4
Andiiniŋ sokohi
1 Wa raakissa mbeh, Yeesu nikka ŋ sereendaŋ cookma, a jangɗoheeɗa. Mboolnda wilee ɗe laayya lool, po a mirndohha rap ŋ gaal, a ɓooffa nga ; a nikka ŋ masma, mboolnda nikka ŋ sereenda.
2 A jangɗeeɗa ɓa ŋ andiin inaa laayiɗ, a woosa ɓa ŋ ɗooƴ jangɗoha ne :
3 « Sikɗukaat ! A nikee guuroh, a kaɗta soka.
4 Wi a soke, a saaweeɗa tisohi, in nga hennda ŋ waasi ŋ ɗooƴ yohni, sel ci hayya ñammbaa.
5 Raakka ci keen ŋ ɗisik laayaaɗi merhey, raakiɗ atoh, tahha po ca arra paar,
6 waaye wi nohi dam, in ca paaree leeɓpa po ca onnja sagu ini ca raakeeɗi niir nooɗiɗ.
7 In ŋ tisohi nammba keen ŋ ɗisik raakiɗ ñaaɓaaɓ ; ca paarandoosa na ñaaɓaaɓ ca, ceem ndooƴca ca po ca raakɗi ali rim.
8 Waaye raakka ci keen ŋ keheƴ baahiɗ, ca paarra, ca yakka, ca rimmba, cum eɗohha rim ndaŋkiyaah-kaahay (30), cum ndaŋkiyaah-yasna-yino (60), cum teemet (100). »
9 Ƴutta, Yeesu woosa ɓa ne : « Ɓo' nu raak nof kerhoha ɗah, a kerhaat. »
10 Wa a saɓsukoh na mboolnda po a nikka na taalubeeci ndaŋkiyaah na kanak ci (12) na ɓooɓa meeɗ nik na ɗe, ɓa meekissa ɗe ini kaɗ ŋ andiin ceem.
11 A loffa ɓa ne : « Ɗu onuuɗ ne ɗu inah ini ɗasɗukiɗiŋ Nguuriŋ-Kooh. Waaye ɓaahaaɗiici na rahse in ci jen ngaŋ andiin
12 ne
“ ɓa markee baahiɗ, ɓa minuu hot ;
ɓa sikɗukee baahiɗ, ɓa minuu inah.
Ŋ ineem, ɓa ɓoƴsohuu kipes
po Kooh kee ɓa ɗaasa bakaaɗ ciŋ ɓa. ” »
13 Yeesu woyissa ɓa ne : « Ɗu inahɗi ini andiinii tokis e ? Kon, ne ɗu inah ci tas jen wa hey miske nga ɗu !
14 Sokohi na soke woo kiŋ Kooh.
15 Ɓum ɓeɗ ŋ sero waasi, ɗiski Woo ki saawu ; ɓeɗ ɓooɓi na kerhe woo kiŋ Kooh, Seytaani jaar hay, nihisa nga ɓa.
16 Ɓum ɓeɗ paaroh ŋ ini saawu ŋ kehƴi raak atoh ci ; ɓeɗ ɓooɓi na kerhe Woo ki, ɓa jaara teyɗuk na keeñ soosiɗ,
17 waaye ɓa na raakeeɗi niir ŋ haf ɓa, ɓa na maañeeɗi nga. Ɓa raak miskiɗ wala ɓa tolfiɗassee sagu Woo ki ɗah, ɓa ar faɗ.
18 Ɓum ɓeɗ paaroh ŋ ini saawu ŋ ñaaɓaaɓ ci ; ɓeɗ ɓooɓi na kerhe Woo ki, ɓa teyɗuka,
19 waaye liiɓsiɗoh ci, na raak-raak ci na njuyohe, na waaɗ neɓiɗ ciŋ Adina, amb ɓa po Woo ki minuu rim ali in.
20 Ɓinooɓi ɓeɗ paaroh ŋ ini saawu ŋ kehƴi baahiɗi ; ɓeɗ ɓi na kerhe Woo ki, ɓa teyɗuka. Ɓa raak rim, ɓum ndaŋkiyaah-kaahay (30), ɓum ndaŋkiyaah-yasna-yino (60), ɓinooɓi teemet (100). »
Laampaani
21 Yeesu woyissa ɓa ne : « Laampa na ɓayse ne wa kunu na kanoh wala wa ɗaaku ŋ ooɓ fiƴaangi e ? Wa na degse ŋ degohaaniŋ wa kay !
