Fiisi Pool kaɓɗoh ɓi Filippi
Rangsohaani
Pool ɓaahee ŋ Israayel ci, ŋ cuuɓiŋ Benyaamin. A nikee Farisen. Ŋ finho Paantakot, wi Janguuni camb ɓaatuk, a ɓaahee ŋ ɓi tolfiɗee kosiɗ ci. Waaye wa raakka mbeh, a cohha na Yeesu, a kossa po a nikka Apootar sah. Teerndiŋ "Tum ciŋ Apootar ci" teeɓohiɗ pangkiŋ ɗe wi a nik Apootar ini kooɗoh ŋ saar 13.
Kaɗaŋ Pool koc ŋ kur kaŋ Filippi, wa nikee ŋ ɓaaɓiŋ ɗe yakki kanakɗoh. Kaɗi kanakɗoh na wi kaahayɗoh, ɓo' amb ne ceɗ naandsuku ŋ teerndiŋ Tum ci 20:2,6. Kaɗ ceem nikee ŋ ɓaaɓiŋ ɗe yakki kaahayɗoh.
Wi Pool na fiise kaɓɗohii, a nikee ŋ kaso ŋ kahnaŋ buur, waaye nik ne wa nikee ŋ Seesare wala ŋ Rom wala ŋ ɗisik wiiriis ɗah ɓo' inahɗi, waaye wa kaɓɗohi riif na sum. Pool teeɓohiɗ harmban ce na kosiɗ caŋ Filippi findi wa neɓohe, a corkiɗta ɓa ŋ onohi ɓa kaɓɗoh ɗe taamboh ŋ Epaforodit. Te wa mand haa ne a Epaforodit na hee ɓayndohe kaɓɗohi a fiis ɓi Filippi wii ne a wiirkee ɗah. Findi a na tumohee wa ŋ kaɓɗoh ciŋ ɗe jen, Pool dengiɗ ɓa baahiɗ, a woytohha ɓa ŋ in ci ɓa joy wortuk.
Fiisi Pool kaɓɗoh ɓi Filippi kaɗtiɗoh an :
- Pool kañɗiɗ ɓi Filippi te a kiimiɗta ɓa Kooh 1:1-11
- Miskiɗ ci jen baahiɗ feeh Yegɗohiŋ Muci wii kaɗ fiki ɗah 1:12-30
- Ruhsiɗaat haf ɗu, ɗu nik yino, findi Kiristaani tumoha 2:1-11
- Taamboh ŋ ini Kooh tum, melciɗaat findi hor ciŋ Asamaan 2:12-18
- Pool hey tuuƴe Epaforodit na Timoote ŋ kur kaŋ Filippi 2:19-20
- Ini uup raak njiriñ ŋ Pool na ɓi Filippi 3:1–4:1
- Sumaat ŋ niki ɗu nik ŋ Heɗi 4:2-9
- Pool corkiɗiɗ ɓi Filippi ŋ onohiŋ ɓa 4:10-20
- Askohi 4:21-23
1
Kañɗohi
1 Ɓoo ɓii kañiɗ ɗu, ɗu ɓi ɓo'-Kooh ci nik ŋ Filippi, ɗu ɓi hoolɗu wuu Kooh ŋ niki ɗu nik ŋ Kiristaani Yeesu. Mi yi Pool, na Timoote, ñaam ciŋ Kiristaani Yeesu, ɓoo ɓii kañiɗ ɗu jen, ɗu na ɓi adgoh ɗu na ɓi na taambkohe in ciŋ Janguuni.
2 Kooh Baabiŋ ɓoo baahohaat ɗu, a on ɗu jam ; Yeesu Kiristaa Heɗi baahohaat ɗu, a on ɗu jam !
Pool kiimɗiɗ ɓi Filippi Kooh
3 Mi yii corkiɗ Koohiŋ ngo, waas nu ŋ liiɓ nga ɗu ɗah ;
4 te ŋ kiimɗeesa ɗu Kooh ɗah, mi na kiimɗee ɗu jen na sum,
5 sagu ɓaahi ɗu ɓaah ŋ pangkiŋ Yegɗohiŋ Muci ŋ mbeha ɗu kosoh po woti.
6 Wa wooriɗ to ne Kooh yi camb panguk baahiɗ nga ɗu, a heya taalndiɗe po a ɗiindoha ŋ mbeha Kiristaani Yeesu hayohan.
7 Wa waas ŋ liiɓiɗta ɗu ineem, ɗu jen, sagu keeñkohi ŋ keeñkoh ɗu, na raaki ɗu raak jen ɓak ŋ baahohi Kooh baahoh ho ; wa nikoh ɗaa ŋ niki ŋ nik ŋ kaso, wa nikohha ɗaa ŋ teeɓohi mi na teeɓohe ne Yegɗohiŋ Muci, wa in baahiɗ te wa keeh.
