4
Gu Paablo na bhaan ba tu aꞌgaꞌ gu Abraam
1 Ea nach bhaan jup xi chu aꞌgaꞌ guch boxii Abraam nat jax jaꞌk tu jii bɨjɨk na yaꞌ oilhimɨk, bhaan jach xi chu aꞌgaꞌ nat jax chuꞌt bɨɨx aixim bhaan tu bii.
2 Noꞌ gɨt gu Abraam jix kɨɨꞌ maaꞌnkam tɨgiaꞌ gu Dios nax bhaiꞌm duukam bap tu duñiaꞌ gu tuꞌ na dɨɨlh jax ɨlhiiꞌñdhaꞌ, dhiꞌ kɨꞌn gɨt bhaan gɇꞌkam bam taat kaꞌ ja bui gu jaꞌtkam, sia ku guꞌ cham tuꞌ buiñor gu Dios.
3 Guꞌ ji na guꞌp jum kaiꞌch maaꞌn kap nat paiꞌ tu uaꞌnak maadɨt gu bɨjɨk dɨr kam: “Gu Abraam bɨɨx juraaꞌn kɨꞌn soiꞌm ɨlhdhak buiñor tɨ jɨɨꞌñ gu Dios, puiꞌ kut baꞌ gu Dios puiꞌ jaꞌk tɨɨ nar jix kɨɨꞌ maaꞌnkam.”
4 Na guꞌ aach nach jix maat na gu jaroiꞌ noꞌt tuꞌ bhaan tu jua, cham tuꞌ nam puiꞌ pɨx makiaꞌ gu tuumiñ nam paiꞌ dhuuk namkidhaꞌ, guꞌ jaꞌpji dhiꞌr maiꞌchɨk gaꞌn kaꞌ na ba tu juanaꞌ.
5 Matgɨm guꞌ noꞌt jaroiꞌ soiꞌm ɨlhdhak buiñor ba tɨ jɨɨꞌñ gu Dios, ba uañdhaꞌ gu uaꞌtulhdhargaꞌn puiꞌ pɨx, cham tuꞌ nam aaꞌndaꞌ na tuꞌ jax dhuñiaꞌ nar jix bhaiꞌm duukam na baꞌ gɨt dhiꞌ pɨx jir maiꞌchɨk gaꞌn kaꞌ. Baꞌ miꞌ dhɨr dɨɨlh gu Dios puiꞌ jaꞌk ba tɨgiaꞌ nar jix kɨɨꞌ maaꞌnkam kaꞌ.
6 Gu Dabii guiꞌ na bɨjɨk jix ioꞌm jir gɇꞌkam kat, dhiꞌ bhaan jup tu aꞌga nax bhaiꞌ ba tu jimdaꞌ gu jaroiꞌ noꞌt puꞌñi dɨɨlh gu Dios uañdhak gu uaꞌtulhdhargaꞌn puiꞌ ba tɨɨ na bar jix kɨɨꞌ maaꞌnkam, sia kut guꞌ cham tuꞌ tuꞌx bhaiꞌm duukam jup tu duu na baꞌ gɨt dhiꞌ bar maiꞌchɨk gaꞌn kaꞌ.
7 Jaꞌpni moom kaiꞌch miꞌ nat paiꞌ tu uaꞌnak dɨɨlh gu Dabii:
Joidham jix bhaiꞌ ba tu ja jimiaꞌ gu jaꞌtkam guiꞌ na Dios ja uañdhaꞌ gu ja uaꞌtulhdharaꞌ,
baꞌ cham tuꞌ bhaan kap jum buixdhaꞌ guiꞌ nam tuꞌ bhaan jum uaꞌtulhdhaꞌ bɨɨpɨꞌ dɨr.
8 Joidham jix bhaiꞌ ba tu jimdaꞌ gu jaroiꞌ noꞌ guꞌ Dios cham tuꞌ bhaan kap jum buixiꞌñ gu uaꞌtulhdhargaꞌn.
9 Baꞌ dhiꞌ puiꞌ nat tu uaꞌna gu Dabii, ¿dai aa chi guiꞌ ja aagɨt jup kaiꞌch nam jum matgilhiꞌñ nam jir Israel kam, kaꞌ bɨɨx aa chi guiꞌ nam cham jum matgilhiꞌñ? Nach guꞌp kaiꞌch nat saak gu Dios puiꞌ tɨɨ gu Abraam nar jix kɨɨꞌ maaꞌnkam, dai pɨx nat soiꞌm ɨlhdhak buiñor tɨ jɨɨꞌñ.
10 ¿Guꞌ paa chi baꞌ duuk pɨk puiꞌ jaꞌk tɨɨ gu Dios gu Abraam nar jix kɨɨꞌ maaꞌnkam? ¿Gatuuk aa nat xim matgilhdhak nar Israel kam, kaꞌ bɨɨpɨꞌ dɨr aa nat chakuim matgilhdhak? Bɨɨpɨꞌ dɨr ji matgɨm nat chakuim matgilhdhak nar Israel kam.
