7
Kosaŋ kilifaanaŋ soldaar ca
1 Wa Yeesu ƴut woo na ɓooɓa ŋ in ceem jen, a kaɗta Kapernawum.
2 Raakeen ƴaar nga, a ɓaahee ŋ ɓa adgohee soldaar caŋ Rom, a raakka ñaam kosaayiɗ kosaay miskiɗ po a heeɗa kaane te ƴaareem a keeñkoheen ñaama lool.
3 A kerahha laamtohaŋ Yeesu, a woossa ɓi kilifa Yawuut nga ɗe ne ɓa kiim ɗe, a hay wirɗe ñaamiŋ ɗe.
4-5 Ɓa kaɗta ŋ Yeesu, ɓa kiimeeɗa ɗe keeh-keeh ; ɓa woosa ɗe ne : « Ƴaari woos ɓoo deey, a waaɗiɗ ɓoo, ɓi Yawuut ci. Te a yi sah taɓahɗuk sinaagogiŋ ɓoo. Weɗ tah, a cariɗ ɓaatɗohu. »
6 Yeesu hunnda na ɓa.
Wa ɓa kaɗ po ɓa heeɗa ree kahna, ƴaara woosissa nawleeciŋ ɗe ne ɓa woo Yeesu ne : « Ƴaari woo ne, kina yaaɓ nga kilifaani, a hot ne a yeyyooɗi ne fu aas kahan ce.
7 Ineem weɗ tah po, a nammba hot ne a ƴissuutiɗ ngaŋ hayoot nga ɗa ; woya woo rek, ñaamiŋ ɗe kuruk.
8 A raakiɗ ɓooɓi adgoh ɗe te a namiɗ raak soldaar ci a adgoh. Yaa nu a woo kaɗa ɗah, a kaɗ te yaa nu a woo haya ɗah, a hay. In nu a woo ñaamiŋ ɗe ne a haɓɗaata ɗah, a haɓiɗa. »
9 Wa Yeesu kerah ineem, a feyuusa ŋ ƴaara ; a woosa mboolnda ñaakɗee ɗe ne : « Ñam na woyee ɗu wa, ŋ Israayel ci sah, ŋ hotɗi ali ɓo' kosiɗ kosii. »
10 Wa ƴaaɓa woossee dokuk kahna, ɓa raak ñaama kosaayee wiriɗ.
Yeesu hultiɗiɗ kuɓka fiira
11 Ŋ finho ineem, Yeesu kaɗeeɗa kur ka na woyse Nayin. Taalubeeciŋ ɗe na ɓo' laayiɗ hunnda na ɗe.
12 A kaɗta po a heeɗa ree aasohaanaŋ kur ka, a cohha na ɓi ɓo' kaɗeeɗa uumba fiɗaaf komaaki fiir, yi fu inah ne yaay ɓa raakee ɗe yino te ɓitɓeem ƴaar ce kaaneen. Ɓo' laayiɗ ŋ kur ka huneen na ɗe, ɓa kaɗeeɗa ruy-ruy ca.
13 Yeesu Heɗ ɓoo hotta yaay ɓi kuɓka, yeem misikka ɗe lool, a woosa ɗe ne : « Kina fuɗ. »
14 A reɓpa, a degga yaah ŋ jaata, ƴaaɓa gaalɗohee wa tufukka, a woosa ne : « Ŋ woo ne : Kurka ƴaari. »
15 Kaanɗa kurukka ɓooffa, a jombeeɗa. Yeesu wikka ɗe yaay ɓa.
16 Ɓooɓa nikee ndaam jen feyuusa, ɓa yakɗeeɗa Kooh, ɓa woyeeɗa an : « Woosuuɗ yakak hayiɗ nga ɓoo. Kooh hayiɗ hirpe ɓooɓiŋ ɗe. »
17 Ŋ ineem, ɓa laamtoheeɗa woo keem ŋ ini kaɗ ŋ Yeesu ŋ kur caŋ Yudee jen na ca wilee wa.
