3
1 ¿Guꞌ tuꞌ mɨt baꞌ mi chɨɨ guiꞌ nam puiꞌm tɨɨtɨꞌ nam jir Israel kam jaꞌtkam gio nam jum matgilhiꞌñ?
2 Matgɨm muiꞌ ji nat ja aꞌm ba tu bii bɨɨx aixim tuꞌm. Gu gɇꞌp jum duukam ja aꞌm bii, dhiꞌr diꞌ gux bhaiꞌm kaiꞌchdham ñioꞌkiꞌñ gu Dios na bhaan tu aꞌga nam jax jaꞌk miꞌ puiꞌ jiimdaꞌ na jax jix aaꞌ.
3 ¿Baꞌ aapiꞌm jax ɨlhiiꞌñ na tu tuꞌiiꞌ nam baꞌ cham miꞌ puiꞌ jiim jaiꞌ dhɨt na jɨꞌk jax tu aagix? ¿Panaas aa gu Dios puiꞌ cham miꞌ puiꞌp ka tu duiñchuꞌ nat jax tɨi?
4 Chaam tuꞌ ji matgɨm. Jax dhui na guꞌ gu Dios maaꞌn na jax miꞌ puiꞌ duiñchuꞌndaꞌ jax na tɨꞌyaꞌ sia nar jax kaꞌ gɨt, cham tuꞌ na maakam jup ba kaiꞌchdhaꞌ gatuuk. Dai ji gu jaꞌtkam yaꞌ kam dhi oiꞌñgaꞌn nam baꞌ maakam jup ba ɨlhiiꞌñdhaꞌ jax nam xi chɨꞌji. Na guꞌ jaꞌpnim kaiꞌch maaꞌn kap na tu uaꞌñix nat paiꞌ tu uaꞌnak maadɨt gu bɨjɨk dɨr kam na buiñor tu daan gu Dios:
Bɨɨx pɨx jam puiꞌm biaꞌkaꞌ nap dai aap jix bhaiꞌ ji buusnichuꞌ,
nap guꞌ gammɨjɨ puiꞌ tu duñiidhaꞌ nap jax kaiꞌchdhaꞌ.
Baꞌ cham jɨꞌxdhaꞌ jaroiꞌ jax jum tɨɨdaꞌ nap tuꞌ bhaan cham am buatuꞌ,
nap guꞌ bɨɨx puiꞌ tu duiñchuꞌ.
5 ¿Guꞌ baꞌ palhbuiꞌñ ich aa panaas gu Dios nach jich uaꞌtulhiꞌñ na baꞌ dai guiꞌ dɨɨlh jix bhaiꞌ ji biꞌiidhaꞌ? Guꞌ baꞌ nach chulhiiñchuꞌn nach jich uaꞌtulhiꞌñ, ¿dhiꞌ aach baꞌ bhaan puiꞌ kaiꞌchdhaꞌ na cham tuꞌ miꞌ puiꞌp jim, nach guꞌ tɨix bhaiꞌ bua nach jich uaꞌtulhiꞌñ na baꞌ dai guiꞌx bhaiꞌ ji biꞌiidhaꞌ? Tuukuꞌ bhaan tu aꞌga iñ, cham tuꞌ gu iiꞌmdaꞌ bhaan.
6 Chaam tuꞌ ji matgɨm. Na guꞌ noꞌ cham miꞌ puiꞌ tu duiñchuꞌndaꞌ gɨt dɨɨlh gu Dios nat jax tɨi, ¿jax dhui gɨt jup ja sɨlhkaꞌndaꞌ gu jaꞌtkam yaꞌ kam dhi oiꞌñgaꞌn nam cham miꞌ puiꞌ jiimchuꞌ?
7 Noꞌ baabuiꞌr sɨlhkam kaꞌ gɨt nañ aañ pɨx palhbuiꞌñ gu Dios kɨꞌn nañ jax jix iatbiꞌ na baꞌ dai guiꞌx bhaiꞌ ji biꞌiidhaꞌ, ¿guꞌ jax ji chi ku baꞌx uaꞌtulhdhix kam kɨꞌn jiñ chɨɨgɨi bañ chulhiiñchudaꞌ?
