11
Findi taalubeeciŋ Yeesu joy kiimoh
1 Wa raakka mbeh, Yeesu kiimeeɗa ŋ ɗisik, wa a ƴut, yino ŋ taalubeeciŋ ɗe woosa ɗe ne : « Kilifaani, Yahya Ɓoktohi jangɗiɗ taalubeeciŋ ɗe findi ɓa joy kiimoh ; nama teeɓ ɓoo findi ɓoo na hee kiimohe. »
2 Yeesu woosa ɓa ne : « Ɗu kiimee Kooh ɗah, woyaat ne :
“ Baab,
tiikiŋ ɗa teyɗuksaat ne wa tiik hooliɗ.
Nguuriŋ ɗa hayaat.
3 Mbeh nu nik ɗah, ona ɓoo kañam ki ɓoo etoh.
4 Ɗaasa ɓoo bakaaɗ ciŋ ɓoo,
laam ɓoo na name nam ɗaas ɓooɓi na ɗale ɓoo,
te kina tum po ɓoo jaɗɗu fiir. ” »
5 Wa a jangiɗ ɓa ineem, a woyissa ɓa ne : « Wa mand na ɓo' nga ɗu raak nawle, a kaɗ nga ɗe ŋ ndengelnde wek, a woo ɗe ne : “ Naw, ɓand ndo mbuuru kaahay ndeem,
6 ŋ raak hanhe ŋ kahan ndo, te ŋ raakɗi kañam ki ŋ eɗan ɗe. ”
7 Ŋ ineem ƴaara miniɗ ɗe lof ŋ ɗooƴ kahna ne : “ Faɗ to, ŋ rangkiɗ po ƴutiɗ, te mi na kuɓuuciŋ ngo ɓoo faankiɗ, ŋ minɗi kuruk ne ŋ eɗ ɗa. ”
8 Ñam woo ɗu wa, ƴaara hey kurke ne a eɗ ɗe ini a etoh jen. Ali a eɗɗi ɗe sagu niki a nik nawleece, a hey ɗe eɗe sagu kiima a kiimee te a supukɗi nga.
9 Ineem weɗ tah mi woo ɗu ne, kiimaat kiim ɗu hey onse, waakaat waak ɗu hey hote, laɓɗaat laɓiɗ ɗu hey rangsiɗasse.
10 Laam ɓo' nu kiim ɗah, a hey onse, ɓo' nu waak ɗah, a hey hote, te ɓo' nu laɓiɗ ɗah, a hey rangsiɗasse.
11 A yinde baab nga ɗu, a yi kuɓkiŋ ɗe kiiman ɗe cuurund, a on ɗe iiñ ?
12 Mbaa a kiim ɗe wak, a on ɗe ndangal ?
13 Nik ne ɗu ɓi baahaaɗiici, e ɗu min on kuɓuuciŋ ɗu in baahiɗ ɗah, ŋ woyisɗi ɗa Baab Kooh yiŋ Eel ci. A onanɗi ɓi na kiimee ɗe Fuuɗsi Hoolohngaani e ? »
Yeesu na wirɗohe hatiliŋ ya ɓa ?
14 Wa raakka mbeh, Yeesu wiriɗta muum, ya jiini ambe. Jiinnda saɓsohu saɓsohu na ɗe, ƴaara jombeeɗa moɗoɗ, mboolnda nikee nga feyuusa.
15 Waaye raakka ɓa woyee ŋ ɓooɓa ne : « A Belsebul, kilifaaniŋ jiiniici na onee ɗe hatili a na aañohee ca. »
16 Raakka ɓi markiskee ɗe, ɓa woyeeɗa ne, a teeɓaat ɓa firndeeni puloh ŋ Eel ci.
17 Waaye Yeesu inahha liiɓ ciŋ ɓa, a woosa ɓa ne : « Ɓooɓi ɓaah nguur hiñohee ŋ harmban ɓa ɗah, nguureem hey keene, kahan cum keen ŋ ɗafuk cinooci.
18 Ɗu na woye ne mi na aañe jiiniici na hatiliŋ Belsebul ; nik ne a Seytaani paysukoh ŋ haf ce ɗah, kon nguuriŋ ɗe min na tufkoh ?
