4
Ɓoo nikisɗi ñaam, ɓoo kuɓu
1 Te inii weɗ ŋ woo : Lamohi, feeh a komaaki ƴin ɗah, a na ñaami, ɓa ɗalohɗi ali in, ali nik ne sah, a yi raak lamaahi jen.
2 A na nike ŋ yaah ɓooɓi na taambkohee ɗe na raak-raak kiŋ ɗe po ŋ jamanooni baabi woyoha.
3 Wa mand ɗaa nga ɓoo. Wa ɓoo nik ƴin, ɓoo nikee ñaam ciŋ in ci na tiindɗe Adina.
4 Waaye wi jamanooniŋ wa ree, Kooh woossa Kuɓkiŋ ɗe, yi rimkoh ŋ ɓitiɓ, te wi a rimuk, a waasiŋMusaa yilfee ɗe,
5 ne a on ɓi waasi yilif, ɓa raak haf ɓa. Jaar ɓoo nik kuɓuuciŋ Kooh.
6 Ini teeɓoh ne ɗu kuɓu Kooh weɗ woosi a woos Fuuɗsiŋ Kuɓkiŋ ɗe ŋ keeñ ciŋ ɓoo, yi na tahe ɓoo woo an : « Abba ! Baab ! »
7 Ŋ ineem, fu nikisɗi ñaam, fu kuɓu ; te nik ne fu kuɓu ɗah, fu hey rahse in ci Kooh gap kuɓuuciŋ ɗe.
Pool jaahɗiɗ ŋ mandohaaɗiŋ ɓi Galaat
8 Ɗeɓgaan, ɗu inheeɗi Kooh, ɗu nikee ñaam ciŋ kooh ci nikaaɗiici.
9 Waaye ɗiski wa nik ɗu inhiɗ Kooh - te ini uup raak njiriñ sah, weɗ ne Kooh inhohiɗ na ɗu - ɗu min na wiirkoh ŋ in ci na tiindɗe Adina, ci raakaaɗi hatil na njiriñ ceem, po ɗu waaɗee nikis ñaam ciŋ ca ?
10 Ɗu ɓii yakiɗ ɓi mbeh, na ɓi caɓin na ɓi kiis na ɓi jamano, ɗu liiɓ haa ne ɗu joya joy tum !
11 Ŋ neƴƴohiɗ ne yaaɓi ŋ yaaɓee nga ɗu jen nik ɓarang ɓarang.
12 Ŋ kiim ɗu wa kiim ɓaah ciŋ ngo, mandaat na so, findi ŋ mandee na ɗu wa ŋ nik na ɗu. Ɗu ɗalɗi so waas yino.
13 Ɗu inhiɗa, a kosaay ɓayee so nga ɗu wa ŋ koc ɗu woo Yegɗohiŋ Muci.
14 Moona kosaay keem mineen tah po ɗu heef fo, wala ɗu sepeƴnuk ko, waaye ɗu tumɗaa ; ɗu teyɗuk ko teyɗuk moɗoɗ po haa ŋ malaaka, po haa ñam Kiristaani Yeesu.
15 Waam, ɗu sumeen ! Mi yii seede ne wa mineen nik ɗah, ɗu heen nihse has ciŋ ɗu, ɗu eɗ to ca. Wa ye rahas ɗu ŋ harmbani ?
16 Ini ŋ woo ɗu keeh joyiɗ tah po ŋ nik sangiɗiŋ ɗu e ?
17 Ɓooɓi sawar nga ɗu ɓeem, liiɓohaaɗ ciŋ ɓa baahɗi. Ɓa waaɗ ɗu saɓsoh na ɓoo, ne ɗu sawar nga ɓa.
18 Wa in baahiɗ ne ɗu gen raak ɓooɓi sawaran nga ɗu, ali ŋ nikɗi nga sah, waaye wa nikaat ne a in baahiɗ taha kuruk.
19 Kuɓuuciŋ ngo, ɗu tahiɗ po mi yii raakis miskiɗ findi ɓitɓi na ɓasle, te wa genan gen po mbaɗna mandohaaɗiŋ Kiristaani rimkan nga ɗu.
20 Ŋ mineen ɗah, ŋ hee nikee ŋ ɗooƴ ɗu kotii, ne ŋ uup min woo na ɗu baahiɗ, laam, ŋ inhisɗi findi ŋ tuman na ɗu.
Kuɓu ñaam na kuɓu gor
21 Woyaat to, ɗu ɓi waaɗ ne waasiŋ Musaa yilif ɗu, ɗu kerahɗi ini waasi na woye e ?
22 Wa woo ne Ibrahiima raakee kuɓu kanak, yinni rimkoh ŋ ñaam, yinoori rimkohha ŋ gor.
23 Waaye yi ñaami rim, a rimuk findi ɓo' na rimkohe, te yi gori rim, a rimuk ŋ gapohiŋ Kooh.
24 Ineem raakiɗ ini wa waaɗ woo : Ɓitiɓ ci kanak ceem ɓa nikiɗ findi ambtiɗoh kanak. Yinoori, a yi ambtiɗohi tufkiɗohu tangooraŋ Sinaay, a na rime ñaam, a yi Haajara.
25 Haajara yeem, a yi tangooraŋ Sinaay, wa nik ŋ Arabi - te a yi nam nik Yerusalemi woti-woti, wa ñaam, wa na kuɓuuciŋ wa jen.
26 Waaye Yerusalemaŋ ɗafka raakiɗ haf wa, te weɗ yaayiŋ ɓoo.
27 Wa fiisuuɗ ne :
« Suma, fu yi ɓitɓi jaasir,
fu yi raakɗi kuɓu !
Leehka sagu sum,
fu yi moosɗi yegoh
miskiɗ ciŋ ɓasil !
Kuɓuuciŋ ɓitɓi faɗu
ɓeɗ uupan laay
ɓiŋ ɓitɓi nik na ƴaar ce. »
28 Ini kaɗ nga ɗu, ɓaah ciŋ ngo, ɗu kuɓuuciŋ gapohi findi Isaahha.
29 Waaye ŋ jamanoonaam, kuɓki rimuk findi ɓo' na rimkohe, meeɗeen tolfiɗ yi rimuk ŋ tumohaaɗ ciŋ Fuuɗsi Hoolohngaani, te wa mand ɗaa woti.
30 Waaye Fiis ci woo ye nga ? Ca woo ne : « Aaña ñaami na kuɓkiŋ ɗe, laam, kuɓkiŋ ñaami joyɗi lam na kuɓkiŋ gori. »
31 Mbaa ɓaah ciŋ ngo, ɓoo kuɓu ñaam haa, ɓoo kuɓu gor.