12
Kooh tuuƴiɗ Ibrahiima Kanaan
1 Ɓi kahan Tera, ɓeɗ gen ŋ Haaraan po wa raakka mbeh, Nikiɗi woosa Ibram ne : « Faɗa kur ki fu genoh, fu faɗ ɓaah ciŋ ɗa, fu nam faɗ ɓi kahan baabiŋ ɗa ; fu yurah ŋ kur ka maa hee ɗa teeɓe.
2 Ŋ hey ɗa barke'ɗe, ŋ pulɗoh cuuɓ angiɗ nga ɗa, ŋ yakiɗ tiikiŋ ɗa te fu nik camboha barke.
3 Ɓooɓi waaɗɗan ɗa moɗiɗ, ŋ barke'iɗ ɓa, te ɓo' nu waaɗiɗ ɗa moɗaaɗi ɗah, ŋ aluk ɗe. Cuuɓ ciŋ kehƴi jen raakohan barke saguufu. »
4 Ŋ finho inaam, Ibram kaɗta findi Nikiɗi woyoh ɗe wa. Loot, kuɓkaŋ taambɗoh ce, hunee na ɗe. Wa Ibram na kurke ŋ Haaraan waam tel ɗe raakiɗ kiis ndaŋkiyaah-yasna-kanak na kiis yatuus (75).
5 A ɓayndohha ɓitiice Saraay, na Loot, yi kuɓu nga ɗe, na in ca ɓa raakoh ŋ Haaraan jen na ñaam caŋ ɓa. Ɓa pulla, ɓa kaɗeeɗa po ɓa reesa Kanaan.
6 Wa Ibram ree, raak ɓi Kanaan geniɗ ŋ kur ka, a taammbaa ŋ leerna po kidga yakka ŋ Moore ngaŋ Sisem.
7 Ŋ ndaam Nikiɗi teeɓukka ɗe, woosa ɗe ne : « Kur kii jen ŋ hey wa eɗe ɓi rimkohan nga ɗa. » Ibram haɓiɗta seeƴkiɗoha haf ce ŋ Nikiɗi, laam a yi teeɓuk ɗe nga.
8 Wa a ƴuta haɓiɗ, a kurukka, a yurahha tangooca lak Betel pulohaaɗ-noh ; a yippa ɗiipaŋ ɗe ŋ harmban Betel na Ay. Betel lakkaa muyohaaɗ-noh, Ay pulohaaɗ-noh. Ŋ ndaam a haɓiɗta seeƴkoha, a gidimmba Nikiɗi na ñaamuk.
9 Wa a puloh nga, a yongsukeeɗa ƴin ƴin ŋ ɓak Negef.
Saarata ŋ kahan buuraŋ Misra
10 Waam, aɗ raakeen ŋ kur ka, Ibram kaɗta Misra ne a nikohaah nga laam aɗa miskeen.
11 Wa a kaɗ po a heeɗa aase Misra, a woosa ɓitiice Saraay ne : « Sikɗuk ko, ŋ inhiɗ ne fu moɗiɗ lool,
12 ɓi Misra hot ɗa ɗah, ɓa hey woye ne fu ɓitiiso te ɓa hey yo ape fu tas.
13 Ngalla ɓoo ree ɗah, fu na woye ne ɓoo taambɗoh taambɗoh ; ineem hey tahe po ɓa taambkoh ho saguufu, te fu hey tahe po, ŋ pes. »
14 Wa Ibram ree kur ka, ɓi Misra hotta ne ɓitiice moɗiɗ lool.
15 Huntoh caŋ Firawnaana, buuraŋ Misra nammba ɗe hot, ɓa laasukka ɗe ŋ fikiice, a yi Saraay a ɓayuusa kahan Firawnaana.
16 A tahha po Ibram taambkohuusa moɗoɗ, Firawnaana onnda ɗe ɓi gat : pe', mbaal, inoh, mbaam, naar na riɓ na ngeelemb, na ɓi ñaam, ƴaar na ɓitiɓ.
17 Waaye Nikiɗi ruhsiɗta naamo miskiɗ ŋ Firawnaana na ɓi kahan ce sagu Saraay ɓiti Ibram.
18 Weɗi Firawnaana ɓeeɗkoh Ibram woosa ɗe ne : « Ini fu haɓiɗ to wii nak ! Wa ye tah po fu wooɗi so ne a ɓitiifu ?
19 Wa ye tah fu woosa ne ɗu taambɗoh ? Wa tahha po ŋ ɓayya ɗe ɓitiɓ. Ɗiski wa nik ndii, ɓitiifu a yi, ɓayaa ɗe te fu coot. »
20 Firawnaana nakka huntoh caŋ ɗe ne ɓa pulɗaat Ibram na ɓitiice, na ina a raak jen ŋ kur ka.