3
Naandi ɓi Galaat naand
1 Cey ɗu ɓi Galaat, e ɗu naand ! Ya ɓa honjom ɗu ? Te ŋ hot ɗu teeɓuuɗ, findi nataal, Yeesu Kiristaa daaƴuuɗ ŋ kurwaa.
2 Inii dong weɗ ŋ waaɗ ne ɗu lof fo nga : Andi taambiɗ nakoh ciŋ waasi weɗ tah ɗu rahas Fuuɗsi Hoolohngaani wala ɗu kerah Yegɗohiŋ Muci, ɗu kossa weɗ tah ?
3 Ɗu naandoha naandoh jen e ? Ɗu camb na Fuuɗsi po ƴut, ɗu kee reehɗoha kotii na tumohaaɗ ciŋ ɗu haf ɗu e ?
4 In ci ɗu jang ŋ taamb-taamb ciŋ ɗu jen, ca ɓarang ɓarang e ? Wa minɗi nik ɓarang ɓarang kay !
5 Yi eɗ ɗu Fuuɗsi te a tumee ŋ ɗooƴ ɗu in feyohiɗ, andi a na tume ineem taamboh ŋ tiindohaaɗ ciŋ waasi wala ŋ kosi ɗu kos Yegɗohiŋ Muci ɗu kerah ?
Kuɓuuciŋ Ibrahiima taamboh ŋ kos, ɓeɗ rahas barkeeni
6 Marka Ibrahiima rek ; fiis ci woo ne : « Ibrahiima kossa Kooh, weɗ tah a ambuusa ne a ɓo' yurhiɗ. »
7 Kon inhaat inii : Ɓi kos Kooh, ɓeɗ ambu findi kuɓu Ibrahiima.
8 Fiis ci woyeen ne Kooh hey one ɓi nikɗi Yawuut kiyurah taamboh ŋ kos, ca nameen woo Ibrahiima ne Yegɗohiŋ Muci hey haye, an : « Cuuɓ ci jen raakohan barke saguufu. »
9 Tahha po ɓi kos na barke'ɗasse na Ibrahiima, yi kos.
10 Yaa nu gaƴuk ŋ tum nakoh ciŋ waasi ɗah, a alku'iɗ, laam wa fiisuuɗ ne : « Yaa nu genɗi tum in ci fiisu ŋ teerndiŋ waasi jen ɗah, a alku'iɗ ! »
11 Wa raakɗi laam-laam, ali ɓo' raakɗi kiyurah ŋ fiki Kooh taamboh ŋ tum nakoh ciŋ waasi, laam Fiis ci woo ne : « Yaa nu yurah ɗah, pesohan kosi a kos. »
12 Waaye ɓoyi gaƴuk ŋ taambiɗ nakoh ciŋ waasi, a gaƴukɗi ŋ kos ; e Fiis ci woo ne : « Yaa nu taambiɗ nakoh ceem ɗah, ceɗ a pesohan. »
13 Waaye Kiristaani pulɗiɗ ɓoo ŋ alki ɓoo joyee alku sagu waasi, a teyɗukka alku wuu ɓoo, laam wa fiisuuɗ ne : « Yaa nu liku ŋ ndooɗ ɗah, a alku alku. »
14 Ŋ ineem, ɓi nikɗi Yawuut raakoh barkeeni Ibrahiima gapse taamboh ŋ Yeesu Kiristaa. Te ɓoo jen, ɓoo taamboh ŋ kos, ɓoo rahassa Fuuɗsi Hoolohngaani Kooh gapoh.
Nakoh ciŋ waasi, ca minɗi nihis gapohi
15 Ɓaah ciŋ ngo, mi na woye findi ɓo' na woyohe : Ɓo' sah, a hee kurkohe nga, a dengkoh finhooce po ƴut ɗah, ali ɓo' minɗaa nihis wala a ɓaat in nga.
16 Kooh raakiɗ ini a gap Ibrahiima na tisohiŋ ɗe. Te sah, ɓo' miniɗ hot ne, wa wooɗi "tisoh ciŋ ɗe", waaye "tisohiŋ ɗe". Kon, wa yino dong, te tisoheem, a Kiristaani.
17 Inii weɗ ŋ waaɗ woo : Kooh tufkiɗiɗ ambtiɗohiŋ ɗe po ƴutiɗ in maañiɗ, wa yakohiɗ waasiŋMusaa kiis teemet-nikiis na kiis ndaŋkiyaah-kaahay (430), kon waasi minɗaa nihis po gapohi kee nika ɓarang ɓarang.
18 Ini ɓoo joy lam pulohee ŋ taambiɗ nakoh ciŋ waasi ɗah, wa heeɗi pulohisse ŋ gapohi ; te moona, e gapohi on Ibrahiima ini Kooh baahoh ɗe.
Waasi etohu ye ?
19 Kon waasi etohu ye ? Wa ɓaatsee ŋ gapohi ne wa teeɓohee ɗal ci po findi seti gapu hayohan ; Kooh deg ineem ŋ yaah ɓoyi nikee ŋ harmban ce na ɓooɓi, taamboh ŋ malaakaaci.
20 Wa Kooh na gape Ibrahiima, a nikee kiik ce. A etoheeɗi ne ɓo' nik ŋ harmban ce na in wiiriis.
21 Kon andi waasi hunɗi na gapoh ciŋ Kooh ? Aha'kay ! Nikee ne ɓo' rahsiɗ nakoh miniɗ on ɓo' kipes ɗah, kon ee, taambiɗ waas heen mine on ɓo' kiyurah ŋ fiki Kooh.
22 Waaye wa na kaɗoheeɗi ɗaa, laam Fiis ci teeɓohiɗ ne bakaaɗ degiɗ ɓooɓi jen yaah, wa rannga ɓa. Ineem raakiɗ ne ɓi kos min rahas ini gapohse taamboh ŋ kosi ɓa kos Yeesu Kiristaa.
23 Bala kosi hayan, ɓoo nikee ambuuɗ, waasi taƴca ɓoo ne ɓoo sek mbehi kosi teeɓohsan.
24 Waasi weɗ nikee niiɗohiŋ ɓoo, wa ɓendeeɗa ɓoo ŋ Kiristaa, ne ɓoo taamboh ŋ kosi, ɓoo onu kiyurah.
25 Wi kosi hay, niiɗoh yilfisɗi ɓoo.
26 Ɗu jen, kosi tahiɗ po ɗu kuɓu Kooh ŋ niki ɗu nik ŋ Kiristaani Yeesu.
27 Ɗu ɓi ɓoktu ŋ Kiristaani jen, ɗu ɓekkiɗ mandohaaɗiŋ ɗe findi kulɓa.
28 Wa Yawuut haa, wa nikaaɗi Yawuut haa, wa ñaam haa, wa raakiɗ haf ce haa, wa ƴaar haa, wa ɓitiɓ haa, ɗu jen ɗu yino ŋ niki ɗu nik ŋ Kiristaani Yeesu.
29 Nik ne ɗu ɓaah ŋ Kiristaani ɗah, ɗu ɓaah ŋ ɓi rimkoh ŋ Ibrahiima, te ɗu hey lame findi wa gapohu.