Fiisi Pool kanakɗoh kaɓɗoh ɓi Korenta
Rangsohaani
Pool ɓaahee ŋ Israayel ci, ŋ cuuɓiŋ Benyaamin. A nikee Farisen. Ŋ finho Paantakot, wi Janguuni camb ɓaatuk, a ɓaahee ŋ ɓi tolfiɗee kosiɗ ci. Waaye wa raakka mbeh, a cohha na Yeesu, a kossa po a nikka Apootar sah. Teerndiŋ "Tum ciŋ Apootar ci" teeɓohiɗ pangkiŋ ɗe wi a nik Apootar ini kooɗoh ŋ saar 13.
Teerndiŋ Tum ciŋ Apootar ci teeɓohiɗ kaɗaŋ Pool koc ŋ kur kaŋ Korenta ŋ saar 18:1-18. A tumiɗ ndaam ini uup kiis na camban, wala kiis kanak sah. Wa nikee ŋ reehɗohaaniŋ ɓaaɓiŋ ɗe yakki kanakɗoh. Pool kaɗisseen Korenta kotiŋ ɗe kanakɗoh, waaye wa naandsukuuɗi ŋ teerndiŋ Tum ci.
Kaɓɗohi kanakɗoh a fiis ɓi Korenta wii, a fiisoha kur kaŋ Maseduwaan ; a woyissa in ci a tufuk tum ŋ kaɗiŋ ɗe kaahayɗoh ŋ Korenta. Ŋ mirndaani a kaɗangiɗ kaɗi a woyee weem te wa teeɓohuuɗ ŋ teerndiŋ Tum ci 20:2.
Fu jang kaɓɗohii ɗah, fu hey hote ne raakiɗ ini raak ŋ harmban ce na ɓak ngaŋ ɓi Janguuniŋ Korenta. A na teeɓohe ne a yi ŋ keeh ŋ tumohaaɗ ciŋ ɗe na mandohaaɗiŋ ɗe, a ndengɗee ca. A na teeɓohe ne a waaɗiɗ ne ɓa eɗ ɗe cir apootar, te ɓa waaɗ ɗe findi a waaɗoh ɓa. A teeɓohiɗ nik apootar ini wa tokis, na ɓi na woye ne ɓa apootar te ɓa nikɗaa. A rahassa yegɗoh neɓiɗ ŋ ini kaɗ ŋ ɓi Korenta, a summba nga lool. A nammba eɗoh nakoh ne kosiɗ ci raakaaɗiici nik ŋ Yerusalem nangɗohɗu kopor.
Fiisi Pool kanakɗoh kaɓɗoh ɓi Korenta kaɗtiɗoh an :
- Kañɗoh na corkiɗ Kooh ngaŋ giifiɗ ci a giifɗoh 1:1-11
- Pool teeɓohiɗ ne tumohaaɗ ciŋ ɗe lakiɗ waas 1:12–6:10
- Nakoh wuu ɓi Korenta 6:11–7:2
- Yegɗoh neɓiɗ ŋ Korenta - sumiŋ Pool 7:3-16
- Dengoh na nakoh nangɗoh kopor wuu ɓi Yerusalem 8:1–9:15
- Pool mineen degoh miskiɗ, waaye a waaɗ teeɓoh baah 10:1–13:13
1
Kañɗohi
1 Mi yii kañɗis ɗu, ɗu ɓi Janguuniŋ Kooh nik ŋ Korenta na ɓooɓiŋ Kooh ŋ Akaay jen. Mi yi Pool, ApootariŋKiristaani Yeesu ŋ waaɗ-waaɗiŋ Kooh, ñam na fiisee ɗu kaytii, mi na ɓaah ɓoo Timoote.
2 Kooh Baabiŋ ɓoo baahohaat ɗu, a on ɗu jam ; Yeesu Kiristaa Heɗi baahohaat ɗu, a on ɗu jam !
Giifɗiŋ miskiɗ ci
3 Kooh, yi nik Koohiŋ Heɗ ɓoo Yeesu Kiristaa, a nammba nik Baabiŋ ɗe, a yakɗaah, a yi Baabi, yi ɓooɓi jen na miske, Kooh yi na giifɗohe ŋ in nu nik.
4 A yi na giifɗe ɓoo ngaŋ miskiɗ ciŋ ɓoo jen ne ɓoo min giifiɗ ɓi nik ngaŋ miskiɗ nu nik ! Ŋ ineem ɓoo giifiɗ ɓa na giifɗi a giifɗoh ɓoo.
5 Findi miskiɗ ci ɓoo ɓaah na Kiristaani laayoh, giifɗi Kooh na giifɗe ɓoo taamboh ŋ Kiristaani laayoh ɗaa.
6 Ɓoo nik ŋ miskiɗ ɗah, ɓoo nik nga ne ɗu giifɗu, ɗu nam muc ; ɓoo giifɗu ɗah, wa giifɗohaa ɗu ne ɗu ndengɗuk, ɗu min muñ miskiɗ ciŋ ɗu mand na ciŋ ɓoo.