8 Gio guꞌ noꞌr puiꞌ kaꞌ gɨt, ¿cham aa nach bɨɨx maap jich dhaagɨi bɨɨx aixim jix buam tu buimɨi gɨt na baꞌx bhaiꞌ tuch jimdaꞌ, nach guꞌx bhaiꞌ ba duñiaꞌ na baꞌ dai gu Dios jix bhaiꞌ ji biꞌiidhaꞌ? Puꞌñi jaꞌk sap jiñ aꞌga am jaiꞌ dhɨt nañ aañ puꞌñi jaꞌk ja mamtuxiꞌñ gu jaꞌtkam, guꞌ sap nam jax dhui pɨx cham jiñ kɨɨgalhiꞌñdhaꞌ gu jaꞌtkam. Ku guꞌ dhiꞌ dhi jaꞌtkam nam puiꞌñ aꞌga, ja tulhiiñchudaꞌ ji gu Dios.
Gu Paablo na puiꞌ ba tɨꞌyaꞌ nam bɨɨx pɨx jix uꞌuaꞌtulhdhix nam jɨꞌk jix jaiꞌch gu jaꞌtkam
9 ¿Guꞌ jax japim baꞌ ɨlhdhat jiñ kɇɇ dhiꞌ puiꞌ nañ jax chu jam aꞌgiꞌñ jiñ jaaduñ? ¿Aachiꞌ aa panaas nach jir Israel kam jaꞌtkam jix ioꞌm jir jix kɨkɨɨꞌ jaꞌtkam, guꞌ baꞌ panaas cham pɨk guiꞌ nam cham jir Israel kam? Matgɨm chaam tuꞌ ji nar puiꞌ. Jax dhui na guꞌ nach jax bax maat nach bɨɨx maaꞌn nach jax pɨx jich uaꞌtulhiꞌñ, sia nach jir Israel kam jaꞌtkam gio guiꞌ na cham, jich dhaam jup tuꞌiiꞌ gu uaꞌtulhdharaꞌ sia pɨk nar jax kaꞌ gɨt.
10 Gio guꞌp jum kaiꞌch miꞌ na mɨt paiꞌ tu uaꞌnak gu bɨjɨk dɨr kam:
Cham jaroiꞌ jaiꞌch na iam jix bhaiꞌm duukam jup tu duñiaꞌ,
nim maaꞌn kux jaiꞌch.
11 Ni ku cham jaiꞌch gu jaroiꞌ nax maatɨt tɇ kɇɇ,
baꞌ pu cham jaroiꞌ jaiꞌch na iam xi gaagaꞌ gu Dios.
12 Bɨɨx pɨx jamɨt bhaan bhɨi gu boi na paiꞌ cham tɨ kɨɨꞌ,
bɨɨx aixim jix buam pɨx ba tu jim am baꞌ.
Pu cham jaroiꞌx jaiꞌch iam nax kɨɨꞌp jum duukam xip tu duñiaꞌ,
nim maaꞌn dho moo kux jaiꞌch.
13 Gu ja chiichiñ jaꞌp ji buusan na jax noꞌ yasbhioꞌkix gu mukdhaꞌx dhɨbaalh,
dhiꞌ puꞌñi jaꞌk ji buusan nam giilhim jix iaꞌtbiꞌ.
Daman jaꞌp jup ji buusan nax maimdaꞌ gu ja chiichiñ,
jaꞌp na jax gu kookoꞌ nam ja chiichiñ am uaꞌkaꞌ gux maimdaꞌ na cham jiñ jimchudaꞌ noꞌt maaꞌn jiñ kɨi,
14 na guꞌ giilhim daix buam tuꞌm pɨx nam ba tu aꞌga.
Jaꞌpnip ji buusan panaas na giilhim jix xibuꞌ ja chiñ am dɨr buandaꞌ nam paiꞌ dhuuk giilhim kaiꞌchdhaꞌ.
15 Gio nam pɨx jix dhuꞌnpiꞌñ boopoyaꞌ nam muaꞌpuꞌ gu jaroiꞌ noꞌ mɨt ba oꞌbhaiꞌ.
16 Bɨɨx aixim jix buam kum pu tu buidhaꞌ paiꞌ nam jaꞌk jiimdaꞌ,
ja tulhiiñchudidhaꞌ am gu jaiꞌ jaꞌtkam mu jaꞌp paiꞌ.