Yahya woosiɗ ɓi ɓo' ŋ Yeesu
18 Wa taalubeeciŋ Yahya Ɓoktohi naandsuk ɗe in ci Yeesu na tume jen, Yahya ɓeeɗukka kanak nga ɓa,
19 a woossa ɓa ŋ Yeesu Heɗ ɓoo, ne ɓa meekis ɗe andi a yi Mucɗohi Gapohse joy hay wala ɓa joy sek ɓo' wiiriis.
20 Ɓa kaɗta ŋ Yeesu ɓa woosa ɗe ne : « Yahya Ɓoktohi a yi woos ɓoo, a woo ne ɓoo meeksaat ɗa andi a fu Mucɗohi Gapohse joy hay wala ɓoo joy sek ɓo' wiiriis. »
21 Weem, raak, Yeesu wirɗeeɗa ɓo' laayiɗ, kosaayiɗ na jiriɗ na fuuliɗ ; a aañeeɗa jiini ŋ ɓi ɓo'.
22 Yeesu loffa ɓa ne : « Kaɗaat ɗu woya Yahya ini ɗu hot te ɗu kerahhaa : Fuuliɗ ci ɓii hot, lafañ ci ɓii tiind moɗoɗ, ɓi raak kosaay ki na oɓse faan ɓii wir, ɗikiɗ ci ɓii kerah, kaaniɗ ci ɓii hulit te ñakiɗ ci ɓii woyu Yegɗohiŋ Muci.
23 A sumaat, ɓoyi moosanɗi kurkoh ŋ kosi a kos sagu tumohaaɗ ciŋ ngo. »
Yeesu woyiɗ na ɓooɓa, ŋ ini kaɗ ŋ Yahya
24 Wa taalubeeca Yahya woosee coot, Yeesu woyeeɗa na mboolnda ŋ ini kaɗ ŋ Yahya ; a woosa ɓa ne : « Ɗu kee ye marka ŋ nduufa ? Caaɓsi yino-kongi puuɗsi na giyaange e ?
25 Ŋ liiɓɗaa ! Kon ɗu kee ɓa marka ? Ɓo' ɓekkiɗ kulɓa moɗiɗ e ? Ŋ hot ɓooɓi na ɓekke kulɓa moɗiɗ te ɓa ñame neɓiɗ, na nike ŋ kahan ciŋ buur ci.
26 Moo ɗu kee ɓa marka ? Woosuuɗ e ? Ee, ñam na woyee ɗu wa, a yi uup sah woosuuɗ.
27 Yahya Ɓoktohi a yi Kooh woyee ŋ Fiis ci Hooliɗ ci an :
“ Ŋ hey woose ɓo', a adug ɗa,
ne a haɓɗiɗ ɗa waasi. ” »
28 Yeesu degiɗta ɓa nga ne : « Ñam na woyee ɗu wa, ŋ ɓooɓi rimuk jen ali ɓo' uupɗi Yahya Ɓoktohi nga. Waaye ɓoyi uup ƴissuut ŋ Nguuriŋ-Kooh a yi uup ɗe yak.
29 Ɓooɓi kerah Yahya Ɓoktohi jen, po juuti'oh ci sah, ɓa ambiɗ ne Kooh yurhiɗ, ɓa teyɗukka ɓoktiŋ Yahya.
30 Waaye Farisen ci na jangɗohoh ciŋ waasiŋMusaa teyɗukɗi ini Kooh waaɗɗiɗ ɓooɓi, ɓa teyɗukɗi ɓoktiŋ ɗe.
31 Moo, ŋ min mandtiɗkoh ɓooɓi woti na ye ?
32 Ɓa mand na komaakci ɓoof ŋ ɗiski na toonohse ŋ kur ki, ɓa woytiɗohee ne :
“ Ɓoo tipɗiɗ ɗu,
ɗu mbecɗi ;
ɓoo ƴeekɗiɗ ɗu ƴeek ruy,
ɗu fuɗɗi. ”
