32
Elihu futuroo
1 Ayuba cere hinzaa fay nda kʼa zaabi, zama Ayuba do boro šerrante ti nga.
2 Waatoo woo, Barakel kaŋ ti Buz alkabiilaa boro, kaŋ si hun kala Ram alaayan beeroo ra, nga izʼaroo Elihu hanse ka futu. A hanse ka futu Ayuba ga, zama Ayuba ga nga boŋ dii šerrante Irkoy jine.
3 A futu Ayuba cere hinzaa ga, zama i mana hin ka yee ka duu zaabi, amma woo kul, i nee kaŋ Ayuba tooɲe.
4 I kul žen Elihu, woo se Elihu batu jina ka duu ka šennoo zaa ka šelaŋ Ayuba se.
5 Waatoo kaŋ Elihu bay zaabi sii i kone, a futu.
Elihu na šennoo zaa
6 Barakel kaŋ ti Buz boro, nga izʼaroo Elihu na šennoo zaa ka nee:
«Aru sooga ti agay, war manʼti kala boro žeenayaŋ,
woo se ay jijiri, ay hunbur
kʼay bayhayaa daŋ war jine.
7 Ya nka nee ay boŋ se: ‹Boro žeeney ma šelaŋ,
ngi jiirey booboyanoo ga kate i ma lakkal cawandi.›
8 Amma nda cimi, hundoo kaŋ goo adamize ra,
manʼti kala Hini-kul-koyoo hunsaroo kaŋ ga adamize noo fahamay.
9 Ka duu jiiri boobo si boro noo lakkal,
manʼti boro žeeney no ma šerretaray bay.
10 Woo se ay ga nee kaŋ ma haŋajer ya ne,
agay mo gʼay bayraa cebe ma ne.
11 Aywa, ay na war šenney batu,
ay na haŋajer war lakkaloo se,
war ma šelaŋ hala war ma too war šenney kaydogoo ga.
12 Ay na lakkal daŋ war se,
amma war affoo kul mana hin ka Ayuba kakaw,
boro kul mana nga šenney zaabi.
13 Woo kul, war masi nee: ‹Ir duu lakkal:
Irkoy hinne no ma hin ka cebe a se kaŋ a dere, manʼti boro!›
14 Manʼti agay se Ayuba šelaŋ,
adiši ay sʼa zaabi nda war šenney dumi.
15 Miɲey daaba, i mana šelaŋ koyne,
šenni sii miɲey ra!
16 Yʼi batu, zama i si šelaŋ,
zama i kay, i si šelaŋ koyne wala?
17 Woo ra agay mo, ay ga šennoo zaa,
agay mo gʼay bayraa cebe.
18 Zama šenni boobo goo ay do,
ay hundoo gʼay gaabi ya šelaŋ
19 A ga tee ya ne sanda alaneb hari mooro
kaŋ ga zarga ay gundoo ra,
sanda hunbar taagayaŋ kaŋ ga baa ka bagu.
20 Ay ga šelaŋ hala ya duu ka hunsar,
ay gʼay miɲoo feeri ka zaabi.
21 Ay si borey daŋ cere jine,
ay si adamize kul zanzaŋ.
22 Zama ay si wan boro zanzaŋyan,
nda ay nʼa tee, ay Takakaa gʼay derandi nda cahãyan.»