19 Nik ne mi na aañohe jiiniici hatiliŋ Belsebul ɗah, moo ɓooɓiŋ ɗu na namee ca aañ, ɓa na aañohee ca winde hatil ? Ineem weɗ tah ɓeɗ atte'an ɗu.
20 Waaye nik ne mi na aañohe jiiniici hatiliŋ Kooh ɗah, kon Nguuriŋ-Kooh reyiɗ nga ɗu.
21 Ɓo' raakiɗ hatil, ganaayuk, niiɗee kahan ce ɗah, raak-raakiŋ ɗe hey nike ŋ ɗisik wooriɗ.
22 Waaye ɓoyi uupiɗ ɗe hatil raak ɗe nga laɓ ɗe ɗah, a hey naafee ganaay ci a oolkohe, a ɓay in ci a raakee jen, a paysoh ca.
23 Ɓo' nu langɗi na so ɗah, a sangiɗ to ; te ɓo' nu nangɗohohɗi so ɗah, a na pasarohe.
24 Jiini, na hoolaaɗiikiŋ ɗe, a faɗta ɓo' ɗah, a na kaɗe ŋ ɓi ɗisik suyiɗ, a waakee ɗiski a iɗsiɗkohan. A hotɗi ɗah, a woo ŋ haf ce ne : “ Mi na hee dokke kahnaŋ ngo ŋ puloh. ”
25 A wiiruk ɗah, a raak kahna paɗuuɗ, haɓɗuuɗ moɗoɗ.
26 Jaar a kaɗ waaka jiini yasna-kanak ci uup ɗe añaand ; ca kaɗ kahna, ca gen. Ŋ ineem, mirndohaaɗiŋ ɓoyeem weɗ na uupe misik fuuf findi a kocee mand. »
27 Wa Yeesu na woyee in ceem, ɓitiɓ ŋ ɗooƴ mboolnda woosa ŋ ɗafka ne : « Yaayi ɓasil ɗa, a ɓapiɗta ɗa, joyiɗ neɓu. »
28 Yeesu loffa ɗe ne : « Woya kay ne, ɓooɓi na sikɗuke woo kiŋ Kooh, te ɓa pesohee wa, ɓeɗ neɓu. »
Findi Yunus na Suleymaan teyɗukohse
29 Ɓooɓa hayeeɗa, mboolnda ɓaatkeeɗa ; Yeesu woosa ne : « Ɓooɓi woti, ɓeɗ baahaaɗi, ɓa na meeksohe firnde, waaye ɓa eɗsanɗi ali firnde, ɗal wiŋ Yunus.
30 Findi Yunus ŋ haf ce nikohee firnde nga ɓi Niniw,Kuɓkiŋ ɓoyi naman nikoh firnde ɗaa ngaŋ ɓooɓi woti.
31 Buura ɓitɓaŋ Saba pulohee kur usiɗ ne a sikɗuk liiɓohaaɗa moɗɗaŋ Suleymaan. Te moona raakiɗ ini uup Suleymaan ŋ ndii, weɗ tah mbehi Kooh na hee atte'ohe ɓooɓi, buuri ɓitɓeem hey kurke, a teeɓ ɓooɓi woti ne ɓa raakɗi keeh.
32 Ŋ mbehaŋ atteena, ɓi Niniw hey kurke, ɓa teeɓ ɓooɓi woti ne ɓa raakɗi keeh, laam wa ɓi Niniw kerah woo kaŋ Yunus, ɓa ɓoƴsoheen pesohaaɗ keeh-keeh ; te moona ini nik ndii, weɗ uup Yunus.
Laampaaniŋ faan
33 Ali ɓo' na fuuɗeeɗi laampa po ƴut, a ɗembiɗa ɗisik wiiriis, wala a kuna na kanoh ; a degana kay ŋ degohaaniŋ wa ne ɓo' nu aas ɗah, wa ñiinɗiɗ ɗe.
34 Has weɗ laampaaniŋ faan. Hasiŋ ɗa wir ɗah, faaniŋ ɗa jen na nikee ŋ siñaar, waaye hasiŋ ɗa wirɗi ɗah, faaniŋ ɗa jen na nikee ŋ ñuus.
