2
Mand na Kiristaani
1 Niki ɗu nik ŋ Kiristaani oniɗ ɗu kaañ, waaɗi a waaɗ ɗu giifiɗta ɗu, Fuuɗsi Hoolohngaani oniɗ ɗu ne ɗu nik yino, keeñkoh na yirmoh raakiɗ ŋ harmban ɗu, wa ineem haa e ?
2 Kon mitɗaat sumi ŋ sum : Raakaat hotohaaɗ yino, ɗu waaɗtiɗoh ɗu nik yino, ɗu nik keeñ yino, na liiɓohaaɗ yino.
3 Kinaat tum ali in ngaŋ hundiskoh wala ŋ hotsiɗuk, waaye ruhsiɗaat haf ɗu, ɗu eɗ ɓinooɓi cir po haa ɓeɗ uup ɗu.
4 Yaa nu nga kinaat top ŋ haf ce dong, waaye, a namaat liiɓ ŋ ɓinooɓi.
5 Mandaat ŋ harmban ɗu findi Kiristaani Yeesu mand :
6 Ini a moos nik keeh-keeh,
wa Kooh,
waaye niki a nik yino na Kooh weem,
a ambɗi wa findi ini a joy ŋoɗoh.
7 Waaye a woluk woluk ineem,
a tummba haf ce ñaam keeh-keeh,
a nikka findi ɓo' ci ;
ɓo' kiŋ ɗe weɗ hotuk,
8 a ƴissuutiɗta haf ce,
a kerhiɗta Kooh po a teyɗukka kaan,
kaan ngaŋ kurwaa sah.
9 Ineem weɗ tah
Kooh rapiɗta ɗe ŋ ɗiska uup ɗafuk,
a eɗta ɗe tiiki uup tiik ci jen,
10 ne ŋ tiikiŋ Yeesu,
feruuɗ ci nik ŋ Eel ci na kehƴi
na ooɓ kehƴi jen ƴek,
11 te nguɓ ci jen teyɗuk woo ne
Yeesu Kiristaa a yi Heɗi,
wa yakiɗ Kooh Baabi.
Siñaariɗ findi hor ciŋ eel ci
12 Mbaa ɓaah ciŋ ngo ŋ keeñkoh, ɗu moos nik kerhiɗiɗ Kooh. Ini ŋ nikɗi na ɗu kinaat tah po wa haawsuk, ɓaataata, pangkaat na nup Kooh po muci ɗu mucɗu rim in.
13 Laam, Kooh a yi tum nga ɗu ne ɗu waaɗ tum in ci neɓ ɗe te a yi na name ɗu ca tumɗukoh.
14 Tumaat in ceem jen, wa hunuu na ñukumsuk, wa hunuu na ñaɗtuk.
15 Ɗu tum ɗaa ne ɓo' raakuu woyaah nga ɗu, ɗu hool, ɗu nik kuɓu Kooh raakaaɗi sikka ŋ ɗooƴ ɓooɓi nduuɗkiɗ ci, yurhaaɗiiciŋ Adina. Ɗu siñaariɗ ŋ ɗooƴ ɓa findi hor ciŋ eel ci,
16 ɗu eɗ ɓa woo kiŋ kipes ki. Wa hey tahe po ŋ ndamkoh ɗu ŋ mbehi Kiristaani hayohan. Jaar, pangkiŋ ngo miskiɗi nikuu ɓarang ɓarang.
17 Ali ŋ kaan sah, po kipes kiŋ ngo mand na seeƴuk aamkaah, wa yiifu ŋ seeƴki nik kosi ɗu kos sah, ŋ hey sume nga, te ŋ ɓaahan sum ki na ɗu jen.
18 Ɗu, namaat sum, ɗu ɓaah sum ki na so !
Pool woosiɗ Timoote na Epaforodit
19 Ŋ niki ŋ nik ŋ Yeesu Heɗi, ŋ oolkiɗ ne ŋ hey woose Timoote nga ɗu maañaaɗi, ne mi, ŋ nam raak ini soosɗan keeñiŋ ngo ŋ ini a woyan ndo nga ɗu.
20 Ɗal a yi ɗah, ŋ raakɗi ali ɓo' yi na yege na so in ci mi na yege, yi na liiɓee nga ɗu keeh-keeh.
21 Ɓinooɓi jen na liiɓe in haf ɓa, waaye in ciŋ Yeesu Kiristaa haa.
22 Waaye a yi, ɗu inhiɗ ne a teeɓohiɗ findi a mand : A pangkiɗiɗ Yegɗohiŋ Muci na so, findi kuɓu ŋ sero baab.
23 A yi ŋ liiɓ ne ŋ hey ɗu ɗe woosohe, mbehi ŋ inhohan findi ŋ mirndohan.
24 Waaye wa wooriɗ to ŋ Heɗi ne ŋ hey name hay ɗiskiŋ ɗu maañaaɗi, mi ŋ haf fo.
25 Ŋ namiɗ hot ne wa raakiɗ etoh ŋ woosoh ɗu Epaforodit kotii. A ɓaah ɓoo ŋ kosi ɓoo ɓaah, te a huntohiŋ ngo ŋ pangki na ini ɓoo na hiñohe. A yi ɗu woosohee so, ne a ɓaatɗoh ho ŋ in ci ŋ etoh.
26 A mareen ɗu hot jen te a raakeen ini misik ɗe ŋ yegi ɗu yegee ne a kosaayeen.
27 A kosaayeen po a heeɗa kaane ; waaye a misikka Kooh, ŋ nammba misik Kooh ne ŋ raakuu keeñ reehiɗ nga.
28 Kon ŋ woosiɗ ɗe na seesuk ne ɗu sumis ngaŋ hot ɗe, te ŋ ineem, soosi ŋ soos reeh.
29 Taambɗukaat ɗe ŋ Heɗi, na sum keeh-keeh, eɗaat ɓi mand na ɗe cir ;
30 laam wa pangkiɗ Kiristaani tah ɗe heeɗa kaane ; a eɗohee kiñin kiŋ ɗe ne a tum ini ɗu hee so tumɗe nikee ne ɗu ɓii ŋ ndii ɗah.