8 Kooh inhiɗ ne ŋ keeñkohiɗ ɗu jen ŋ waaɗohi nik ŋ Kiristaani Yeesu.
9 Ini mi na kiimɗee ɗu weɗ ne waaɗohiŋ ɗu ɓaatkee, wa uupee riif na inah na inhisoh keeh-keeh.
10 Ŋ ineem, ɗu min inhisoh ini raak njiriñ ne ɗu hool te ɓo' raakuu woyaah nga ɗu ŋ mbehi Kiristaani hayohan.
11 Ɗu nam riif na ini kiyurah na rime ŋ ɓo', wa puloh ŋ Yeesu Kiristaa, te wa yakɗoha Kooh na ƴeek ɗe.
Yegɗohiŋ Muci na ɓaatke ɓaatuk
12 Ɓaah ciŋ ngo, ŋ waaɗiɗ ne ɗu inah inii : Ini rahas so tufkiɗɗi Yegɗohiŋ Muci, wa ɓaata kaɗiɗ fiki kay.
13 Laam, ɓooɓi nik ŋ kahniŋ buur wii, na ɓinooɓi jen, wa leeriɗ nga ɓa ne e Kiristaani tah ho taƴu ŋ kaso.
14 Te ini uup ŋ ɓaah ciŋ ɓoo kosiɗ ci, taƴuukiŋ ngo wii tahiɗ po ɓa ɓaatiɗ ooluk Heɗi, ɓa ɓaatta kaañ yegɗoh Yegɗohiŋ Muci te ɓa neƴƴohɗi nga.
15 Ali nik ne ɓum nga na yegɗohe Kiristaani ŋ siisoh na lahtoh, ɓinooɓi na tumee wa na liiɓ moɗiɗ.
16 Ɓeem ɓa na tumee wa sagu waaɗohi nik nga ɓa, ɓa inhiɗ ne ŋ naku ne ŋ teeɓohee ne Yegɗohiŋ Muci baahiɗ.
17 Ɓinooɓi na yegɗohe Kiristaani ŋ hundiskoh, in ci ɓa waaɗ hoolɗi ; ɓa na dabgiɗe ɓaat miskiɗ nikiŋ ngo ŋ kasooni.
18 Waaye ali in ! Findi wa min mand ɗah, wa nik ŋ yurhiɗ wala ŋ yurhaaɗi, Kiristaani yii yegɗohu, te ŋ sumiɗ nga. Ŋ hey ɓaate sum nga,
19 laam ŋ inhiɗ ne wa mirndohan nik faɗsuukiŋ ngo, taamboh ŋ kiim ci ɗu na kiime Kooh na ɓaatɗohiŋ Fuuɗsiŋ Yeesu Kiristaa.
20 Ini mi na seke ngaŋ seesuk, ŋ oolkiɗ ne, ŋ heyɗi nike tumaaɗi ini ŋ naku, waaye findi ŋ meeɗa tumoh rek, ŋ risan ndengiɗ po ŋ yakɗoh Kiristaani faaniŋ ngo ŋ kipes wala ŋ kakaan.
21 Nga so, kipes weɗ Kiristaani, ali ŋ kaan sah, wa ɓaatan ndo kaɗiɗ fiki.
22 Waaye ŋ taalndiɗ ŋ pesee ndii ɗah, ŋ hey mine panguk pangki raak njiriñ. Mbaa ŋ inahɗi andi, ŋ heen kooɗe ɗah, ŋ hee kooɗe kaan wala taalndiɗ pesee ndii.
23 Ñam yii ŋ harmban in kanak : Ŋ waaɗiɗ saɓsukoh na kipes kii ne ŋ nik na Kiristaani, weɗ ngisoh fuuf.
24 Waaye, saguuɗu ini uupiɗ njiriñ weɗ ne ŋ ris pes ndii.
25 Ineem wooriɗ to, weɗ tah ŋ inhiɗ ne, ŋ risan ŋ serooɗu jen, ne ŋ ɓaatɗoh ɗu, ɗu kaɗ fiki ŋ kosi ɗu kos, ɗu nam sum nga.
26 Ineem tahiɗ po, ŋ hayis nga ɗu ɗah, ɗu hey ɓaate ndamkoh Kiristaani Yeesu saguuso.
Hiñoh wuu Yegɗohiŋ Muci
27 Findi wa min mand ɗah, pesaat kipes huniɗ na Yegɗohiŋ Muci ŋ ini kaɗ ŋ Kiristaani ne, ŋ hay nga ɗu ŋ hayɗi nga ɗu, ŋ kerah ne ɗu ndengiɗ, ɗu yino, te ɗu na hiñohe na keeñ yino wuu kosiŋ Yegɗohiŋ Muci.
28 Kinaat faɗ sangiɗ ci ɓa ɓekee neƴƴoh nga ɗu ŋ ali in. Ineem hey teeɓe sangiɗ ci ne ɓa ɗii ŋ waas ɗumbu, wa teeɓ ɗu muc puloh ŋ Kooh.
29 Ini kaɗ ŋ Kiristaa, ɗu baahohu kos dong haa, waaye ɗu namiɗ baahohu raak miskiɗ saguuce.
30 Ɗu ɓii hun na so ŋ hiñohi ɗu hot to hiñohe, te ŋ ris nga poyi, findi ɗu kerhoha.