23
Cee hinzantoo kaŋ Ayuba na Elifaz zaabi
1 Ayuba zaabi ka nee:
2 «Ba hõ ay dukuroo mma tee tureyan,
ay kaboo gʼay marayyanoo hunguši.
3 He! Nda ya mma bay nongu kaŋ ra ay ga duu a,
nda ya mma hin ka too nongoo kaŋ ra a goo!
4 Ay gʼay misoo hẽe a ga,
ay gʼay miɲoo too nda šenni.
5 Ay ga šenney bay kaŋ nda a gʼay zaabi,
ay ga faham hayaa kaŋ a gʼa har ya ne.
6 A ga nga gaaboo kul daŋ kʼay wurru wala?
Kalaa, a mmʼay lakkal de.
7 Boro šerrante goo no din kaŋ ga šelaŋ a bande,
woo ra ay ga hun ay ciitikaa ra hala abada.
8 Amma nda ay koy waynahunay, a sii no,
waynakaŋay here ay si dii a.
9 Kaboo mma šiita hawsa here, ay si dii a,
a mma tugu gurma here, ay si bay.
10 Ka gar, a ga fondaa bay kaŋ ga ay goo,
nda a nʼay sii, ay ga henan sanda wura.
11 Ay cewey hanga nga cee dogey,
ay hanga nga fondaa, ay mana šiiri.
12 Ya na hibi nga miɲoo yaamarey ga,
ay na nga miɲoo šenney dii ka bisa ay boŋ waney.
13 Amma nga, a si bere,
may no ma hin kʼa tunandi?
Haya kaŋ a baa no a gʼa tee.
14 Hayaa kaŋ a na kayandi ay here, a gʼa tee,
wey cine booboyaŋ goo no.
15 Woo se ay lakkaloo ga tun a jine,
nda ay miile, ay ga hunbur a.
16 Irkoy kʼay binoo kaa,
Hini-kul-koyoo nʼay hunburandi.
17 Amma manʼti kubawey no mʼay halaci,
manʼti kubay komaa no kaŋ gʼay daabu.»