17 Nam guꞌ pu cham ka maat noꞌp jix jaiꞌch gux kɨɨꞌ boi nam baꞌ gɨt bhaan bhɨɨji cham tuꞌ kam tulhiiñdhaꞌ,
18 pu cham paiꞌ dhuuk jax xim aaꞌndaꞌ am iam nam xix ɨɨbhiꞌñdhaꞌ gɨt gu Dios,
sia ku guꞌ tɨim aaꞌ nam gɨt jix ɨɨbhidhat tuꞌ kaꞌm nɨiꞌñdhaꞌ.
19 Jix maat ich dho na guiꞌ na jɨꞌk jax tu aagix, puiꞌ kaiꞌñkam tu uaꞌñix nam bhaan machiaꞌ bɨɨx gu jaꞌtkam na tuꞌr uaꞌtulhdharaꞌ, nam baꞌ cham jax tɨꞌyaꞌ na mɨt pu cham jɨꞌxkat maat janoꞌ na paiꞌ dhuuk dɨɨlh gu Dios bhaiꞌ ba ja tɨkkadaꞌ.
20 Na guꞌ janoꞌ gu Dios cham jɨꞌxkat jax tɨɨdaꞌ gu jaroiꞌ na cham uaꞌtulhdhix kaꞌ, sia kut tɨi bɨɨx pu tu duu na jɨꞌk jax tu aagix kaꞌ. Na guꞌ dhiꞌ na jɨꞌk jax tu aagix, miꞌ pɨx bhaan jich aagiꞌñ nach jix uꞌuaꞌtulhdhix.
Na puiꞌ ba tɨꞌyaꞌ gu Paablo nach tuꞌ sɨlhkam soiꞌch ɨlhdhat buiñor tɨ jɨɨgiꞌñdhaꞌ guch Xoiꞌkam na baꞌch uañdhaꞌ guch uaꞌtulhdharaꞌ gu Dios
21-22 Guꞌ jaꞌpjani na tu tuꞌiiꞌ, kani nach jaꞌp ka xi dhui dhiꞌ na jɨꞌk jax tu aagix nach bhaan ka tu aꞌga. Guꞌ Dios jix bhaiꞌch aagiꞌñ na jax jaꞌk duich uañchudaꞌ guch uaꞌtulhdharaꞌ, dhiꞌ pɨx bhaan jich aagiꞌñ na jax tu aagix na tu uaꞌñix, gam na mɨt jax jaꞌk tu jii bɨjɨk guiꞌ nam bhaankam ya jaꞌp tu aꞌgimɨk, guꞌ jaꞌpji dai noꞌch jix bhaiꞌ xi chu jiñkaiꞌñ bɨɨx jich jujur kɨꞌn. Guch Xoiꞌkam pɨx bhaan ji buppa nach sap tuꞌ sɨlhkam soiꞌch ɨlhdhai buiñor tɨ jɨɨꞌñdhaꞌ na baꞌ puꞌñi jaꞌk jich uañdhaꞌ guch uaꞌtulhdharaꞌ. Jaroiꞌ na pɨx sia uañdhaꞌ gu uaꞌtulhdhargaꞌn, dai pɨx noꞌt puꞌñi bɨɨx juraaꞌn kɨꞌn ba tɨ jɨɨꞌñ buiñor guch Xoiꞌkam.
23 Na mɨt guꞌ bɨɨx jum uaꞌtulh gu jaꞌtkam, baꞌ dɨlhkob jaꞌk ji bii mɨt na paiꞌ cham ja aꞌm ka tɨ nɨidhim gu Dios.
24 Guꞌ ji na guꞌ joidham jix chu joiꞌgɨꞌn gu Dios, baꞌ puiꞌ jaꞌk duu na gu jaroiꞌ na soiꞌm ɨlhdhai buiñor ba tɨ jɨɨꞌñdhaꞌ guch Xoiꞌkam, dhiꞌ ba uañchudhix kaꞌ gu uaꞌtulhdhargaꞌn, baꞌ miꞌ dhɨr dai nax joiꞌmdat bhaan ba tɨ nɨidhidhaꞌ. Gio puiꞌ pɨx na tu uañdhaꞌ, cham tuꞌ gu tuꞌ na jax dhuñiaꞌ nar jix bhaiꞌm duukam.
