13
Saɓsukohaŋ Ibrahiima na Loot
1 Wa Ibram na pulɗasse Misra na ɓitiice, na raak-raakaŋ ɗe jen, a gurdeeɗa Negef, Loot nikangee na ɗe.
2 Ibram raakeen lool, a amboheen ɓi gat yakoh na yakoh, na haalis na urus laayoh na laayoh.
3 A pulohha Negef, a yongsukeeɗa ƴin-ƴin po Betel ŋ ɗiska a kocee ndut ŋ harmban Betel na Ay.
4 A ɓeeɗkohha Kooh ŋ tiikiŋ Nikiɗi ŋ seeƴkohaana a ɗeɓee haɓiɗ ŋ ndaam.
5 Loot, yi hunee na ɗe, nameen raak ɓi gat pe', mbaal na inoh, na ɗiip ca ɓooɓaŋ ɗe nikohe.
6 Ɓa haɓisseeɗi ŋ kur ka, laam raak-raakaŋ ɓa laayeen po ɓa minisseeɗi gen ŋ ɗisik yino ;
7 te yit, Peris ca na Kanaan ca namee gen nga. Ayrukoh raakka ŋ harmban niiɗoh caŋ Ibram na ɓaŋ Loot.
8 Weɗi Ibram woyoh Loot ne : « Ngalla, ayrukoh kanaat raak ŋ harmban mi na ɗa, na harmban niiɗoh ciŋ ɓoo, laam e ɓoo ɓaah.
9 Kon mbaa ɗah, ɓoo saɓsukohaat, marka inii jen ŋ kur ki, fu kooɗ ŋ yaah-sing ɗah, ŋ kooɗ ŋ yaah-ñaahum ; fu kooɗ ŋ yaah-ñaahum ɗah, ŋ kooɗ ŋ yaah-sing. »
10 Wa Loot marak kehƴa wil kalaŋ Yurdan, a hotta ne wa iiri po Sowar, weem raak Nikiɗi ɗumbɗi Sodom na Gomor ndoom, wa mandee na nguukaŋ Eden, findi kehƴiŋ Misra.
11 Loot waɗukka kehƴaŋ Yurdan, a yongsukka ŋ pulohaaɗ-noh ; ɓa saɓsukohoh ɗaa.
12 Ibram gennda ŋ Kanaan, Loot kaɗta ndutta ŋ sero kur caŋ Yurdan, a yippa ɗiip caŋ ɗe ŋ ɓak Sodom.
13 Ɓi Sodom nikee aƴaarkiɗ, bakaaɗoh yakak ŋ fiki Nikiɗi.
Kooh teeɓiɗ Ibrahiima kur ka a gapee ɗe
14 Wa Ibram paysukoh na Loot, Nikiɗi woosa ɗe ne : « Marka baahiɗ ŋ fikiifu, na finhoofu na yaah-sing, na yaah-ñaahum,
15 laam kur ki fu na hote wii jen, ŋ hey ɗa wa one po faw, fu na ɓi na hee rimkohe nga ɗa.
16 Ŋ hey ɓaate ɓi na hee rimkohe nga ɗa po ɓa mand na merhey miŋ kehƴi, ɓo' minanɗi ɓa kind, findi ɓo' minohɗi kind merhey miŋ kehƴi.
17 Kurka, fu taambiɗ kur ki jen ŋ hutiiniŋ wa na angiiniŋ wa, laam maa hee ɗa wa one. »
18 Ƴutta, Ibram ɗoffa ndutaŋ ɗe, a kaɗta, a yippa ŋ kidig ca yakak caŋ Mamre ŋ ɓak Hebron, ŋ ndaam a haɓiɗta seeƴkoha wuu Nikiɗi.