28
Pool ŋ Malta
1 Wa ɓoo fus na jam po ƴutta, ɓoo inahha ne kur ka ɓoo nikohee teeku Malta, a masuɓ wila.
2 Ɓooɓa genee nga kerheeɗi gerek, hondohɗi ɓa baahohha ɓoo keeh-keeh, ɓa fuuɗta yongkaah, ɓa ɓayya ɓoo jen ŋ seroowa ne ɓoo yohnuk, raak ɗe toɓeeɗa, soosi laayya.
3 Pool parahha ɓi sokoñ, a njaffa ca ŋ yongkaaha, hiriñ pulohha nga ca sagu dohɗa, ñapukka ɗe ŋ yaah.
4 Wa ɓooɓa gen kur ka hot iiña ñapkiɗ Pool ŋ yaah, ɓa woosa ŋ ɗooƴ ɓa ne : « Wa wooriɗ ne ƴaarii apoh ɓo', a muciɗ ŋ cookmi waaye koof ki na atte'e faɗɗi ɗe ne a pes. »
5 Weɗ Pool lisoh iiña ŋ yongkaaha, te ali in rahasɗi ɗe.
6 Ɓooɓa jen sekeeɗa ne a ufis wala a keen ŋ ɗiska ɗiska, a kaan. Ɓa sekka in maañiɗ, ɓa hotta ne ali in rahasɗi ɗe ; ɓa ɓoƴsohha liiɓohaaɗ, ɓa woosa ne : « A ɓaah ŋ kooh ci. »
7 Wa raakeen kahan raakiɗ tam ŋ ɓak caam, a ƴaara adgohee kur ka raakee wa. A teeksee Pubiliyus. A taambkohha ɓoo, a daliɗta ɓoo findi nawle ini ree neeh kaahay.
8 Baabiŋ Pubiliyus nikee faankiɗ ŋ fiƴaang ; a ambohee faan dohiɗ jip na rook nupiɗ miskiɗ. Pool kaɗta ɗe marka, a kiimiɗta ɗe Kooh, a degga ɗe yaah ciŋ ɗe, a wiriɗta ɗe.
9 Wa a wiriɗ ɗe, kosaayiɗ ca ɓinooɓa ŋ kur ka jen nammba hay, ɓa wirɗuusa.
10 Ɓoo eɗuusa cir keeh-keeh ŋ ineem, weɗ tah po wa ɓoo hee coote, ini ɓoo etohee ŋ ɓaaɓaŋ ɓoo jen, ɓeɗ eɗee ɓoo wa.
Pulohaŋ Pool Malta na kaɗaŋ ɗe Rom
11 Wa ɓoo tum caɓin ci kaahay ciŋ soosi ŋ kur kaŋ Malta, ɓoo aassa bato puloh Aleksandiri, ɓoo cootta. Batooneem raakeen nataaliŋ komaakci siis ciŋ kilifaaniŋ kooh ciŋ ɓa, wa teeksee ŋ siis ci kanak ceem. Caɓin ciŋ soosi jen wa tum ca ŋ kur ka, wa hannda coot.
12 Ɓoo reesa Sirakus, ɓoo serra nga neeh kaahay.
13 Ɓoo pulohha ndeem huntiɗkohha na yaah cookmi po ŋ Resiyo. Ŋ Kooh-wiisiina puuɗsa lahha ɓoo finho puuɗseeɗa, ɓoo tum neeh kanak rek ɓoo reesa Pusol, serohaana yakka ŋ Rom.
14 Ɓoo raakka ɓi ɓo' ŋ ɓaah caŋ ɓoo kosiɗ ca nga. Ɓa kiimmba ɓoo ne ɓoo nik na ɓa neeh yasna-kanak. Ɓoo kaɗeeɗa ɗaa po ɓoo reesa Rom.
15 Ɓaah caŋ ɓoo kosiɗ ca nikee ŋ Rom kerahha ini kaɗ nga ɓoo, ɓa hayya ɓoo taambke po ŋ toonohaaraŋ kurka na woyse Toonohaaraŋ-Apiyus na ɗiska na woyse Daloha-Kaahay. Wa Pool hot ɓa, wa ɓaatta ɗe fit, a corkiɗta Kooh.
