10
Tava Kilasa sari na Tie Amoraiti
1 Sa baṉara pa Zerusalema, pozana Adonizedeki, si avoso nia sapu ele va kilasia Zosua sa vasileana Ai, meke va puzulu hokaria sa, gua tugo sapu tavete nia sa sa vasileana Zeriko, meke sa baṉara vasina. Avoso nia tugo sa sapu sari na tie pa vasileana Qibione si ele koa bule, na koa keke koari na tie Izireli, gua.
2 Ke matagutu hola sa baṉara meke sari na tie pa popoa Zerusalema, sina sa vasileana Qibione si keke vasileana nomana gua tugo ri kaiqa vasileana pu ari dia baṉara. Noma hola nia Qibione si pa Ai, meke sari nana tie varipera sina tie varane pa vinaripera.
3 Gua asa, ke garunu la nia sa baṉara Adonizedeki sa nana vina ria pa vinaripera koari na baṉara hire: baṉara Hohamu pa Heboroni, baṉara Piramu pa Zamuti, baṉara Zapia pa Lakisi, meke koasa baṉara Debiri pa Eqiloni.
4 Zama si asa, “Mae, toka nau, mada razai sari pa Qibione, sina ele koa bule koe Zosua meke koari na tie Izireli sarini,” gua si asa.
5 Sari qeto minate tadi ka lima baṉara sara si keke hiniva, meke varigara ni rini sari na dia qeto minate, pude la varidikue nia si pa Qibione meke rapatia, gua.
6 Ke topue la tepa tinokae koe Zosua pa Qiliqali sari pa Qibione, meke zama, “Baṉara, mu lopu muliṉini gami na mia nabulu! Mae tokani gami, mamu harupu gami! Sari doduru butubutu tadi na baṉara koari na popoa tadi na tie Amoraiti koari na popoa toqetoqere si keke hiniva, pude mae rapatani gami!” gua si arini.
7 Ke topue pa Qiliqali se Zosua meke sa nana qeto minate, somana tugo sari nana ṉiha na varane.
8 Meke zama la koe Zosua se Zihova, “Mu lopu matagutu va sogoni sari na kana. Ele ponigo Rau sa minataqara. Lopu keke arini si kote boka va kilasigo,” gua si Asa.
9 Doduruna sa boṉi si enea sa qeto minate te Zosua, podalae pa Qiliqali meke kamo pa Qibione, meke la rapata va hodaki rini sari na tie Amoraiti.
10 Va tarazuzui e Zihova sari na tie Amoraiti koasa dinoṉona la sa qeto minate tadi na tie Izireli. Seke va matematei rina tie Izireli sari na tie Amoraiti pu hiva la razai sari pa Qibione. Hadu sage ni rini pa hubi taba sarini, meke hola gua pa Beti Horoni, meke hadu luli rini meke kamo latu pa Azeka meke Makeda.
11 Totoso govete hola gua koari na tie varipera tadi pa Izireli sari na tie Amoraiti, si va hoqani ruku kabukabue aesi nomadi e Zihova si arini. Ke soku arini si mate mo pa ruku aesi, hola ni pu va matei rina tie Izireli.
12 Pa ranena sapu va mataqari e Zihova sari na tie Izireli meke va kilasi rini sari na tie Amoraiti, si zama la koe Zihova se Zosua pa kenudi rina tie Izireli,
“Turu noso goi na rimata pa totosona Qibione!
Mamu noso goi na sidara pa totosona sa lolomo Aizaloni!” gua si asa.
13 Ke va turu nosoa e Zihova sa rimata, meke lopu rizu sa sidara, osolae va kilasi rina tie Izireli sari na dia kana. Ta kubere si asa pa buka te Zasara. Turu noso sa rimata pana korapa rane, meke lopu lodu padana keke doduru rane.
14 Lopu hite ele ta evaṉa pukerane meke koari na rane ṉinoroi si keke rane sapu gua asa, sapu va tabe gunia e Zihova si keke tie. Hinokara varipera tokani tugo e Zihova sari na tie Izireli.
15 Beto sapu gua asa, si kekere pule la dia vasina koadi pa Qiliqali sari na tie Izireli meke se Zosua.
Tuqe Vagi e Zosua sari ka Lima Baṉara Tadi na Tie Amoraiti
16 Sari ka lima baṉara Amoraiti si govete meke la tome koasa bae pa Makeda.
17 Meke sipu ta dogoro koa keke ri kasa, meke la tozia rini koe Zosua sa vasina pu tome rini,
18 si zama si asa, “Topili tuku la nia patu lavata sa sasadana sa bae. Vekoi kaiqa tie kopu vasina,
19 ba lopu koa eko mo vasina si gamu doduru. Hadu luli sari na kana, mamu rapata ni pa mudidia, lopu va kamo pulei koasa dia vasileana soti! Ele veko vatuni e Zihova sa mia Tamasa si arini pa limamia.”
20 Seke va matematei e Zosua meke sari tinoni Izireli si arini, ba kaiqa si govete nuquru koari bara vasileana meke lopu tava mate.
21 Meke tiqe pule beto mae sari doduru tie te Zosua koa sa pa Makeda, vasina sapu va turu ipi si arini.
Loke tie koasa popoa asa si boka zama va karikari i sari na tinoni Izireli.
