16
Nangɗohiŋ kopori wuu Janguunaŋ Yerusalem
1 Ini kaɗ ŋ kopori na nangɗohse ɓaatɗohoha ɓooɓiŋ Kooh nik ŋ Yerusalem, tumohaata findi ŋ nakohoha ŋ Janguucaŋ Galaat.
2 Dimaas nu nik, yaa nu nga ɗu ɗah ɓayaat ŋ ini a raak, ini a min eɗoh, a ɗaaka ŋ kahan ce. Ɗu sekuu po ŋ hay, ɗu hanee ca nangɗoh.
3 Ŋ hay ɗah, ŋ hey fiise kayit, ŋ eɗ ca ɓooɓi ɗu ooluk, ɓi ŋ tuuƴan Yerusalem ne ɓa eɗoha kopori ɗu onoh.
4 Nik ne wa cariɗ ne ŋ nam kaɗ ɗah, ɓa hun na so.
Pool woyiɗ ŋ ɓaaɓ ciŋ ɓa
5 Ŋ hey ɗu hee marke ne ŋ puloh Maseduwaan ɗah, laam ŋ waaɗ taamboh nga.
6 Wa miniɗ nik ne ŋ hey ɓaatsiɗe ŋ ɗiskiŋ ɗu, wala sah jamanooniŋ soosi jen ŋ nikana ŋ ndeem, ne ɗu min ndo ɓaatɗoh ŋ min taalndiɗ ɓaaɓiŋ ngo.
7 Waasii, ŋ waaɗɗi ne ŋ taamb rek, ŋ marak ɗu, ŋ coot. Ŋ waaɗiɗ nik na ɗu ƴissuut ne Heɗi teyɗuka ɗah.
8 Waaye ŋ tasan ŋ ndii ŋ Efes po feetiŋ Paantakot.
9 Kooh rangsiɗiɗ to bunta angiɗ ne ŋ min panguk baahiɗ, ali nik ne sah ɓi langɗi na so laayiɗ nga.
10 Timoote hay ɗah, taambkohaat ɗe baahiɗ po a neƴƴohuu ŋ harmban ɗu. A na name tum pangkiŋ Heɗi findiiso.
11 Kon ali ɓo' kinaat ɗe heef ! Ɓaatɗohaat ɗe a ɓaaɓ na jam po a min hay nga so na ɓaah ciŋ ɓoo kosiɗ ci, mi yii sek ɗe.
12 Ini kaɗ ŋ ɓaah ɓoo Apolos, ŋ ñaahiɗ ɗe laayiɗ ne a hun na ɓaah ciŋ ɓoo kosiɗ ci ɓinooɓi, a hay ɗu marke, waaye ɗiski wa nik a teyɗukɗi ; a hey haye ne a mina ɗah.
Nakoh ci mirndoh na askohi
13 Kinaat neeh, ndengaat ŋ kosiŋ ɗu, kaañaat, raakaat hatil !
14 In nu ɗu haɓɗee ɗah, haɓɗaata ngaŋ waaɗ ɓooɓi na waaɗ Kooh !
15 Ɓaah ciŋ ngo, ɗu inhiɗ ne a Estefanas na ɓi kahan ce, ɓeɗ koc kos ŋ Heɗi ngaŋ Akaay jen, te ɓa eɗohha haf ɓa ne ɓa taambkoh ɓo'-Kooh ci, kon mi yii kiim ɗu ne
16 ɗu nam kerhiɗ ɓooɓi mand ɗaa, ɓeɗ na ɓi hun na ɓa ŋ pangki miskiɗi.
17 Ŋ sumiɗ ŋ hayi Estefanas na Fortunatus na Akaaykos hay yo marke ; ɓa tumɗiɗ to ini ɗu hee so tumɗe nikee ne ɗu ɓii ŋ ndii ɗah.
18 Ee, ɓa dalɗiɗ hel ciŋ ɓoo, mi na ɗu. Ɓooɓi mand ɗaa, ambaat ɓa yaah kanak.
19 Ɓi Janguuciŋ Asi ɓa ɗii kañiɗ ɗu. Akilaas na Piriska na kosiɗ ci na cohe ŋ kahan ɓa, ɓa ɗii kañiɗ ɗu baahiɗ ŋ tiikiŋ Heɗi.
20 Ɓaah ciŋ ɓoo kosiɗ ci nik ndii jen ɓa ɗii kañiɗ ɗu. Kañɗohaat ŋ harmban ɗu, ɗu morgiɗkohee, wa hun na keeñ hooliɗ.
21 Mi Pool, ñam fiisoot kañɗohii na yaahiŋ ngo.
22 Ɓo' nu waaɗɗi Heɗi ɗah, a alku'aat ! Marana taa ! (Heɗ ɓoo, haya !)
23 Yeesu Heɗi baahohaat ɗu !
24 Ŋ waaɗiɗ ɗu jen ŋ niki ɓoo nik ŋ Kiristaani Yeesu !