16 Wa ɓoo ree Rom, Pool onuusa ne a gen kahan kiik ce a yi na soldaara niiɗee ɗe.
Pool woyiɗ Yegɗohiŋ Muci ŋ Rom
17 Wa degga neeh kaahay, Pool ɓeeɗukka kilifaacaŋ Yawuut ca nik ŋ Rom ne ɓa hay. Wa ɓa teemb a woosa ɓa ne : « Ɓaah ciŋ ngo, ŋ tumɗi cuuɓiŋ ɓoo in, ŋ tumɗi mbaah ciŋ caac ciŋ ɓoo in, waaye ɗu hot nga, ŋ ambohu Yerusalem, ŋ deguusa ŋ yaah caŋ ɓi Rom.
18 Wa ɓeem meekis so ŋ woosa ɓa, ɓa hoteeɗi ali ini joy yo tah apu, tahha po ɓa waaɗta so faɗis.
19 Waaye Yawuut ca sannga, ŋ minɗi in nga, ɗal kiim ne ŋ ɓayu ŋ buuri yakki ŋ Rom a attee so. Waaye nikɗi haa ne ŋ waaɗ yamb ɓooɓiŋ ngo.
20 E ineem tah po ŋ kiimmba ne ŋ hotoh na ɗu, ŋ woo na ɗu, ɗu inah ne ŋ toku ceen cii ɗah, e ini ŋ kos yaakaariŋ Israayel ci tah. »
21 Yawuut ca loffa ɗe ne : « Raakɗi ali fiisi ɓoo rahas puloh Yudee ŋ ini kaɗ nga ɗa te ali ɓaah ɓoo ŋ ndaam hayɗi ndii ne a wik wala a woo ɓoo in moɗaaɗi nga ɗa.
22 Waaye ɓoo waaɗiɗ ɗa sikɗuk, fu woo ɓoo ini fu liiɓ nga, laam ɓoo inhiɗ ne waasi fu kooɗ, ɗisik nu nik ɓooɓi na woye ne wa waas keeh haa. »
23 Ɓa gappa mbeh wiiriis ne ɓa coh. Wa wa ree, ɓa hayya raake Pool ŋ ɗiska a dale. Ɓooɓa hayee, ɓeɗ uupee laay ɓooɓa ɗeɓe hay. A woyeeɗa na ɓa ŋ ini kaɗ ŋ Nguuriŋ-Kooh ina kooɗoh na ɓaaɓa po na niina. A taambohha ŋ waasiŋMusaa na woo ciŋ woosuuɗ ci, a teeɓeeɗa ɓa ne ɓa min kos Yeesu.
24 Ɓum kossa ini a woo, ɓinooɓi sannga kos.
25 Wa ɓa hee coote raak ɓa kerhiɗohɗi ŋ ɗooƴ ɓa, Pool ɓaatta nga ne : « Fuuɗsi Hoolohngaani woyee keeh wa a woyee na caac caŋ ɗu taamboh ŋ woosuuɗi Esayi !
26 A woyee ne :
“ Kaɗa ŋ cuuɓii, fu woo ɓa ne :
Ɗu hey sikɗuke baahiɗ, waaye ɗu inhanɗi muk ;
ɗu hey marke baahiɗ, waaye ɗu hotanɗi muk.
27 Keeñ ciŋ ɓooɓii
raakisɗi yeg yeg ;
ɓa rangiɗ nof ciŋ ɓa,
ɓa ɗuungiɗ has ciŋ ɓa,
ne ɓa hotuu na has ciŋ ɓa,
ɓa kerhuu na nof ciŋ ɓa,
te ɓa inhuu ngaŋ keeñ ciŋ ɓa ;
te ŋ ineem,
ɓa minuu wiiruk nga so
ne ŋ wiriɗ ɓa. ” »
28 Pool woyissa ɓa ne : « Inhaat ne Yegɗohiŋ Muci puloh ŋ Kooh woosohuuɗ po ŋ ɓi nikɗi Yawuut, te ɓeɗ, ɓa hey wa sikɗuke. » [
29 ]
30 Pool gennda kiis kanak ŋ kahna, caɓin nu kaan ɗa a wirind. A dalɗee ɓi hee ɗe marke jen nga.
31 A yegɗoheeɗa Nguuriŋ-Kooh, a jangɗoheeɗa na fit ini kaɗ ŋ Yeesu Kiristaa Heɗi, te ali ɓo' hondoheeɗi ɗe tuma.