3
Yeesu wirɗiɗ heɗ yaah ɓeendkiɗ
1 Wa raakka mbeh, Yeesu aasissa sinaagoga. Ndaam, ƴaar nikeen nga yaahiŋ ɗe ɓeendkee ɓeenduk.
2 Ɓum markiɗeeɗa Yeesu andi a hey wirɗe ƴaara ŋ mbehi na iɗsiɗkohse, ɓa raak yambaah ɗe.
3 A woosa ƴaara na yaaha ne : « Kurka fu tufuk ŋ fiki ɓooɓi jen. »
4 Ƴutta Yeesu meekissa ɓa ne : « Wa ye teyɗohu ŋ mbehi na iɗsiɗkohse, in baahiɗ wala in baahaaɗi, ɓo' joy joy hirpu nga wala a joy joy apu ? » Waaye ɓa lofɗi ɗe.
5 A markeeɗa ɓa na ayruk, a raakka neɓsaaɗi ŋ ndenga keeñ caŋ ɓa ndenge. A woosa ƴaara ne : « Raɗsa yaahiŋ ɗa. » A raɗissaa, wa wirra peng.
6 Farisen ca jaarra pul, ɓa kaɗta hotoha na ɓa langee na buur Herod, ne ɓa marak findi ɓa joy ɗe apoh.
Yeesu ɗaakɗukiɗ gaal ƴin
7-8 Ŋ jamanooneem, Yeesu na taalubeeciŋ ɗe kaɗta nika ɓakaŋ cookma, mboolo keeh-keeh puloh Galile hunnda na ɗe. Raakka ɓa kerah in ca a tumee, tahha po ɓa pulohha kur caŋ Yudee, Yerusalem, na kur caŋ Idime, na caŋ ɓaka faahaŋ kalaŋ Yurdan, na ina wil Tiir na Sidoon, ɓa nammba coh ŋ ɗiska na ɗe.
9 A woosa taalubeeciŋ ɗe ne ɓa ɗaakɗohaahaat ɗe gaal ƴin ; a sangee ne mboolnda baɓuk ɗe.
10 Wirɗa a wirɗee kosaayiɗ laayiɗ, weɗ tahee po ɓa raakee kosaay jen, giirkeeɗa giiruk nga ɗe ne ɓa laal ɗe.
11 Te jiiniici hotta ɗe ɗah, ca fol ɓooɓi ca amb ŋ fikiice, ca leehkiɗukohee ɓa ne : « A fu Kuɓkiŋ Kooh. »
12 Waaye Yeesu meeɗta ca ngas baahiɗ ne ca kinaat ɗe teeɓoh.
Yeesu taniɗ Apootar ndaŋkiyaah na kanak
13 Kurkohha ndeem, Yeesu rappa ŋ ɗafuk tango, a ɓeeɗukka ɓi ɓo' ŋ waaɗ-waaɗiŋ ɗe, ɓa hayya nga ɗe.
14 A kooɗta nga ɓa ɓo' ndaŋkiyaah na kanak (12) ne ɓa nik na ɗe [a teekka ɓa "Apootar"]. A tuuƴee ɓa, ne ɓa woya Yegɗohiŋ Muci,
15 ɓa aañee jiiniici, a eɗta ɓa hatili.
16 Ndaŋkiyaah na kanak ci (12) a kooɗee nike : Simong yi a teekee Piyeer ;
17 Saak na Saaŋ, kuɓuuciŋ Sebede ; Yeesu teekee ɓa Bowanerses wi tokis kuɓu inding ;
18 na Andare, na Filip, na Bartalemi, na Macce, na Tomaa, na Saak kuɓkiŋ Alfe, na Tade, na Simong yi nikee Selot
19 na Yudaa Iskaryot yi wor ɗe.
Yeesu na kilifaaniŋ jiiniici
20 Wa raakka mbeh, ɓi Yeesu aassa kahan, mboolo cohissa nga po a yi na taalubeeciŋ ɗe minɗi ñam.
21 Ɓi kahan ɓa yeggaa, ɓa kaɗta ɗe ɓaya, ɓa woyee ne : « Hafiŋ ɗe riifisɗi. »
22 Jangɗohoh caŋ waasiŋMusaa, ɓi pulohee Yerusalem woosa ne : « A Belsebul na ɗe ! » Ɓa woyissa ne : « Hatiliŋ kilifaaniŋ jiiniici weɗ a na aañohe jiiniici. »
23 Ŋ ineem Yeesu ɓeeɗukka ɓa, a woosa ɓa ŋ andiin ne : « Seytaani min na aañoh haf ce ?
24 Ɓooɓi ɓaah nguur hiñohee ŋ harmban ɓa ɗah, nguureem minanɗi tufuk.
25 Te ɓooɓi ɓaah kahan hiñohee ŋ harmban ɓa ɗah, kahneem minanɗi tufuk.
26 Kon, wa nik ne Seytaani na hiñohe ŋ ɗooƴ ce ɗah, nguuriŋ ɗe hey paysukohe te wa heeɗi minise tufuk, wa heen reehɗukohe.
27 Ali ɓo' minɗi aas ŋ kahan ɓo' raakiɗ hatil, a ɓay in ciŋ ɗe, te a tokɗi ɗe po a ndeng. Waaye a tok ɗe ɗah, a hey ɓaye in ciŋ kahan ce jen.
28 Ñam na woyee ɗu wa te wa keeh, ɓooɓi ɗaasnuk ɗah, ɓa hey ɗaasse bakaaɗ nu bakaaɗ na ɗal nu ɓa ɗal Kooh ɗah.
29 Waaye ɓo' nu ɗal Fuuɗsi Hoolohngaani, Fuuɗsiŋ Kooh ɗah, a ɗaassanɗi bakaaɗeem muk, wa taambɗan ɗe taambiɗ po faw. »
30 Yeesu woyiɗ ineem sagu ina ɓa woyee ne a jiini na ɗe.
Yeesu na ɓi kahan ɓa
31 Weɗi yaay ɓa na taambɗoh ciŋ ɗe reyoh, ɓa tufukka ŋ hara, ɓa nakohha ɗe ɓeeɗkiɗu.
32 Raak mboolnda ɓoofiɗ wiliɗ ɗe, a woyuusa ne : « Tassa yaay ɗu na taambɗoh ciŋ ɗa, ɓa ɗaa ŋ hara na meeksohee ɗa. »
33 A loffa ne : « Ɗu amb ne a ɓa yaay ɓoo, e ɓinde taambɗoh ciŋ ngo ? »
34 A marakka ɓooɓi wil ɗe, a woosa ne : « Ɓooɓii, ɓeɗ yaay ɓoo, ɓeɗ taambɗoh ciŋ ngo.
35 Ɓo' nu na haɓɗe ini Kooh waaɗ ɗah, ɓoyeem a taambɗoh ho ƴaar mbaa ɓitiɓ, wala yaay ɓoo. »