22
Cee hinzantoo kaŋ Elifaz na šennoo zaa
1 Elifaz, Temaŋ boraa zaabi ka nee:
2 «Adamize ga hin ka haya nafa Irkoy se wala?
Boro lakkalkoyni si haya nafa kala nga boŋ se.
3 Macin no ni šerretaraa gʼa hanse Hini-kul-koyoo se?
Macin no a ga duu a ni dira taka laadirantaa ra?
4 Kaŋ se nʼga hunbur a se, a ga ni zarabi,
a ga ciiti ni bande wala?
5 Manʼti ni borolaalataraa nka beeri wala?
Ni laybey si kabandi wala?
6 Nʼna alman dii ni armaa ga bila addalil,
nʼna bankaarawey kaa borey ga kʼi naŋ gaa koonu.
7 Jawkoynoo, manʼa noo hari,
heraykoynoo, manʼa noo ŋaayan.
8 Gandaa sii kala gaabikoynoo kaboo ra,
borey kaŋ a baa no ma goro a ra.
9 Nʼna woyey kaŋ kurɲey buu naŋ kabe kooney,
nʼna alyatimey gaaboo kayri.
10 Woo se kumsay ga ni kuubi ka ni bere,
de nʼga hunbur dogoo din da.
11 Adiši, nʼsi dii kubaa,
nda hari boobaa kaŋ ga ni daabu wala?
12 Irkoy nka sii beene, beenaa ra?
Guna takaa kaŋ nda handarawey ga mooru!
13 De nʼga nee: ‹Macin no Irkoy gʼa bay?
A ga hin ka ciiti duula bibi tik ra?
14 Duulawey manʼti kala sirri a se, a si dii haya kul,
waati kaŋ a ga beenaa kuubi kʼa bere.›
15 Aywa, ni mma baa ma cindi fondo jinaa ga,
woo kaŋ boro laaley nʼa gana?
16 I nʼi dii za waatoo mana too,
ngi asaasey ga hima nda isa kaŋ ga mun.
17 I nee Irkoy se: ‹Hibi ir ga!›
Macin no Hini-kul-koyoo ga hin kʼa tee i se?
18 Ka gar nga no ka ngi hugey too nda gomni.
Amma boro futu hoyraa ma mooru ay ga!
19 Šerrantey ga dii a, i ga ɲaali,
borey kaŋ mana ifutu kul tee gʼi ɲooɲo ka nee:
20 ‹Boraa kaŋ gʼir gandu mana dere wala?
Nuunaa mana ngi hayey ŋaa wala?›
21 Ay gʼa wiri ni ga, ma waafaku nda Irkoy,
nʼga duu alaafiyaa,
woo ra woo kaŋ nʼga kaa ka ti a ga boori.
22 Ay gʼa wiri ni ga, ma haŋajer nga cawandoo se,
de ma nga šenney daŋ ni binoo ra.
23 Nda ni willi kate Hini-kul-koyoo ga,
nʼga yee ni takaa žeenaa ga,
nda nʼga ifutu moorandi ni gorodogoo.
24 Wuragoo warra laboo ra,
Ofir gandaa wuragoo fur gooroo tondey ra,
25 woo ra Hini-kul-koyoo ga tee ni wuragoo,
a ga tee ma ne nzorfu kaaray boobo.
26 Woo ra nʼga duu ɲaali Hini-kul-koyoo ra,
nʼga ni ndumoo jer Irkoy here.
27 Nʼgʼa suurandi, a ga maa ma ne,
nʼga ni meefurey kaa.
28 Nda nʼna haya kayandi, a ga tee,
gaay ga bangay ni fondawey ga.
29 Nda boroyaŋ kaŋ, nʼga nee:
‹Wa tun ka kay,
Irkoy ga boraa jer kaŋ na nga boŋ yeeti ganda.›
30 Ba boraa kaŋ na goy futu tee, a gʼa feeri,
a gʼa feeri ni kabe henanantey sabbu se.»