22 Beto asa si tiqe zama se Zosua, “Mi tukelia sa sasadana sa bae, mi turaṉa vura maeni koa rau sari ka lima baṉara.”
23 Ke ta tukele sa bae meke ta turaṉa vura sari baṉara pa Zerusalema, Heboroni, Zamuti, Lakisi, meke Eqiloni.
24 Meke sipu ta turaṉa la si arini koe Zosua, si tiqe tioko vagi e Zosua sari doduru tie varipera meke nana palabatu nomanomadi pa vinaripera saripu lulidi koa sa pude mae neti ruadi sari na baṉara. Tavetia tugo rini.
25 Zama la koari nana palabatu nomadi se Zosua, “Mi lopu matagutu na balabala mamata. Mi koa varane na mataqara sina gua asa si kote evaṉia e Zihova koari doduru mia kana.”
26 Beto asa si va matei e Zosua sari na baṉara meke huqi va sigoti sa koari ka lima huda; koa mo vasina sari tinidia osolae kamoa veluvelu hokara.
27 Sipu lodu sa rimata si garuni e Zosua si arini pude pazu goreni, meke la oki nuquru ni koasa bae tugo sapu tome ia rini tatasana. Sari na patu lavalavata si ta veko koasa sasadana sa bae, meke korapa koadia tugo vasina.
Sokudi Voloso Popoa tadi na Tie Amoraiti si Tuqe Vagi e Zosua
28 Rapatia meke tuqe vagia e Zosua sa vasileana Makeda meke sa nana baṉara koasa rane sana. Va mate betoi sa sari doduru koasa vasileana; lopu keke si tava toa. Tavete la nia sa koasa baṉara pa Makeda gua sapu tavete la nia sa koasa baṉara pa Zeriko.
29 Pa mudina asa, si taluarae pa Makeda se Zosua meke sa nana qeto minate meke la gua pa Libina meke rapatia.
30 Veko vala nia tugo e Zihova pa limadia rina tinoni Izireli sa vasileana lavata asa, meke sa nana baṉara. Lopu keke tie si ta veko hola, ba va mate betoi rini si arini. Tavete la nia rini koasa baṉara gua sapu tavete la nia rini koasa baṉara pa Zeriko.
31 Mudina sapu gua asa, si taluarae gua pa Libina se Zosua meke sa nana qeto minate meke topue hola la pa vasileana Lakisi, meke la vari likohae nia rini meke rapatia.
32 Meke koasa rane vina rua si vala nia e Zihova pa limadia rina tinoni Izireli sa minataqara koasa vasileana Lakisi. Gua puta tugo sapu evaṉia rini pa Libina si va mate betoi rini sari doduru koasa vasileana.
33 Mae toka nia e Horamu sa baṉara pa Qeza sa vasileana Lakisi, ba va kilasia Zosua si asa, meke sa nana qeto minate meke lopu keke koarini si toa.
34 Beto hoi si taluarae pa Lakisi se Zosua meke sa nana qeto minate, meke la gua pule pa Eqiloni; vari likohae nia rini meke rapatia.
35 Koasa rane tugo asa si tuqe vagia rini, meke va mate betoi sari doduru tie vasina, gua puta tugo sapu evaṉia rini pa Lakisi.
36 Mudina sapu gua asa, si taluarae pa Eqiloni se Zosua meke sa nana qeto minate, meke sage la koari na toqere, meke rapatia si pa Heboroni,
37 meke tuqe vagia. Va mate ia rini sa baṉara vasina meke doduru pule koasa vasileana, meke gua tugo sarini pu koa koari na vasileana pu koa kapaedi. Huara inete hokaria Zosua sa vasileana lavata, gua tugo sapu tavete la nia sa pa Eqiloni. Lopu keke sapu koa vasina si toa.
38 Meke tiqe kekere pule la pa vasileana Debiri se Zosua meke sa nana qeto minate meke rapatia.
39 Tuqe vagia sa meke tuqe turaṉae nia tugo sa sa dia baṉara meke sari na vasileana pu koa kapaedi. Va mate betoi rini sari doduru tinoni vasina. Tavete la nia e Zosua pa Debiri meke sa nana baṉara, gua sapu tavete la nia sa pa Heboroni, meke pa Libina, meke sari dia baṉara.
40 Va kilasi e Zosua sari doduru popoa arini: sapu sa popoa toqetoqere, sa popoa Neqevi d, meke gua tugo sa popoa sapu koa pa kali toqere sapu gore la pa kali lodu rimata koari na toqetoqere, meke pa hubidi rina toqere pa kali lodu rimata, meke gua tugo sari na baṉara koarini. Lopu keke si va toaia sa; doduru si tava mate gua puta tugo sapu garunu nia e Zihova sa Tamasa pa Izireli.
41 Va kilasi e Zosua sari na kana podalae pa Kadesi Banea pa kali mataona sa popoa Kenani kamo la pa Qaza tata pa masa kolo hokara, turaṉae la tugo sari doduru vasileana pa Qoseni meke kamo la gua tugo pa Qibione.
42 Doduru popoa arini meke sari na dia baṉara si va kilasi Zosua pa keke nana inene rinapata mo, sina se Zihova sa Tamasa pa Izireli si varipera poni sari na tinoni pa Izireli.
43 Mudina sapu gua asa, si pule la koari dia ipi pa Qiliqali se Zosua meke sa nana qeto minate.