35 Mbaa ndengɗuka po ñiini nik nga ɗa, nikuu ñuus.
36 Nik ne faaniŋ ɗa jen ñiiniɗ, te ali ɓak ñuusɗi nga ɗah, wa hey nikee leer po maa wa laampa ñiiniɗ ɗa. »
Yeesu woytohiɗ Farisen ca na jangɗohoh ca
37 Wa Yeesu na woye, ƴaar ŋ Farisen ca ɓeeɗukka ɗe ne a ñama ŋ kahan ce, Yeesu teyɗukka. Wa ɓa ñame,
38 Farisena hotta ne Yeesu ɓohñukɗi findi ɓa na ɓohñukohe, a feyuusa nga.
39 Heɗ ɓoo Yeesu woosa ɗe ne : « Ɗu ɓi Farisen ci, ɗu mand na ɓooɓi ɓohoñ finhooriŋ kaasi na booli ɓa faɗta ɗooƴi ; ŋ ɗooƴ keeñ ciŋ ɗu, ɗu riifiɗ na liiɓohaaɗ rok na añaand.
40 Naandiɗ ci ! Kooh yi haɓiɗ finhoori, a yi nam haɓiɗ ɗooƴi haa e ?
41 Sarhohaat in ci nik ŋ ɗooƴi, ɗu hool jameet.
42 Mas ɗu ɓi Farisen ci, ɗu ɓii eɗoh sah in ci ƴin ƴin ci ɗu na guure findi naana, pooɓar, na in ci mand ɗaa ndaŋkiyaah nu nik yinoori ; waaye ɗu faɗiɗ ini uupiɗ etoh, weɗ yurah na waaɗ Kooh ; ineem weɗ ɗu joyee tum, te ɗu sang sagankoh ci tas.
43 Mas ɗu ɓi Farisen ci, ɗu waaɗ ne ɗu ɓoofan ŋ fiki ɓooɓi ngaŋ sinaagog ci te ɗu kañɗassee yaah kanak ŋ ɗisik ci na toonohse ŋ kur.
44 Mas ɗu ɓi Farisen ci, ɗu mand na ruy-ruy ci muuƴ, ɓooɓi inhuu dakee nga ca, wa ɓekee ɓa hoolaaɗi. »
45 Wa a kerah ineem, ƴaar ɓaah ŋ jangɗohoh caŋ waasiŋMusaa woosa ɗe ne : « Jangɗohohi, fu woyoh ɗaa ɗah, fu na namee ɓas ɓoo. »
46 Yeesu loffa ne : « Na ɗu, ɗu ɓi jangɗohoh ciŋ waasi, ŋ masɗiɗ ɗu, laam ɗu na raane ɓooɓi in ɓitiɗ te ɗu waaɗɗi ca sah laal na lecem ndukun.
47 Ŋ masɗiɗ ɗu, e ɗu na taɓahe ruy-ruy ciŋ woosuuɗ ci te a caac ciŋ ɗu ap ɓa.
48 Ŋ ineem, ɗu na teeɓohe ne ɗu huniɗ ŋ in ci caac ciŋ ɗu tum. Ee di' ! Ɓeɗ ap woosuuɗ ci, ɗu taɓahee ruy-ruy ciŋ ɓa.
49 Ineem weɗ tah, Kooh, ŋ moɗkiŋ ɗe liiɓohaaɗ, a woosa ne : “ Ŋ hey woosohe woosuuɗ na Apootar ; ɓum apu, ɓinooɓi tumu miskiɗ. ”
50 Te ɓooɓi woti ɓeɗ na hee wirndiɗkasse ñif miŋ woosuuɗ ci aamu ŋ ina amboh ŋ cambohaaɗa poyi.
51 Ŋ Abel po ŋ Sakariya, yi ɓa apoh Kahan Kooh, ŋ harmban seeƴkohaana na taɓaha. Ñam na woyee ɗu wa, in ceem jen Kooh na hee ca wirnduke ngaŋ ɓooɓi woti.
52 Mas ɗu ɓi jangɗohoh ciŋ waasi, ɗu ambiɗ caaɓndi joy rangis findi in ciŋ Kooh inhohsan ; ɗu ŋ haf ɗu, ɗu aasɗi te ɗu sangohiɗ ɓooɓi waaɗ aas. »
53 Wa Yeesu pul kahna, jangɗohoh caŋ waasi na Farisen ca ayrukka ɗe, ɓa cammba ɗe meekis meeksoh laayiɗ
54 ne ɓa raak yambaah ɗe.