंनुङ।
142 इन निसाफ पतीके गेना हना यो ठीक बाक्ब। मिनु इन अरेशो लोव़ थमा लोव़ बाक्ब।
143 गो हिंती नु श्येत जाइब दुम्ती हना यो, इन शेंतीकेम आं कली ग्येरपाइक्ब।
144 इन देंशो गेना हना यो ठीक बाक्नीम। आं कली रुप्तीक थुं गेतीनी हना, गो ब्रोंइनुङ।
क्वोफ
145 गो आं थुं नेल्लेमी इन कली पुंइनुङ। परमप्रभु यावे आं लोव़ लेत्तीनी। गो इन फुल्लुम मुशा ब्रेक्शो लोव़ टिना टिन बाक्नुङ।
146 गो इन कली “गे आं कली श्येत रे प्रोंइयीनी” दे पुंइनुङ। मिनु गो इन देंशो पाइनुङ।
147 गो नां मदाप्थु बोक्शा, इन कली “वारच पाइय्यीनी” दे पुंइनुङ। गो इन लोव़ ङा लां कोव़ना कोव़न बाक्नुङ।
148 गो इन थोक्शा पशो लोव़ मिम्चा कली नाक्दो सेंना सेंन बाक्ती।
149 इन गेना हना यो दाक्तीकेमी आं पुंइशो नेनीन। परमप्रभु यावे, इन निसाफ पतीकेमी आं कली ब्रोंइचा गेयीनी।
150 आं कली खेदा पाइबपुकी आं कली साइक्चा कली आं नेक्था जाक्नीम। मेकोपुकी इन अरेशो लोव़ रे ङोन बाक्नीम।
151 तन्न परमप्रभु यावे, गे आं नेक्था बाक्नीनी। इन शेंशो लोव़ नेल्ल थमा बाक्ब।
152 गो ङोंइती रे इन देंशो लोव़ पढेशा, मेको गेना हना यो कली सेल्शो बाक्ब, दे तुइक्ताक्ङ।
रेश
153 आं श्येत जशो कोव़ङीन, गो श्येत जाइनुङ। मिनु आं कली प्रोंइयीनी। मारदे हना गो इन अरेशो लोव़ मप्रेंदु।
154 गे आं निसाफ पाइब दुमीन। मिनु आं कली प्रोंइयीनी। इन थोक्शा पशो लोव़ खोदेंशो पा ब्रोंइचा गेयीनी।
155 इन अरेशो लोव़ मटीब आन कली गे श्येत रे मप्रोंइनीनी। मारदे हना मेकोपुकीमी इन फुल्लुम मुशा ब्रेक्शो लोव़ पचा ममलेम।
156 परमप्रभु यावे, इन शिशी ठेयब बाक्ब। इन निसाफ पतीक लोव़ खोदेंशो पा आं कली ब्रोंइचा गेयीनी।
157 आं कली खेदा पाइब नु आं जोरी सत्रु शुश बाक्नीम। मो हना यो गो इन देंशो लोव़ मप्रोनु।
158 मेको नोले शोंइसीशो आन कली तशा ग्रांग्रा दीती। मारदे हना मेकोपुकीमी इन शेंशो टिचा प्रोंइतेक्म।
159 गो इन ब्रेक्शा अरेशो लोव़ दाक्नुङ, दे मिम्तीन। परमप्रभु यावे, इन गेना हना यो दाक्तीकेमी आं कली ब्रोंइचा गेयीनी।
160 इन लोव़ नेल्ले थमा बाक्ब। मिनु इन निसाफ पतीक लोव़ गेना हना यो ठीक बाक्नीम। यूहन्ना १७:१७
सिन नु शिन
161 ठेयब मुरपुकीमी आं कली बित्चीम खेदा पाइनीमी। तन्न आं थुं इन लोव़ क्येङा हिंब।
162 गो शुश शोंप तशा, ग्येरसीचा क्येङा इन लोव़ तशा ग्येरसाक्यी।
163 दूली पतीके नु जोल पतीक काइ मदाक्थु, ग्रांग्रा दीनुङ। तन्न इन अरेशो लोव़ दाक्नुङ।
164 गो इन निसाफ पतीक लोव़ आ पर्बम इन कली नाक्त किंत किंत ७ खेयप ठेयब सेल्नुङ।
165 इन अरेशो लोव़ दाक्बपुकी थुं नाइश्शा बाक्चा ताइनीम। मेको आन कली मारेइ श्येत मदुम्ब।
166 परमप्रभु यावे, गो इन श्येत रे प्रोंइतीक कली रिम्शा बाक्नुङ। मिनु इन शेंशो पाइनुङ।
167 गो इन देंशो लोव़ टिना टिन बाक्ती। मिनु गो मेको कली थाम्पा दाक्नुङ।
168 इन ब्रेक्शा अरेशो लोव़ नु इन देंशो लोव़ टिना टिन बाक्नुङ। मारदे हना आं पशो नेल्ल इन ङोंइती बाक्नीम।
थाव
169 परमप्रभु यावे, आं पुंइशो लोव़ नेनीन। इन लोव़म देंशो खोदेंशो पा आं कली रुप्ब थुं गेयीनी।
170 आं पुंइशो लोव़ नेनीन। इन थोक्शा पशो लोव़ खोदेंशो पा श्येत रे प्रोंइयीनी।
171 गे आं कली इन फुल्लुम मुशा, ब्रेक्शो लोव़ शेंताक्यीनी। मोपतीके गो इन कली ठेयब सेल्ना सेल्न बाक्नुङ।
172 गो इन थोक्शा पशो लोव़ आ पर्बम कुम्सो पाइनुङ। मारदे हना इन शेंशो लोव़ नेल्ल ठीक बाक्ब।
173 गे आं कली वारच पाइय्यीनी। मारदे हना गो इन ब्रेक्शा अरेशो लोव़ योव़शा, आं के सेल्तामी।
174 परमप्रभु यावे, गो इन श्येत रे प्रोंइतीक कली रिम्नुङ। इन अरेशो लोव़ दाक्शा ग्येरसीनुङ।
175 गे आं कली ब्रोंइचा गेयीनी। मिनु गो इन कली ठेयब सेल्नुङ। मिनु इन पतीक लोव़मी आं कली वारच पवल।
176 गो जाम्शो भेडा खोदेंशो पा लां जाम्शो बाक्नुङ। इन गेय पाइब, आं कली माल्यीनी। मारदे हना गो इन शेंशो लोव़ मप्रेंनुङ। यसैया ५३:६