7 Te yaakaari ɓoo raak nga ɗu ndengiɗ, ɓoo inhiɗ ne findi ɗu na ɓaahohe ŋ miskiɗ ci, ɗu na ɓaahohe ɗaa ŋ giifɗi.
8 Kon ɓaah ciŋ ɓoo, ɓoo waaɗiɗ ne ɗu inah miskiɗ ci rahas ɓoo ŋ kur caŋ Asi : Ɓoo degseen miskiɗ keeh-keeh po ɓoo antalisseeɗi ca, ɓoo liiɓeeɗi sah ne ɓoo hey rise pes.
9 Ɓoo ambee ne sah ɓoo joy joy kaan ; ineem raakiɗ ne ɓoo oolkohuu haf ɓoo, ɓoo oolkoh Kooh yi na hultiɗe kaaniɗ ci.
10 A yi muciɗ ɓoo ŋ kakaan ki miskiɗeem, te a hey ɓoo mucɗisse. Ɓoo oolkiɗ ne a genan ɓoo muciɗ.
11 Kiimi ɗu kiimɗee ɓoo Kooh nam ɓaah nga ; ŋ ineem, ɓo' laayiɗ kiimɗiɗ ɓoo, tahha po ɓo' laayiɗ hey corkiɗe Kooh ŋ baahohi a baahoh ɓoo.
Pool oorɗiɗ ɓaaɓiŋ ɗe Korenta
12 Inii weɗ ɓoo na ndamkohe te liiɓ ciŋ ɓoo seede'iɗa, weɗ ne : Keeh na hool puloh ŋ Kooh, ceɗ ɓoo na pesohe na ɓi Adina, ɓoo na uupe ca pesoh na ɗu. Nikɗi haa ne wa ñaañi puloh ŋ ɓo' on ɓoo ineem, waaye wa baahohiŋ Kooh.
13-14 Ɓoo na fiiseeɗi ɗu in wiiriis ɗal ini ɗu min jang te ɗu inaha. Raakiɗ ini ɗu camb inah, te ŋ liiɓiɗ ne ɗu heya inhe jen, weɗ ne ŋ mbehi Heɗ ɓoo Yeesu dokkohan, ɗu hey neɓse nga ɓoo, te ɓoo neɓu nga ɗu.
15 Ineem wooreen ndo, weɗ tah po ŋ ammba ne ŋ kockohan nga ɗu ne ɗu sum ŋ kot ci kanak ci ŋ raakan ndeem.
16 Weɗ ne ŋ waaɗeen taamboh nga ɗu ne ŋ hayee Maseduwaan ndii ɗah ; te ŋ namee wiiruk ɗah, ŋ taambis nga ɗu ne ɗu ɓaatɗoh ho ŋ ɓaaɓiŋ ngo ŋ waas Yudee.
17 Ɗu liiɓ ne wi ŋ woyee ŋ ɗooƴ co ne ineem weɗ maa hee tume, ŋ liiɓɗi liiɓɗi nga e ? Wala ɗu liiɓ ne ŋ raak liiɓohaaɗ ɓo' dong, po "ee"-iŋ ngo miniɗ nik "a'aa" ne ŋ tufuk ne ŋ tum in ɗah ?
18 Wa wooriɗ Kooh ne, woo ki ɓoo na woyee ɗu wa "ee" na "a'aa" haa.
19 Laam Kuɓkiŋ Kooh, Yeesu Kiristaa yi ɓoo woyee ɗu, mi na Silweng na Timoote, a "ee" na "a'aa" haa ; a moos nik "ee" dong.
20 Te in ci Kooh gapoh, ini ca laay jen, ca "ee" ŋ Yeesu Kiristaa. Ineem weɗ nam tah po wa taamboh nga ɗe, ɓoo woyee "amiin" weɗ "ee", ne ɓoo yakiɗ Kooh.
21 A Kooh ambsoh ɓoo na ɗu, a ndengiɗta ɓoo ŋ Kiristaani, a degiɗ ɓoo ne ɓoo pangkiɗ ɗe.
22 A ñaassa ɓoo, a tummba Fuuɗsiŋ ɗe ŋ keeñ ciŋ ɓoo, ineem nikka firnde ne in ci a gap ɓoo jen, ɓoo hey ca rahse.
23 Kon Kooh miniɗ to seede, ŋ lee ɗah, ŋ kaanaat : Ŋ sang ɗu ɓek miskiɗ weɗ tah ŋ hayisɗi Korenta poyi.
24 Nikɗi haa ne ɓoo waaɗ ɗu deg yaah ŋ ini kaɗ ŋ kosiŋ ɗu laam ɗu ndengiɗ nga. Ɓoo kay, ɓoo na ɓaatɗohee ɗu ŋ sumiŋ ɗu.