118
ठेयब सेल्तीक कुम्सो
1 परमप्रभु यावे कली “गे रिम्शो पाइब बाक्नीनी” देनीन। मारदे हना मेको रिम्शो पाइब बाक्ब। मिनु आ दाक्तीके गेना हना यो लीब। भजन संग्रह १०६:१
2 इस्राएलीपुकीमी “मेको आ दाक्तीके गेना हना यो लीब” देंमल।
3 हारून आ खिं ङा मुरपुकीमी “मेको आ दाक्तीके गेना हना यो लीब” देंमल।
4 परमप्रभु यावे कली मान पा हिंबपुकीमी “मेको आ दाक्तीके गेना हना यो लीब” देंमल।
5 गो श्येत जङानु, परमप्रभु यावे कली पुंइता। मिनु मेकोमी आं लोव़ लेत्ताक्यी। मिनु आं कली श्येत रे प्रोंइती।
6 परमप्रभु यावे गो नु बाक्तीके गो महिंनुङ। मुरपुकीमी आं कली मार पाइक्ने चाप्नीमी ङा? रोमी ८:३१; भजन संग्रह ५६:५; हिब्रू १३:६
7 परमप्रभु यावे गो नु बाक्शा, आं कली वारच पाइब बाक्ब। गो आं कली काइ मदाक्ब आन कली ग्राशा कोंइनुङमी।
8 मुर आन कली तशा “मेकोमी वारच पाइनीम” देंचा क्येङा परमप्रभु यावे नु फाम्सीचा रिम्शो बाक्ब। भजन संग्रह १४६:३
9 मिनु हुकुम पाइब मुर आन कली तशा “मेकोमी वारच पाइनीम” देंचा क्येङा परमप्रभु यावे नु फाम्सीचा रिम्शो बाक्ब।
10 रागी रागी ङा मुर नेल्लेमी आं कली पुम्ताक्यीमी। तन्न गो परमप्रभु यावे आ नेंमी नेल्ल आन कली खतम पोक्ताक्मी।
11 मेकोपुकीमी आं कली तेइ तेइ रे पुम्ताक्यीमी। तन्न गो परमप्रभु यावे आ नेंमी नेल्ल आन कली खतम पोक्ताक्मी।
12 मेकोपुकीमी आं कली सुरबुम खोदेंशो पा गिल्तीमी। मेकोपुकी चूम ब्रशो मी खोदेंशो पा ब्राम्तेक्म। तन्न गो परमप्रभु यावे आ नेंमी मेको आन कली खतम पोक्ताक्मी।
13 गो नेप्चा पुंइसीशा, गोल्चा चिक्शो नङ। तन्न परमप्रभु यावेमी वारच पाइक्ती।
14 परमप्रभु यावे आं बोल नु सक्ति बाक्ब। मिनु मेको आं कली श्येत रे प्रोंइब दुम्शो बाक्ब। प्रस्थान १५:२
15 ठीक पाइब आन ताम्बुमी ग्येरशो नु ग्राशा कुम्सो पशो नेंसीब। परमप्रभु यावेमी सक्ति पाइश्शो गेय पाइब।
16 परमप्रभु यावेमी “गो ग्राती” दे आ ग्युरा गुइ पोक्शो बाक्ब। परमप्रभु यावेमी सक्ति पाइश्शो गेय पाइब।
17 गो मबेक्नुङ, तन्न ब्रोंइशा बाक्शा, परमप्रभु यावे आ पशो नेल्ल शेंनुङमी।
18 परमप्रभु यावेमी आं कली शुश सजाइ गेती। तन्न बेक्चा मगेयी। २कोरिन्थी ६:९
19 आं कली परमप्रभु यावे आ खिं ङा लाप्चो रोक्कीन। मिनु गो ओव़शा, परमप्रभु यावे कली “गे रिम्शो पाइब बाक्नीनी” देंनुङ।
20 एको परमप्रभु यावे आ लाप्चो बाक्ब। ठीक पाइबपुकी एको लाप्चो रे ओव़नीम। यसैया २६:२
21 गे आं पुंइशो नेंशा, लोव़ लेत्ताक्यीनी। मोपतीके गो इन कली “गे रिम्शो पाइब बाक्नीनी” देंनुङ। गे आं कली श्येत रे प्रोंइब दुम्तीनी।
22 खिं सेल्बपुकीमी गारो प्रोव़ङमेनु “एको फुल्लु मगार” दे ताइक्तमे बाक्त। मिनु मेको मगारथु ताइश्शो फुल्लु चहिं जग ङा सुरे फुल्लु दुम्माक्त। यसैया २८:१६; मत्ती २१:४२
23 मेको परमप्रभु यावेमी पशो बाक्ब। गो मेको तशा, छक लाक्नीकी।
24 परमप्रभु यावेमी मुलाक्ती ङा नाक्ती सेल्शो बाक्ब। गोपुकी कुम्सो पा ग्येरसय।
25 परमप्रभु यावे आंइ कली श्येत रे प्रोंइकी। परमप्रभु यावे आंइ गेय रिम्शो दुम्ल।
26 परमप्रभु यावे आ नेंमी जाक्ब आसीक रशो बाक्ब। गो परमप्रभु यावे आ खिं रे पा इन कली आसीक गेनीकी। मत्ती २१:९; मत्ती २३:३९
27 परमप्रभु यावे ला परमप्रभु बाक्ब। मेकोमी आ छेङछेङ आंइ तार दाप्पाइश्शो बाक्ब। रवा आ राशी शेशा, ग्येरशा, चढ़ेतीक आ ग्रोव़ ग्योम्दीन। प्रस्थान २७:१-२
28 गे आं परमप्रभु बाक्नीनी। गो इन कली “गे रिम्शो पाइब बाक्नीनी” देंनुङ। गे आं परमप्रभु बाक्नीनी। मिनु गो इन कली मान पा ठेयब सेल्नुङ।
29 गे परमप्रभु यावे कली “गे रिम्शो पाइब बाक्नीनी” देनीन। मारदे हना मेको रिम्शो पाइब बाक्ब। मिनु आ दाक्तीके गेना हना यो लीब। भजन संग्रह १०६:१; भजन संग्रह १०७:१; भजन संग्रह ११८:१; भजन संग्रह १३६:१