33 Laam Yahya Ɓoktohi hayiɗ, a ñameeɗi ina ɓooɓa na ñame, a aneeɗi biiñ ; ɗu na woye ne a raak jiini.
34 Kuɓkiŋ ɓoyi hayiɗ, a na ñamee ñam, a ane ; ɗu na woye ne : “ A ñamoh, a anoh biiñ, te a nawle juuti'oh ci na bakaaɗoh ci. ”
35 Waaye liiɓohaaɗi moɗiɗi puloh ŋ Kooh na teeɓohe yurhiŋ wa, taamboh ŋ ɓooɓi Kooh ona jen. »
Yeesu ŋ kahan Simong Farisena
36 Wa raakka mbeh, ƴaar ɓaah ŋ Farisen ca ɓeeɗukka Yeesu ne a ñama ŋ kahan ce, Yeesu kaɗta, ɓooffa, a raɗissa kot caŋ ɗe, a ñameeɗa na ɓa.
37 Ɓitiɓ mbalayoh gen kur ka kerahha ne Yeesu a yaa ŋ kahan Farisena, a kaɗta na buteelalbaatar riifiɗ na laackoloñ eeñiɗ.
38 A nikka ŋ kot ciŋ Yeesu, a fuɗeeɗa ; a cammba ca iiri'iɗ na muhun, a mooseeɗa ca na findiŋ ɗe, a fooneeɗa ca, a laackoloñeeɗa ca.
39 Wa Farisena hot ineem, a woosa ŋ ɗooƴ ce ne : « Ƴaari nikee woosuuɗ ɗah, a heen inhe ne ɓoyi na laalee ɗe bakaaɗoh. »
40 Ŋ ineem Yeesu woosa ne : « Simong, raakiɗ ini ŋ waaɗ ɗa woo. » A loffa ne « Ee, Jangɗohohi, woya. »
41 Yeesu woosa ɗe ne : « A nikee ƴaar, ɓo' kanak joyya ɗe wirind kombot ; yinoori joyee ɗe eɗ dinaar teemet-yatuus (500), yi tas joyya ɗe eɗ dinaar ndaŋkiyaah-yatuus (50).
42 Ɓa kanak jen, ɓa minɗi ɗe ca wirind, a ɗaassa ɓa ca. Woo so yi uupan ɗe waaɗ nga ɓa. »
43 A loffa ɗe ne : « Ŋ liiɓiɗ ne a yi ɗaasu kombot ki uup laay. » Yeesu woosa ɗe : « Ee, fu woo keeh. »
44 Ƴutta, a heelukka ɓitɓa, a woosa Simong ne : « Fu hotiɗ ɓitɓii e ? Ŋ aasiɗ kahan fu, te fu onɗi so masuɓ ne ŋ naawis kot ciŋ ngo, waaye a iiri'ɗiɗ ca na muhun ciŋ ɗe, a moossa ca na findiŋ ɗe.
45 Fu foonɗi so, waaye ina ŋ reyoh po wi a yi fooneeɗa ŋ kot ciŋ ngo.
46 Fu diwɗi hafiŋ ngo waaye a laackoloñiɗ kot ciŋ ngo.
47 Mi na woyee ɗa ne a ɗaasu bakaaɗ ciŋ ɗe laayiɗ ci, weɗi tah a teeɓohha waaɗoh hend an. Waaye ɓoyi ɗaasu ƴissuut na waaɗee waaɗ ƴissuut. »
48 Ƴutta Yeesu woosa ɓitɓa ne : « Fu ɗaasuuɗ bakaaɗ ciŋ ɗa. »
49 Ɓooɓa ɓinooɓa a ñamee na ɓa woyeeɗa ŋ ɗooƴ ɓa ne : « Moo, ƴaari a yi ɓa po a ɗaasohee bakaaɗ ci ? »
50 Waaye Yeesu woosa ɓitɓa ne : « Kosi fu kos tosiɗ ɗa, kaɗa ŋ jam. »