33
1 «Sohõ, Ayuba, ay gʼa wiri ni ga, ma haŋajer ay šenney se,
haŋa kayandi ay šenney kul se!
2 Guna, ay gʼay miɲoo feeri,
ay deenoo ga šelaŋ ay miɲoo ra,
3 Šerretaraa kaŋ goo ay binoo ra nda ay ga šenney wey har,
bayray henanante no kaŋ ay miɲoo gʼa har.
4 Irkoy Hundoo kʼay tee,
Hini-kul-koyoo miɲoo hunsaroo kʼay hunandi.
5 Nda nʼga hin, ay zaabi,
soolu ka kay ay jine!
6 Nga ne, Irkoy do, agay nda ni kul ga sawa,
agay hunday mana hun kala labudiini ra.
7 Woo ra nʼsi hima ka hunbur agay ka ni binoo dunbu,
ay hinoo si hin ka ni šiita.
8 Amma ni šelaŋ ay jine,
ay maa ni šenney.
9 Ni nee: ‹Ay ga henan, ya na ifutu tee,
ay binoo ga henan, laybu sii ay ga.
10 Woo kul, Irkoy goo ma kobay ceeci ay ga,
a gʼay dii nga iberoo.
11 A gʼay cewey gaala nda bundu,
a gʼay dira takaa kul koroši.›
12 Ay ga ni bayrandi kaŋ woo ra ni sii nda cimi,
zama Irkoy bisa adamize.
13 Macin se nʼga yenje wiri a ga,
kaŋ se a si ni šenney zaabi se wala?
14 Irkoy ga šelaŋ boro se nda takaa woo hõ,
suba a ga šelaŋ boro se nda taka tana foo,
amma boro si haŋajer.
15 Handiri ra, cijin here bangayyan ra,
waati kaŋ jirbi koma na adamize dii,
ka gar i ga kani ngi daaroo boŋ:
16 waatoo din a ga borey haŋawey feeri kʼi bayrandi
kʼi cawandi henna,
17 hala nga ma adamize moorandi nga teegoy laaley
ka boro hallasi bolsay ra,
18 hala nga mʼa hallasi saaraa guusoo ga,
yaaji masi nga hunaroo halaci.
19 Koyne mo Irkoy ga boro gooji
nga wircoo daaroo boŋ,
gurzugay si ben gaahamoo ra.
20 Ŋaayan kul mma tar a se,
ba ŋaayaney kaŋ ga hanse ka kan.
21 A ga ɲom ka gaahamoo kul kaa a ga,
birey kaŋ boro si dii ey, sohõ boro ga dii ey.
22 Nga hundoo ga man saaraa guusoo,
nga hunaroo goo hundi diikey kabey ra.
23 Amma nda almalayka kaŋ ti waafakandikaw goo a jere,
almalayka foo almalaykaa zenber (1.000) game
kaŋ ga adamize cebe haya kaŋ a ga hima kʼa tee,
24 a ga alhormo tee a se, ka nee Irkoy se:
‹A hallasi, a masi zunbu saaraa guusoo ra!
Zama ay duu haya kaŋ ay gʼa bana kʼa feeri.›
25 Waatoo din gaahamoo ga tee sanda zanka gaaham,
a ga tee sanda nga soogataraa waatoo.
26 A ga Irkoy suurandi, a ga alhormo tee a se,
a ga koy kay a jine nda ɲaali.
Irkoy ga boraa willi nga šerretaraa dogoo ra.
27 A ga don adamizey jine ka nee:
‹Ay na zunubu tee, ay na haya šerrantaa šiirandi,
ya na duu zukandoo kaŋ nda ay ga hima.
28 Irkoy nʼay soolam, ka gar ya nka hima ka zunbu saaraa guusoo ra,
sohõ ay ga huna ka dii gaayoo koyne!›
29 Nga ne, woo kul Irkoy gʼa tee adamize se,
a gʼa tee cee hinka, cee hinza.
30 Takaa woo nda a ga adamize hundoo hallasi saaraa guusoo ra,
ka baahunantey gaayoo daŋ a ga.
31 Aywa, Ayuba, haŋajer ya ne!
Dangay, agay no ma šelaŋ!
32 Nda šenni goo ni do, tuuru ya ne!
Šelaŋ, zama ay ga baa ma duu cimi.
33 Nda manʼti woo, adiši haŋajer ya ne!
Dangay, ay ga lakkal cawandi ma ne!»