22 In nu ɗembɗu ɗah, wa ɗembɗu ne mbeh hey haye, wa teeɓohu. In nu ɗasɗu ɗah, wa ɗasɗu ne mbeh hey haye, wa teeɓohu noh cong.
23 Ɓo' nu raak nof kerhoha ɗah, a kerhaat. »
24 A woyissa ɓa ne : « Markissaat baahiɗ ini ɗu na kerhe ! Inhaat ne, ɓeesohaani ɗu na ɓeesɗohohe, weɗ ɗu ɓeesɗohsan, ƴut ɗah, ɗu ɓaatu.
25 Laam ɓoyi raak hey ɓaatse, waaye ɓoyi raakɗi, ini ƴissuuti a amb sah hey naafse nga ɗe. »
Tisoh ci
26 Yeesu woyissa ɓa ne : « Nguuriŋ-Kooh mand na inii : A nikee ɓo', a sokka tisoh ŋ yohon.
27 Ƴutta, a taalndiɗta, wek reesa ɗah a neehe, noh ɗah a kuruk. Tisoha paarra po wa yakka te a inahɗi findi wa kaɗoh po wa hennda ɗaa.
28 A merhey mi ŋ haf wa paariɗa, wa raakka pok, wa ɓiɗissa, wa marakka ;
29 wa ruunnda rek, a inahha ne nguɗ reyiɗ, a ɓayya japil, a nguɗtaa. »
Tisohiŋ mutardaani
30 Yeesu woyissa ne : « Ɓoo min mandtiɗkoh Nguuriŋ-Kooh na ye ? Ɓoo mina teeɓoh na winde andiin ?
31 Wa mand na kuɓu mutarda, wa sokuusa ɗah, weɗ na uupe ƴissuut ŋ tisoh ciŋ kidig ci ƴin ci na sokse ŋ nguuk jen,
32 waaye wa sokuusa po wa paarra ɗah, wa yak po wa uup ca, wa raak naak yakak po sel ci min taar ŋ saangniŋ wa. »
33 Yeesu jangɗohohee ɓa ɗaa, ŋ andiin laayiɗ findi andiin cii, a jangɗeeɗa ɓa in hend na ini haf ciŋ ɓa min amb.
34 A woyeeɗi na ɓa ŋ ini nikɗi andiin, waaye a ɗaayya na taalubeeciŋ ɗe ɗah, a toksiɗ ɓa ca jen.
Yeesu yeeɓkiɗiɗ cookma
35 Mbaɗi, wa noha muy, Yeesu woosa taalubeeciŋ ɗe ne : « Ɓoo kaɗaat ŋ ɓaka faahaŋ cookma. »
36 Ɓa faɗta mboolnda ndaam, taalubeeciŋ ɗe ɓayya ɗe na gaala a nikohe, ɓi gaal wiiriis hunnda na ɓa.
37 Ɗekka po pahul yakak kurukka, ginaah ca laɓkeeɗa ŋ gaala po wa riifiɗta na masuɓ.
38 Raak Yeesu neeheeɗa ŋ lecmaŋ gaala, a ooɓpa tiknukoha ŋ hafiŋ ɗe ; taalubeeciŋ ɗe yunnda ɗe, woosa ɗe ne : « Jangɗohohi, sooƴi ɓoo na sooƴe wii, tumɗi ɗa in e ? »
39 Wa a yunu, a ngassa puuɗsa, a woosa cookma ne : « Yeeɓka ! Seema ! » Puuɗsa seemmba, ɗiska eennda teɗ.
40 Ƴutta a woosa taalubeeciŋ ɗe ne : « Wa ye tah ɗu neek ? Ɗu ris kosɗi poyi e ? »
41 Ɓa feyuusa lool, ɓa woyeeɗa ŋ harmban ɓa ne : « Ƴaarii joy nik ɓa po puuɗsi na cookmi sah kerhiɗee ɗe ? »