11 Miꞌ dhɨr baꞌp bam matgilh nat baꞌ bhaan jup matgir ja bui gu jaꞌtkam nat gu Dios puiꞌ jaꞌk ba tɨɨ nar jix kɨɨꞌ maaꞌnkam, dai pɨx nat buiñor soiꞌm ɨlhdhak tɨ jɨɨꞌñ. Baꞌ gu jaroiꞌ na puꞌñi soiꞌm ɨlhdhai buiñor jup tɨ jɨɨꞌñdhaꞌ gu Dios sia ku guꞌ chakui matgilhdhix nar Israel kam, gu Dios pɨx dɨɨlh puiꞌ jaꞌk ba tɨgiaꞌ nar jix kɨɨꞌ maaꞌnkam kaꞌ, na guꞌ miꞌ puiꞌp tu daaꞌñchuꞌndaꞌ na jax gu Abraam, jaꞌp ji buusandaꞌ nar taataꞌn kaꞌ.
12 Sia puiꞌp ji buusandaꞌ nar ja taat kaꞌ gu Abraam guiꞌ nam ba matgilhdhix kaꞌ nam jir Israel kam, dai pɨx noꞌ mɨt tuꞌ sɨlhkam soiꞌm ɨlhdhak buiñor pu ba tɨ jɨɨꞌñ gu Dios bɨɨpɨꞌ dɨr nam chakuim matgilhdhaꞌ, noꞌm guꞌ sia xib pu buiñor tɨ jɨɨꞌñdhatuꞌ.
Na ba tu aaꞌndaꞌ gu Paablo na puiꞌ tu duñiaꞌ gu Dios jax na tɨɨdaꞌ gu jaroiꞌ noꞌ soiꞌm ɨlhdhat buiñor tɨ jɨɨgiꞌñ
13 Na guꞌ janoꞌ nat gu Dios iimchux gu Abraam na makiaꞌ gu dɨbɨɨr sia gu bopxiꞌñ, cham tuꞌ nat miꞌ pu tu duu gu Abraam na jɨꞌk jax tu aagix kut baꞌ iimchux. Jax dhui na guꞌ chakui paiꞌ jax tu aagix kaꞌ janoꞌ. Guꞌ jaꞌpji na bɨɨx juraaꞌn kɨꞌn soiꞌm ɨlhdhat buiñor tɨ jɨɨgiꞌñdhaꞌ, puiꞌ kut baꞌ puiꞌp tɨɨ nar jix kɨɨꞌ maaꞌnkam, na cham tuꞌ bhaan uaꞌtulhdhix.
14 Baꞌ noꞌ guꞌ jax dhuukat dai guiꞌ ja aꞌm ji chu biꞌyaꞌ gɨt nam miꞌ puiꞌ jimiaꞌ na jɨꞌk jax tu aagix dhiꞌ nat tuꞌ iimchuxdhak gu Dios gu Abraam, jir tuꞌ kub kaꞌ gɨt sia ku jaroiꞌ tɨi soiꞌm ɨlhdhat buiñor tɨ jɨɨgiꞌñ gu Dios, gio dhiꞌ bhaan bax maatɨꞌ kaꞌ gɨt na cham pɨk jir gɇꞌp jum duukam dhiꞌ nat tuꞌ iimchux gu Dios gu Abraam.
15 Na guꞌ paiꞌ noꞌx jaiꞌch na jax tu aagix nam tu jimdaꞌ gu jaꞌtkam, noꞌt maadɨt cham am bua miꞌ paiꞌ maaꞌn kap, dhiꞌ bhaan jum uaꞌtulhdhai ba tulhiiñchudaꞌ am. Guꞌ ji noꞌ guꞌ pu cham paiꞌ jax jup tu aagix, dho pu cham paiꞌ jaiꞌch kaꞌ ɨp gu uaꞌtulhdharaꞌ.
16 Puiꞌ ku baꞌ miꞌ dhɨr gu Abraam gu bopxiꞌñ jɨꞌk nam soiꞌm ɨlhdhat buiñor jup ba tɨ jɨɨgiꞌñ gu Dios, ja maa guiꞌ nat tuꞌ iimchux janoꞌ dɨɨlh gu Abraam, nat guꞌx ja joiꞌmdak ja tɨɨ nam jaꞌp pɨx buiñor tɨ jɨɨgiꞌñ. Baꞌ cham tuꞌ dai na miꞌ pu tu duñiaꞌ gu jaroiꞌ na jɨꞌk jax tu aagix kaꞌ na baꞌ maiꞌchiaꞌ guiꞌ na Dios tu maak, guꞌ jaꞌpji noꞌ soiꞌm ɨlhdhat buiñor jup tɨ jɨɨgiꞌñ gu Dios jaꞌp na jax janoꞌ gu Abraam. Baꞌ bɨɨx nach jɨꞌk puꞌñi soiꞌch ɨlhdhat buiñor tɨ jɨɨgiꞌñ gu Dios, jaꞌp ji buusan nar jich chaat gu Abraam.
