6
1 Ini ɓoo na pangke na Kooh tahiɗ po ɓoo na ñaahee ɗu ne rahsi ɗu rahas baahohiŋ Kooh nikuu ɓarang ɓarang.
2 Laam a woyiɗ ŋ Fiis ci ne :
« Ŋ jamanooniŋ wa,
ŋ teyiɗ kiimiŋ ɗa,
ŋ mbehiŋ muci
ŋ hirpiɗ ɗa. »
Jamanooni weɗɗi ! Mbehiŋ muci weɗɗi de' !
Pangkoh ciŋ Kooh
3 Ɓoo waaɗɗi ne ɓo' raak woyaah moɗaaɗi ŋ ini kaɗ ŋ pangkiŋ ɓoo, ineem weɗ tah ɓoo waaɗɗi kafind ali ɓo' ŋ in nu wa min nik ɗah.
4 Waaye ŋ in nu nik, ɓoo na teeɓohe ne ɓoo mokɗiɗ pangkiŋ surgaaciŋ Kooh :
Ɓoo ɓii muñ ngaŋ miskiɗ ci
na tolfiɗ ci keeh-keeh,
5 na laɓ ci ɓoo na laɓse,
na taƴ ciŋ kasooci,
na ɗuuɗ ciŋ ɓooɓi,
na panguk ci miskiɗ ci,
na aɗki, na neehaaɗiiki.
6 Ɓoo na teeɓohee ɓooɓi ɓoo nikoh
na hool kiŋ ɓoo,
na inhiŋ ɓoo,
na mini ɓoo min muñ seke,
na baah kiŋ ɓoo,
na niki Fuuɗsiŋ Kooh nik nga ɓoo,
na waaɗohi kiyooh ki.
7 Ɓoo ɓii teeɓoha
na woo kiŋ keeh ki,
na hatiliŋ Kooh,
na kiyurah,
wi ɓoo tum ganaay,
ganaay songoha na naafkoha.
8 Ɓoo yakɗu, ɓoo ƴissuutɗu,
ɓoo ɓii teeɓoha.
Ɓoo woyu in moɗaaɗi, ɓoo woyu moɗiɗ,
ɓoo ɓii teeɓoha.
Ɓoo ɓii teeɓoha ŋ in nu nik :
Ɓoo ambu findi leyoh,
te ɓoo na woye keeh.
9 Ɓoo ambu findi inhassaaɗi,
te ɓoo inhuuɗ baahiɗ.
Ɓoo ambu findi ɓi na kaane,
te ɓoo ɓii pes.
Ɓoo ɓii torhiɗu,
te ɓoo apuuɗi.
10 Ɓoo ambu findi ɓi neɓuuɗi,
te ɓoo gen sumiɗ.
Ɓoo ambu findi ñakiɗ,
te ɓoo ɓii tah ɓo' laayiɗ raak.
Ɓoo ambu findi raakaaɗi ali in,
te in ci jen cuu ɓoo.
11 Ɗu ɓi ɓaah ciŋ ɓoo gen Korenta, ɓoo woyiɗ na ɗu halang, ɓoo ɓekiɗ ɗu ŋ keeñ ciŋ ɓoo.
12 Ɗu ɓengɗi nga, e keeñ ciŋ ɗu ɓeng.
13 Mi na woye na ɗu findi ɓoyi na woye na kuɓuuciŋ ɗe, tumaat findi ɓoo, rangsukaat baahiɗ !
Saɓsukohaat na hoolaaɗi
14 Findi ɗoopaat ɓaahaaɗi minohɗi ɓaah tokiɗ sareet, kinaat nam ɓaah raanaah na kosaaɗiici. Ini yurah na ini yurahɗi ɓaah ye ? Wala siñaar na ñuus min ye ɓaah ?
15 Kiristaani na Seytaani min kerhiɗoh ŋ ye ? Wala kosiɗ na kosaaɗi min hunoh na ?
16 Kahan Kooh min ye kerhiɗoh na kooh ci nikaaɗiici ? Laam e ɓoo kahniŋ Koohi na pese findi a woyoha an :
« Ŋ hey gene na ɓa,
ŋ tiindee ŋ harmban ɓa,
ŋ nik Koohiŋ ɓa,
ɓa nik cuuɓiŋ ngo. »
17 Weɗ tah a woosa ne :
« Pulaat ŋ ɗooƴ ɓa !
Saɓsukohaat na ɓa !
Kinaat laal in hoolaaɗi
te mi ŋ hey ɗu taambɗuke.
18 Ŋ hey nike Baab nga ɗu,
ɗu nik kuɓuuciŋ ngo ! »
Heɗi, yi Heɗ-hatil woo ineem.