Inisenisi meta kaiwa hesau masina se hepitali na se tole ginaha kewadiyena na se gabu, na kasuna panena ye namwakalili. Numa Tabuna unai yodi huyatapwalolo udiyedi inisenisi kabagabuna kewana ne unai inisenisi se gabugabu (Mataiyo 2:11, Luka 1:9-10).

Isalaela meta Yakobo hesana hauhauna Yaubada ye tole (Genese 32:28). Hesa ta kaniyona ede, Yaubada maiyana tauhaikabi, yo, Yaubada taukabihekahinina, yo, Yaubada tausaedikwaina. Dius tamowaidi, siya Isalaela kana isimulitao, unai ede se kataidi siya Isalaela tamowaidi.

Iso meta Yakobo kana kaha, taudi labui meta godegode (Genese 25:19-26). Iso hesana hesau meta Edoma (Genese 25:30), na yodi teha meta Idumiya, iya ede Isalaela teha yawana unai.

Iyala kapinana meta Loma yodi tauꞌiyala bodana lakilakina taubagunaedi, badodi ede 600.

Iyala taubagunaena hekadi wasadi se kulidi Wasa Namwanamwana bukana udiyedi (Maleko 15:39). Iyala taubagunaena tamowaina katakataina hesau meta sentuliyo. Iya Loma yodi tauꞌiyala badodi 100 ye bagunaedi. Loma yodi tauꞌiyala ku hasili.