7
1 Mbaa ɓaah ciŋ ngo ŋ keeñkoh, nik ne ɓoo gapuuɗ in ceem jen ɗah, kon ɓoo farsukaat usuɓ ci jen, ci nik ŋ faan ci na liiɓ ci, te ɓoo mitiɗ hool kiŋ ɓoo ŋ nupi ɓoo nup Kooh.
Sum kiŋ Pool ŋ hayiŋ Tit
2 Ɓekaat ɓoo ŋ keeñ ciŋ ɗu ! Ɓoo tumɗi ali ɓo' in baahaaɗi, ɓoo yahrohɗi ali ɓo', te ɓoo njirñiɗkohɗi ali ɓo'.
3 Ŋ wooɗi ineem ne ŋ attee ɗu tooñ, laam ŋ woyiɗ po ƴutiɗ ne : Ali ɓoo pesee wala ɓoo kaan, ɗu ɓii ŋ keeñ ciŋ ɓoo.
4 Ɗu oniɗ to ne ŋ woo ɗu ini nik nga so keeh-keeh, te ŋ neɓuuɗ nga ɗu lool. Na miskiɗ ci ɓoo na pese jen, keeñiŋ ngo soosɗuuɗ, ŋ riifiɗ na sum.
5 Laam ina ɓoo reyoh Maseduwaan poyi, ɓoo raakɗi jot iɗsiɗkoha ; ɓoo cohiɗ na miskiɗ nu nik, leber ŋ hari na neƴƴoh ŋ ɗooƴ fu.
6 Waaye Kooh yi na dalɗe hel ciŋ ɓi goy, dalɗiɗ hel ciŋ ɓoo ŋ hayiŋ ɓaah ɓoo Tit.
7 Te wa hayiŋ ɗe dong haa, waaye na dalɗi ɗu daliɗ heliŋ ɗe : A naandsukiɗ ɓoo waaɗi ɗu waaɗ to hotis, na fuɗ ciŋ ɗu, na sawri ɗu sawar ŋ amboh ho. Ineem weɗ tah ho ɓaat sum.
8 Ŋ inhiɗ ne ɗu raakeen ini misik ɗu ŋ fiisi ŋ kaɓɗohee ɗu, waaye inwaaso ambɗi so nga. Wa keeh ne inwaaso ambeen ndo nga wa ŋ hot ne ɗu raakiɗ neɓaaɗi wa ɗu rahasa, ali nik ne wa maañɗi.
9 Waaye ɗiski wa nik ndii ŋ sumiɗ, ŋ sumɗi ŋ neɓaaɗiini ɗu raakee nga, ŋ sum ŋ ini neɓaaɗiineem ɓek ɗu ŋ ɓoƴsoh pesohaaɗ ; laam neɓaaɗiineem in baahiɗ ŋ fiki Kooh, kon ɓoo degɗi ɗu ali in baahaaɗi.
10 Neɓaaɗiini fu raak ŋ waaɗi fu waaɗ Kooh na ɓekee ɗa ŋ ɓoƴsoh pesohaaɗ, wi na ɓayee ɗa ŋ muc te inwaaso ambuu ɓo' nga. Waaye neɓaaɗiini fu raak ŋ waaɗi fu waaɗ Adina na ɓekee ɗa ŋ kaan.
11 Te neɓaaɗiini fu raak sagu waaɗ Kooh weem, wa in baahiɗ ŋ fiki Kooh. Markaat ini wa ɓek nga ɗu : Findi ɗu njahlafoh kotii na findi ɗu na taaskohɗe haf ɗu, findi ɗu raakoh neɓsaaɗi ; markaat findi ɗu nupoh tum in moɗaaɗi, findi ɗu waaɗoh ho hot, findi ɗu sawaroh ŋ in ciŋ Kooh, na findi ɗu na kuƴsohe ini baahɗi ! Ɗu teeɓohiɗ ŋ in ci jen ne ɗu hooliɗ ngaŋ ineem.
12 Wi ŋ fiisee ɗu kayteem, a ɓoyi tooñ tah ho fiisa haa, te a ɓoyi tooñu tah haa, waaye ŋ fiisiɗa ne sawri ɗu sawar nga ɓoo, ɗu mina hot ŋ fiki Kooh.
13 Ineem weɗ tah po hel ciŋ ɓoo daliɗ, te wa ineem dong haa sah, keeñ ciŋ ɓoo namiɗ soos keeh-keeh ŋ sumi Tit sum ŋ findi ɗu jen dalɗoh heliŋ ɗe.
14 Nik ne ŋ ndamkohiɗ ɗu ŋ fikiice ɗah, ŋ raakɗi kaci nga ; laam wa hooliɗ kotii ne ndamkohi ɓoo ndamkohee ɗu ŋ fiki Tit nikee keeh, findi in ci ɓoo woyee na ɗu jen nikoh keeh.
15 A naandsukka kerhiɗi ɗu kerhiɗ ɗe ɗah, waaɗi a waaɗ ɗu na ɓaatke ɓaatuk, laam ɗu taambɗukiɗ ɗe na eɗef na cir.
16 Ŋ sumiɗ ŋ oolki ŋ min ɗu ooluk ŋ in ci jen.