17 Na guꞌp jum kaiꞌch maaꞌn kap na mɨt paiꞌ tu uaꞌnak gu bɨjɨk dɨr kam: “Aañ puiꞌ jaꞌk jum duñiaꞌ nap muiꞌ jaꞌtkam jir ja taat kaꞌ.” Baꞌ dhiꞌ gu Dios nat puiꞌ tɨɨdak gu Abraam nat jaroiꞌ buiñor soiꞌm ɨlhdhak tɨ jɨɨꞌñ, dhiꞌr diꞌ gu Dios guiꞌ na sia koiꞌñgaꞌn ja duduaꞌñdhaꞌ noꞌ xi ɨlhiiꞌñ, gio nax bhaaiꞌ nap duñiaꞌ gu tuꞌ na pu cham paiꞌ dhuuk jaiꞌch kaꞌ.
18 Baꞌ gu Abraam sɨlh pɨx tɨ jɨɨgiꞌñdhaꞌ nar sɨlhkam puiꞌ na jax chɨtda gu Dios na muiꞌ jaꞌtkam jir ja taat kaꞌ, sia ku guꞌ pu cham mat kaꞌ na jax dhui puiꞌ tum duñiaꞌ. Baꞌ muiꞌ tu bopxicha gu Abraam puiꞌ na jɨꞌk jax tɨtda gu Dios.
19 Nat guꞌ gu Abraam cham jɨꞌx jum oꞌjolh na soiꞌm ɨlhdhat tuꞌ sɨlhkam tɨ jɨɨgiꞌñdhaꞌ buiñor gu Dios, sia ku guꞌ janoꞌ ba aichdhidhaꞌ gux chamaam ooꞌm oidhaꞌ. Jix mat kaꞌ guꞌ tɨi gu Abraam na cham xiim ba mukiaꞌ bɨɨmaꞌn gu bɨngaꞌn Saara, nam guꞌx ioꞌm bar jagɨꞌgɨr kaꞌ, cham bhaaiꞌ panaas nam jax dhui ka ja tɨgiaꞌ gu aꞌaalh.
20 Guꞌ ji na guꞌ gu Abraam xi kɨɨkgɨdaꞌ na sɨlhkam tɨ jɨɨgiꞌñdhaꞌ buiñor gu Dios na jax tɨtda, cham paiꞌ pɨx am jum oꞌjolh iam, guꞌ jaꞌpji na jaꞌkbuiꞌ kat jix ioꞌm xim otdatgɨdaꞌ nax ioꞌm xi chɨ jɨɨgiꞌñdhaꞌ puiꞌ na jax tɨtda,
21 dai na puiꞌ kaiꞌchdhaꞌ na dai dɨɨlh gu Dios jix bhaaiꞌ na puiꞌ tu duñiaꞌ na jax kaiꞌch.
22 Puiꞌ kut baꞌ gu Dios puiꞌ tɨɨ gu Abraam nar jix kɨɨꞌ maaꞌnkam.
23 Baꞌ puiꞌ jaꞌk tum uaꞌna nat gu Dios jix kɨɨꞌ maaꞌnkam tɨɨ gu Abraam, na cham paiꞌ buiñor ka uaꞌtulhdhix, daipuꞌ pɨx nat soiꞌm ɨlhdhak buiñor tɨ jɨɨꞌñ. Ku guꞌ cham tuꞌ ji na dai buiñor gu Abraam puiꞌ tu uaꞌñix,
24 guꞌ jaꞌpji sia aach na jaiꞌp jich iadhiꞌñ dhiꞌ nat jax chum uaꞌna. Na guꞌ puiꞌ nach jax soiꞌch ɨlhdhat buiñor tɨ jɨɨgiꞌñ gu Dios jaiꞌ dhɨt, guiꞌ puiꞌp bach ɨlhiiꞌñ nach jir jix kɨkɨɨꞌ jaꞌtkam, cham tuꞌ buiñor ka uꞌuaꞌtulhdhix ich gu Dios guiꞌ nat duaꞌñdhak buusaiꞌ koiꞌñgaꞌn tɨr dɨr guch Xoiꞌkam nar jich gɇꞌkam tuk xib.
25 Nat guꞌ guiꞌ pɨx jich Xoiꞌkam dɨɨlh jum doꞌñcho nam muꞌaaꞌ na baꞌ puꞌñi jaꞌk tu namkix kaꞌ guch uaꞌtulhdharaꞌ. Baꞌ nat paiꞌ dhuuk gio duadɨk jup buus mu dɨr koiꞌñgaꞌn tɨr, dhiꞌ bhaan matgir na ba tu namkix guch uaꞌtulhdharaꞌ, baꞌ cham tuch dhaam kap tuꞌiiꞌ.