25 Na guꞌ janoꞌ nat jaax gu ɨꞌraꞌn guch Xoiꞌkam na mɨt mua, gu Dios pɨx dɨɨlh puiꞌ jaꞌk tɨi na gu ɨꞌraꞌn kɨꞌn bhaan tu ja uañiꞌñkaꞌ gu jaꞌtkam sia nar jaroiꞌ kaꞌ gɨt, dai noꞌt pɨx soiꞌm ɨlhdhak ba tɨ jɨɨꞌñ buiñor guch Xoiꞌkam. Baꞌx maatɨꞌ na gu Dios daix bhaiꞌ ji buusnichuꞌ, cham tuꞌ puiꞌ na gu jaꞌtkam. Cham tuꞌp jum buixiꞌñdhaꞌ guꞌ bɨjɨk ja bui gu jaꞌtkam sia kum jum uaꞌtulhiꞌñdhaꞌ,
26 dai na tɨ nɨɨradaꞌ na paiꞌ dhuuk tu namkidhix kaꞌ na baꞌ maaꞌn jimdam ba uañchudhix kaꞌ. Baꞌ miꞌ dhɨr nat paiꞌ dhuuk tu namki guch Xoiꞌkam bɨɨx gu uaꞌtulhdharaꞌ, bɨɨx ba tu ja uañdhim gu Dios guiꞌ nam jɨꞌk soiꞌm ɨlhdhat buiñor tɨ jɨɨꞌñdhim guch Xoiꞌkam.
27 Pu cham tuꞌ dho baꞌx jaiꞌch nach bhaan tuꞌ kaꞌm xich ɨlhiiꞌñdhaꞌ buiñor gu Dios, nach guꞌ cham tuꞌ miꞌ puiꞌ duiñchuꞌ na jɨꞌk jax jum kaiꞌch puiꞌ na jax tu aagix, puiꞌ pɨx nach bhaan tɨ jɨɨgiꞌñ.
28 Baꞌ bɨɨx na chich jɨꞌk tuꞌ bhaan ba tu aꞌga, bhaan ji chɨɨmo chich na gu Dios puiꞌ pɨx uañdhaꞌ gu uaꞌtulhdhargaꞌn gu jaroiꞌ, dai pɨx noꞌt soiꞌm ɨlhdhak buiñor ba tɨ jɨɨꞌñ guch Xoiꞌkam, cham tuꞌ na miꞌ puiꞌ tu duñiaꞌ na jɨꞌk jax tu aagix.
29 Gio guꞌ gu Dios cham tuꞌ dai gu Israel kam jaꞌtkam jir ja Dios tuk, guꞌ matgɨm bɨɨx ji gu jaꞌtkam nam jɨꞌk jix jaiꞌch na puiꞌp jir ja Dios tuk.
30 Na guꞌ dai maaꞌn pɨx jix jaiꞌch gu Dios, cham tuꞌ nam muiꞌx jaiꞌch. Daipuꞌx jaiꞌch gu Dios guiꞌ na uañchudaꞌ gu uaꞌtulhdhargaꞌn gu jaroiꞌ noꞌt soiꞌm ɨlhdhak buiñor ba tɨ jɨɨꞌñ guch Xoiꞌkam, cham jax bua sia ku matgilhdhix nar Israel kam piam ku guꞌ cham.
31 ¿Guꞌ baꞌ dhiꞌ jaꞌp jir jum duukam aa panaas na pu cham tuꞌ bhaaiꞌ puiꞌ na jɨꞌk jax tu aagix? Chaam tuꞌ ji nar puiꞌ. Jax dhui nach puiꞌ pɨx jup tu duiñchuꞌ na jɨꞌk jax tu aagix aach nach jɨꞌk buiñor ba tɨ jɨɨgiꞌñ guch Xoiꞌkam.